Pipas amigoyki kananpaqqa ñaupaqtaqa allintan reqsinayki. Chhaynallataqmi Diospa amigon kayta munaspapas ñaupaqtaqa reqsinanchismi imayna Dios kasqanta, jinaspa payman astawan qayllaykusun. Paypaqqa askhan cualidadninkuna, tawan ichaqa astawanraq reparakun: atiyniy, yachaynin, justician, munakuq kasqan ima.

“¡Apu Señor Diosnilláy! Qanmi jatun atiyniyoq kallpaykiwan janaq pachata kay pachatawan kamaranki” (JEREMÍAS 32:17)

Tukuy kamasqakunan rikuchin Diospa atiyninta. Ejemplopaq, ¿imatan q’ara aychayki sienten ruphaypi kaqtiyki? Intiq ruphasqantan riki. Chay ruphaymi rikuchin Jehová Diospa atiyninta. ¿Jayk’a atiyniyoqmi inti kanman? Intiq chaupinpis kashan yaqa 15.000.000 °C (27.000.000 °F) jina ruphayraq. Sapa segundopis intiqa pachaj-pachaj millón bombapas t’ojamushanman jinataraq energiata wijch’umun.

Intiqa juch’uyllan kay universopi juj estrellakunamantaqa. Cientificokunan calculanku universopiqa UY Scuti estrellas aswan jatun 1.700 kuti jatunraq intimantaqa. UY Scuti nisqa estrella intita reemplazanman chayqa allpataqa ch’usaqyaruchinmansi, jinaspa planeta Jupitertapas karutaraq pasanman. Chayta yachaspan astawanraq entiendenchis Jeremiaspa nisqanta, paymi niran: “Jehová  Diosmi ‘janaq pachata kay pachatawan kamaran’”, nispa. Chaywanqa nisharan Dios atiyninwan universota kamasqanmantan.

¿Imaynapin beneficiakusunman Diospa atiyninmanta? Diospa tukuy kamasqankunawanmi kausanchis, ejemplopaq: intiwan, kay allpapi tukuy imaymana kaqkunawan. Chaymantapas sapanka jujninchistan atiyninwan yanapawanchis. ¿Imaynata? Ñaupa tiempopiqa Diosmi Jesusman atiyta qoran milagrokunata ruwananpaq. Biblian nin: “Ñausakunan qhawarinku, such’ukunan puririnku, lepra onqoyniyoqkunan qhaliyachisqa kanku, roqt’ukunan uyarinku, wañusqakunan kausarichisqa kanku”, nispa (Mateo 11:5). ¿Kay tiempopirí? Biblian nishan: “Payqa sayk’usqatan kallpachan”, nispa. Nillantaq: “Señor Diospi confiakuqkunan ichaqa wajmanta kallpachasqa kanqaku”, nispa (Isaías 40:29, 31). Diosqa qowasunmanmi ‘mana aypay atisqanchis atiyta’ ima problemakunatapas atipananchispaq otaq aguantananchispaq (2 Corintios 4:7). Tukuy chaykunata yachaspa, ¿manachu astawanraq Diospa qayllanpi sientekunki?

“Señor Diosníy, ¡mana yupay atiyraqmi ruwasqaykikunaqa! Llapallantan yachaywan ruwaranki” (SALMOS 104:24)

Kamasqankunamanta astawan yachaspan, astawanraq Diospa yachayninmantaqa admirakunchis. Kay mundopiqa kanmi cienciamanta estudiaqkuna, paykunan Jehová Diospa kamasqankunata estudianku chayman jina imatapas ruwanankupaq, otaq ruwasqankuta astawan mejoranankupaq. Paykunaqa tukuy imaymanatan ruwanku jinallataq avionkunatapas.

Jehová Diosqa nishu yachayniyoqmi, chaymi rikukun imayna runaq cuerpon kamasqa kasqanpi. Imayna juj wawa wijsapi formakusqanpi piensasun. Juj wawaqa formakuyta qallarin juj juch’uy celulallamantan, chaypin kashan imayna wawa kanan. Chay celulaqa askha celulakunamanmi t’aqakun igualkama. Jinaspan ichaqa chay celulakunaqa imaymana celulakunaman cambianku: yawarpaq, nerviokunapaq, tullukunapaq ima. Chaymantataq organismokuna formakuyta qallarin, jinaspa funcionayta qallarinku. Isqon killallapin juj celulallamanta juj runaman tukun, cuerponpi waranqa-waranqa millón celulakunayoq. Chhayna sasa runa kamasqa kasqanchista yachaspan estudiosokunaqa Bibliata qelqaq nisqanta jina ninku: “Ancha musphana ruwasqa kasqaymantan yupaychayki”, nispa (Salmos 139:14).

¿Imaynatan beneficiawanchis Diospa yachaynin? Kamaqninchisqa yachanmi imata necesitanchis kusisqa kananchispaq chayta. Payqa yachaysapataq chayqa allin consejokunatan Bibliawan qowasunman. Ejemplopaq, niwanchis: “Qankunapura [...] perdonanakuychis”, nispa (Colosenses 3:13). ¿Allinchu chay consejo kanman? Arí, allin consejon. Estudiosokunan ninku: “Perdonakuq runaqa allintan puñun, manan presión arterial nisqa onqoywanpas jap’ichikunchu. Chaymantapas depresión onqoypas ni juj onqoykunapas manan  jap’inchu”, nispa. Diosqa juj sumaq amigo jinan noqanchismanta llakikun, jinaspa allin consejokunata qowanchis (2 Timoteo 3:16, 17). ¿Munawaqchu chhayna amigoyoq kayta?

“Señor Diosqa chanin runatan munakun” (SALMOS 37:28)

Diosqa imatapas allintakaman ruwan. Biblian nin: “Tukuy-atiyniyoqqa manan jayk’aqpas mana chanintaqa ruwanmanchu”, nispa (Job 34:10). Diosqa juzgaspapas allillantapunin ruwan salmistaq nisqan jina, nin: “Qanmi juzgaspa llaqtakunata chaninchanki”, nispa (Salmos 67:4). Diosqa runaq sonqotaqa rikunmi, manan pipas engañayta atinmanchu, payqa tukuytan yachan chayman jinan juzgan (1 Samuel 16:7). Chaymantapas Diosqa makillan rikushan ima mana allinpas kay mundopi pasasqanta, chaymi prometen millay runakunata pisi tiempomanta ch’usaqyachinanpaq (Proverbios 2:22).

Ichaqa manan chaytaqa ruwanqa millay juez kasqanraykuchu. Payqa khuyapayakuq Diosmi. Biblian nin: “Diosqa khuyapayakuqmi sumaq sonqoyoqmi”, nispa. Millay runakuna arrepientekuqtinpas khuyapayanmi. ¿Manachu chaywan nisunman “Diosqa justo Diospunin” nispa? (Salmos 103:8; 2 Pedro 3:9.)

¿Imaynapin beneficiakusunman Dios justicia ruwaq kasqanmanta? Apóstol Pedron niran: “Diosqa lliutapas igual-llata rikusqanta, payta manchakuspa allin kaqta ruwaq runakunataqa may nacionmantaña kanku chaypas sumaqta chaskisqantawan”, nispa (Hechos 10:34, 35). Diosqa mana pimanpas sayapakuq kasqanraykun, llapapas beneficiakunchis justicia ruwaq kasqanmanta. Payqa manan qhawanchu pipas ima razamanta, may nacionmanta, educacionniyoqchus otaq qolqeyoqchus chaytaqa, llapanchispas paymanqa qayllaykusunmanmi.

Chaymantapas kamaqninchisqa concienciatan qowaranchis, chhaynapi justicia ruwaq kasqanta entiendenanchispaq. Bibliaqa rimanmi kamachikuy simi sonqonchispi kasqanmanta. Chayqa conciencian, chaytaq reparachiwanchis ima ruwasqanchispas  allinchus icha manachus chayta (Romanos 2:15). ¿Imaynatan chay beneficiawanchis? Conciencianchis allin educasqa chayqa mana allin ruwaykunamantan jark’awanchis. Juchaman urmaqtinchistaq arrepientekunanchispaq tanqawanchis, jinaspa manaña ruwananchispaq. Dios justicia ruwaq kasqanta yachayqa beneficiawanchismi, astawanmi payman qayllaykuytapas munanchis.

“Diosqa munakuymi” (1 JUAN 4:8)

Bibliapiqa manan rijurinchu Diosqa atiymi, yachaymi otaq justicia nispaqa. Aswanpas nishan “chay cualidadninkunatan rikuchin” nispa. Bibliapin ichaqa rijurin “Diosqa munakuymi” nispa. ¿Imarayku? Atiyninqa yanapanmi imatapas ruwananpaq, justicia ruwaq kasqan yachayniyoq kasqanpas ruwasqantan diriginku, tukuy chaykunataqa ruwachin munakuyninmi. Payqa tukuytapas munakuq kasqanraykun ruwan.

Jehová Diosqa manan necesitanchu imatapas ni pitapas, munakuq kaspan tukuyta kamaran, runakunatapas munakuq cuidakuq kasqanmanta beneficiakunankupaqmi kamaran. Kunanpas munakuq kaspan ‘intinta lloqsichimun millay runakunapaqpas allin runakunapaqpas, parachimullantaqmi allin runakunapaqpas mana allin runakunapaqpas’ (Mateo 5:45).

Chaymantapas “Jehová Diosqa rikuchiran ancha munakuq kasqanta, khuyapayakuq kasqantawan” (Santiago 5:11). Payqa munakuynintan rikuchin payman qayllaykunankupaq cambiokunata ruwaqkunaman. Diosqa sapankatan reqsin, “manan sapankanchismantapas nishu karupichu kashan” (Hechos 17:27).

¿Imaynatan beneficiakunchis Dios munakuq kasqanmanta? Diosqa imaymanapin rikuchiwanchis munakuyninta, ejemplopaq, inti chinkaykushaqtin horas, juj wawaq asikusqan, familianchis munakuwaqtinchis, jujkunapas kusichiwanchismi. Manan chaykuna kasqanraykullachu kausanchis ichaqa kusichiwanchismi.

Juj beneficiopas kallantaqmi Dios munakuq kasqanmanta: Chayqa oracionmi. Biblia nin: “Ama imamantapas llakipakuychischu, aswanpas mañakuspa, rogakuspa, graciasta qospa ima Diosman willakuychis imachus necesitasqaykichista”, nispa. Jehová Diosninchisqa munakuwanchismi chaymi munan tukuy llakikuyninchiskunata willakunanchista. Sichus willakusun chayqa “runaq mana entiendey atisqan thaj kayta” qowasun (Filipenses 4:6, 7).

Kay articulopin yacharanchis Jehová Diospa importante cualidadninkunamanta: atiyninmanta, yachayninmanta, justicianmanta, munakuq kasqanmantawan. Astawan reqsiyta munanki chayqa, invitaykikun “imatan Dios ruwaran qanpaq, imatan ruwanqa” chay temakunata leenaykipaq.