Judeapi kashaqtinmi Jesusta juj fariseo wasinman invitaran chaupi p’unchay mijunaman (Lucas 11:37, 38). Fariseokunaqa sapa mijunankupaqmi makinkuta kukuchunkukama maqchikuqku, Jesusmi ichaqa mana chayta ruwaqchu (Mateo 15:1, 2). Chay costumbre manaña Diospa kamachikuynin contrachu kasharan chaypas, manan Dioschu chaytaqa kamachiran.

Chay costumbreta Jesús mana ruwaqtinmi invitaqnin fariseoqa anchata admirakuran, chaymi Jesusqa niran: “Qankunaqa, fariseokuna, copatapas platotapas jawallantan maqchinkichis, sonqoykichismi ichaqa junt’a kashan munapayaywan mana allin kaqwan ima. ¡Mana yuyayniyoqkuna! ¿Manachu jawanta ruwaqqa ukhuntapas ruwallarantaq?”, nispa (Lucas 11:39, 40).

Jesusqa manan maqchikusqankuraykuchu anyasharan, aswanpas iskay uya kasqankuraykun. Fariseokunaqa manan sonqonkuta limpiaqkuchu mana allin kaqkunamanta, chaymi Jesusqa niran: “Tukuy sonqowan wajchakunaman qoychis, chhaynapin tukuy imaymanapi limpio kankichis”, nispa (Lucas 11:41). Chhaynaqa tukuy sonqomantan imatapas qonanku karan, manan jujkuna qhawanankupaqchu.

Chaymantapas Jesusqa niranmi: “¡Ay qankunamanta fariseokuna! Qankunaqa diezmotan qoshankichis mentamanta, rudamanta, huertapi plantakunamantawan, ichaqa manan Dios jinachu chanin kayta rikuchinkichis, nitaq paytapas munakunkichischu. Diezmotaqa qonaykichispunin karan, ichaqa manan juj ruwaykunatapas qonqanaykichischu karan”, nispa (Lucas 11:42). Chay tiempopi runakunaqa ima cosechasqankumantapas mijunata sumaqyachiq plantakunamantapas diezmotan qonanku karan (Deuteronomio 14:22). Fariseokunaqa junt’aqkun chay kamachikuytaqa, ichaqa manan junt’aqkuchu aswan importante kamachikuykunata (Miqueas 6:8).

Jesusqa nillarantaqmi: “¡Ay qankunamanta fariseokuna! Qankunaqa sinagogakunapipas ñaupaqllapin tiyayta munankichis, mercado plazakunapipas napaykunatan munankichis. ¡Ay qankunamanta! Qankunaqa mana rikukuq sepultura jinan kankichis, chay patantan runakunaqa purinku sepultura kasqanta mana yachaspa”, nispa (Lucas 11:43, 44). Chay sepulturakuna jinan fariseokunaqa jawallankumanta allin rikukuqku (Mateo 23:27).

Chayta niqtinmi juj allin yachaq runa Jesusta niran: “Yachachikuq, chayta nispaqa noqaykutawanmá k’amiwashankiku”, nispa. Jinan Jesusqa paytapas niran: “¡Ay qankunamantapas kamachikuy simita allin yachaqkuna! Llasa q’epikunatan runakunaman q’epichinkichis, qankunataq ichaqa mana ni juj dedollaykichiswanpas chay q’epikunata tupaykunkichischu. ¡Ay qankunamanta! Qankunaqa profetakunaq sepulturantan jatarichinkichis, ñaupa taytaykichiskunan ichaqa paykuna wañuchiqkuna karanku”, nispa (Lucas 11:45-47).

Chay ‘llasa q’epikuna’ nisqanqa Diospa kamachikuyninkunaman imaymana yapasqanku kamachikuykuna costumbrekuna iman karan. Chaykunawanmi paykunaqa runakunata sayk’uchiqku. Chaymantapas profetakunata wañuchiq ñaupa taytanku jinan paykunaqa karanku, chaymi aswan jatun profeta Jesustapas wañuchiyta munasharanku, ichaqa profetakuna respetaqmanmi tukuqku paykunapaq sepulturakunata jatarichispa. Chayraykun chay runakunaqa 70 watapi Diosman cuentata qoranku.

Chaymantapas chay yachachiqkunaqa runakunata yanapanankutaqa aswanmi jark’aqku  Diosmanta yachanankuta, chaymi Jesusqa niran: “¡Ay qankunamanta kamachikuy simita allin yachaqkuna! Qankunaqa Diosmanta yachay llavetan jap’ikapunkichis, qankuna kikiykichispas manan jaykunkichischu, jaykushaqkunatapas jark’ankichismi”, nispa (Lucas 11:52).

¿Imatan fariseokuna, kamachikuy simi yachachiqkunapas ruwaranku chhaynata Jesús anyaqtin? Imaymanamantan tapupayayta qallariranku, chhaynapi imapipas pantaqtin chay tumpalla carcelman wisq’achinankupaq.