WARANQANPI runakunan rinku Babiloniamanta Jerusalenman. Chayaqtinkun, Jerusalenqa raqayllaña kapusqa, manan pipas chaypi tiyaranchu. Yapamantan israelitakunaqa llaqtankuta hatarichinanku.

Ñawpaqtaqa altartan ruwanku. Chayqa sacrificiota Jehová Diosman haywanapaqmi. Killakuna qhepatan israelitakunaqa yupaychana wasi ruwayta qallarinku. Qayllankupi suyukunamanta awqankunan ichaqa, manchachinku llank’asqankuta tatichinankupaq. Kay awqakunan Persiapi mosoq kamachikuqwan huk kamachikuyta churachinku, Jerusalenpi yupaychana wasi ruwasqankuta sayachinankupaq.

Ñan 17 watakunaña pasan Babiloniamanta israelitakunaq lloqsimusqankumanta. Ageo, Zacarías profetankunawanmi Diosqa willachin yupaychana wasita hukmanta ruwanankupaq. Diospa yanapayninpi hap’ipakuspan kasukunku. Kamachikuy simiña hark’an chaypas, llank’aytan qallarinku.

Tattenay sutiyoq Persiapi oficialmi Jerusalenta rispa paykunata tapun, pinmi kamachirasunkichis yupaychana wasita sayarichinaykichispaq, nispa. Israelitakunan ninku Babiloniapi kamachiq Ciro nisqanta: ‘Jerusalenta kutispa Jehová Diosniykichispaq yupaychana wasita ruwamuychis,’ nispa.

Chaymi Tattenayqa Babiloniaman cartata apachispa tapun cheqaqtachu Ciro chayta niran nispa, Ciroqa ñan chay tiempopaq wañusqaña. Persiapi mosoq kamachikuqmi cartapi willachin cheqaq kasqanta. Kaytataq qelqaran: ‘Ama hark’aychischu israelitakunata Diosninkupaq yupaychana wasi ruwasqankuta. Aswanpas yanapaychis,’ nispa. Tawa watapin tukunku yupaychana wasi ruwayta, chaymi israelitakunaqa anchata kusikunku.

Ñan 48 wataña pasan yupaychana wasi tukusqankumanta. Jerusalenpi tiyaq runakunaqa wakchan kanku, chaymi yupaychana wasipas llaqtapas mana sumaqchu qhawarikun. Babiloniapi tiyaq Esdras sutiyoq israelitan uyarisqa Diospa yupaychana wasin allichanata necesitasqanta. ¿Imatan ruwan?

Persiapi Artajerjes kamachikuqpatan rin, chaymi kay allin kamachikuqqa imaymanakunata Esdrasman qon, Jerusalenman apananpaq. Babiloniapi tiyaq israelitakunatan nin regalokunata apaysinanpaq, chaymi yaqa 6.000 runakunapas riyta munanku. Askhatan apanku qoritapas qolqetapas, chaniyoq kaqkunatapas.

Esdrasqa llakikunmi ñanpi millay runakunaq kasqanmanta. Chay runakunaqa paykunata wañuchispan qoritapas qolqetapas qechunkuman. Chay raykun Esdrasqa runakunata huñun, kay dibujopi rikusqayki hina. Jehová Diosmantan mañakunku Jerusalenman chayanankukama pakaykusqa kanankupaq.

Jehová Diosqa pakaykunmi paykunata. Tawa killata purispan Jerusalenman allinlla chayanku. Kaymi yachachiwanchis, Jehová Diospi hap’ipakuqkunaqa pakaykusqa kananta.