Jesuspa apostolninkunaqa llaqtakunapi predicasqankumantan kutimurqanku manaraq 32 watapi Pascua Fiesta kashaqtin. Paykunaqa sayk’usqan kasharqanku, chaymi Jesusqa boteman wichachispa Bejsaida llaqtaman pusarqan, chaypi samanankupaq. Ichaqa lamar-qochaq cantonman chayashaqtinkun Jesusqa rikurqan waranqanpi runakuna qatikamusqankuta. Jesusqa munarqanmi apostolninkunawan sapaqllapi kayta, chaywanpas sumaqtan runakunata chaskirqan. Onqosqakunata qhaliyachispataq Diospa gobiernonmanta yachachirqan. Tardeyamuytan apostolninkunaqa Jesusta nirqanku: “Runakunaqa yarqaymantan kashanku, mijunata maskhamunankupaq kachapuy”, nispa.

Jesustaq nirqan: “Manan ripunankuchu, qankuna mijunata qoychis”, nispa. Apostolkunataq nirqanku: “¿T’antata rantimunaykutachu munanki?”, nispa. Felipetaq nirqan: “Qolqenchisña kanman chaypas, manan khaytukuypaqqa rantiyta atisunmanchu”, nispa.

Jesustaq tapurqan: “¿Kashanchu mijunaykichis?”, nispa. Andrestaq nirqan: “Pisqa t’antawan iskay challwallawanmi kashan”, nispa. Jesustaq nirqan: “Apamuychis t’antata challwatawan”, nispa. Jinan Jesusqa kamachirqan runakuna pisqa chunkamanta otaq pachajmanta tiyanankupaq. T’antata challwatawan jap’ispataq cielota qhawarispa Diosmanta mañakurqan. Jinaspa apostolkunata nirqan rakinankupaq. Chaypiqa 5000 qharikuna, askha warmikuna,  wawakuna iman kasharqanku, llapallankutaq sajsanankukama mijurqanku. Chay qhepamantaq apostolkuna puchusqanta juñumurqanku mana usunanpaq, jinan 12 canastakunata juñurqanku. Chayqa milagron karqan ¿riki?

Runakunaqa anchatan admirakurqanku, chaymi Jesusta rey kananpaq churayta munarqanku. Ichaqa manaraqmi tiemponraqchu karqan rey kananpaq, chaytan Jesusqa yacharqan. Jinan runakunata kachapuspa apostolninkunata boteman seqachirqan lamar-qochaq chimpanman rinankupaq. Jesustaq sapallan orqoman wicharqan Jehová Dioswan rimananpaq. Imaymana ruwanayoqña kashaspapas Dioswan rimananpaqmi tiempota orqorqan.