• NACESQAN WATA: 1963

• NACIONNIN: GRAN BRETAÑA

• HUK WILLAKUYKUNA: ESTUDIASQANTAM SAQIRURQA

ÑAWPAQ VIDAY:

Inglaterra nacionpim Londres llaqtapi nacerqani. Tayta-mamayñataqmi Centro America law San Vicentemanta. Ñuqaykuqa isqunmi karqaniku, Metodista sutiyuq religionniyuq mamay kaptinpas ñuqaqa religionninmantaqa manam imatapas yachaytaqa munarqanichu. Warmacha kaspayqa tukuymantam yachayta munarqani. Chaymi vacacionniypipas quchapa chimpampi tiyaykuspa achka librokunata leeq kani.

Colegioyta tukuruspayñataqmi wakcha hinaspa mana kapuqniyuq runakunata imachallawanpas yanapaykunaypaq tantiakururqani. Yanaparqanim mana wasiyuq runakunata, imawanpas unquq runakunata hinaspa imawanpas ñakariq runakunata. Chaymantañataqmi universidadpi estudiayta qallaykurqani, estudiayta tukuruspayñataqmi allin llamkayta tariruspa achka qullqita ganakuq kani. Chaymantañataqmi kikiypa negocioypiña wasillaymanta llamkarqani, chaypaqqa computadorallaytam servichikuq kani. Chaymi sapa kuti huklaw nacionkunaman viajaspay achka qullqipa chanin hotelkunapi samakuq kani, chaypiqa kaqmi ejercicio ruwanapaq makinakuna hinaspa masajistakunapas. Chayna kawsakusqaywanqa kusisqam karqani mana imaypas pisipuwaptin. Chayna kaptinpas ñakariqkunamanta hinalla llakikuspaymi yanapayta munarqani.

VIDAY CAMBIANAYPAQMI BIBLIA YANAPAWARQA:

Achka watakunam piensarqani: “Imapaqtaq kay pachapi kawsanchik”, nispa. Chayna kaptinpas bibliataqa manam haykapipas leerqanichu, 1999 watapim huk punchaw Margaret sutiyuq sullkay amiganpiwan watukaramuwarqa. Paykunaqa Jehova Diospa testigonmi kasqaku, Sullkaypa amiganqa kuyakuqllañam kasqa. Chayraykum biblia estudiayta chaylla qallaykurqani ichaqa achka llamkayniyuq kasqayraykum bibliamantaqa pisi-pisimanta yacharqani.

2002 watapiñataqmi astawanraq estudiarqani doctorado nisqanta hurqunaypaq. Chay watamantam Jehova Diospa testigonkunapa huñunakuyninmanqa warmachaypiwan kuska sapa kuti rirqaniku. Universidadpi estudiachkaspaypas manam yacharqanichu imanasqa ñakariykunawan sasachakuykuna kay pachapi kasqanmantaqa hinaspa haykapi chinkachisqa kananmantapas. Chaykunataqa yacharurqani bibliata estudiaspayñam. Bibliapi Mateo 6:24 nisqanmi allinta yanapawarqa. Chaypi nisqanman hinaqa manam iskay patronkunata serviytaqa atichwanchu, chaymi akllakunay karqa Dios serviyta utaq kapuqniyuq kawsakuyta. Ima ruwanaypaq akllakusqaywanmi kusisqa utaq manapas kawsakunay karqa.

2001 watapim huknin iñiqmasinchikpa wasinpi estudiarqaniku ¿Existe un Creador que se interese por nosotros? * niq qillqata. Chaypim yacharurqani kay pachapi ñakariykunatawan sasachakuykunataqa Jehova Dioslla allichananmanta, universidadpim ichaqa yachachiqku: “Kusisqaqa kawsakuchwan Diospi mana creespallam”, nispanku. Chayna nisqankuwanmi llumpayta hukmanyarurqani. Chaymi doctoradoyta hurqunaypaq estudiasqayta iskay killallamanta saqirurqani, hinaspam Jehova Diosmanta yachanaypaq astawan tiempochakurqani.

Ñawpaq vidayta saqinaypaqqa yanapawarqam Proverbios 3:5, 6 chaypim nin: ‘Tayta Diospiyá tukuy sunquykiwan hapipakuy, kikikipa yachayllaykipiqa amayá hapipakuychu. Tukuy ima ruwasqaykipipas tayta Diospi yuyaymanay, hinaptinqa paymi munasqanman hina kawsachisunki’, nispa. Profesionniyuq kaymanta, qullqisapa kaymanta hinaspa ancha riqsisqa kaymantaqa, Jehova Diosta riqsiymi aswan allinqa. Kay pachapaq Jehova Dios imakuna munasqanmanta hinaspa Jesus librawananchikpaq wañukusqanmanta yachasqaywanmi Jehova Diosllapaqña kawsakuyta munarqani. Chaymi 2003 watapi abril killapi bautizakururqani Jehova Diospa testigon kanaypaq, chaymantapacham kapuqllaywan kawsakunaypaqña tantiakurqani.

BENDICIONKUNA CHASKISQAYMANTA:

Jehova Diosmanta yachasqaywanmi kunanqa hawka hinaspa kusisqa kawsakuni. Ancha kusisqataqmi kani iñiqmasiykunawan kuska kaspaypas.

Bibliata estudiaspay hinaspa huñunakuykunaman rispaymi Diosmanta hinalla yachachkani, hinaspapas Diosmanta willakuytam munani. Chaymi 2008 watamanta julio killamanta Diosmanta astawan willakuchkani, Chaynata willakuspaymi runakunata yanapachkani kunan allinlla kawsakunankupaq, chaynataq hamuq punchawkunapi wiñaypaq kawsakunanpaq. Manam haykapipas kunan kusisqa kawsakusqayman hinaqa kawsakurqanichu. Chayna kawsakusqaymantam Jehova Diosta anchata agradecekuni.

• NACESQAN WATA: 1973

• NACIONNIN: AUSTRIA

• HUK WILLAKUYKUNA: QULLQIPAQ PUKLLASPA PURIKUQ

ÑAWPAQ VIDAY:

Australia nacionpim Braunau sutiyuq llaqtapi nacerqani, tayta-mamayqa catolico religionniyuqmi karqaku. Llaqtaypiqa manam suwa runakunaqa anchachu karqa.

1984 watapim chunka hukniyuq wataypi kachkaptiy, huk punchaw pukllasqaykumanta ratullanmanmi amistadniyta carro saruruptin wañukurqa. Paypa imayna wañukusqanta qawasqaymi llumpa-llumpayta hukmanyarachiwarqa, chaytaqa manam qunqayta atirqanichu achka watakunaña pasaruptinpas. Sapa kutim piensaq kani wañusqakuna maypi kasqankumanta.

Colegioyta tukuruspayqa electricistam karqani, chaymi llamkapakuyta qallaykurqani. Chaymanta qipallatam qullqipaq pukllaykunapiña puriq kani. Achka qullqiyta yanqachaspaypas manam qullqimantaqa usurqanichu. Pelotata haytaypim pukllaq kani, hinaspapas musicom karqani (heavy metal). Huchapakuypim puriq kani, hinaspapas trago tomananku wasimanmi hinaspa fiestakunamanmi riq kani. Munasqayman hina kawsakuspaypas manam kusisqachu karqani.

VIDAY CAMBIANAYPAQMI BIBLIA YANAPAWARQA:

1995 watapim yuyaqña iñiqmasinchik wasiyman chayaramuspan “Usted puede vivir para siempre en el paraíso en la Tierra” niq qillqata quykuwarqa. Chay qillqataqa chaskikurqani warma kaptiy wañukuq amistadniymanta hinallaraq llakisqa kaspaymi, chaypim yacharurqani wañukuptinchik ima pasawasqanchikmanta. Leerqaniqa manam chay yachachikuyllamantachu, aswanqa chay qillqapa lliw yachachikuyninkunatam.

Chay qillqapiqa manam yachay munasqallaymantachu yacharurqaniqa, aswanqa mana yachasqay yachachikuykunamantapas yacharurqanim. Tayta-mamayku catolico kasqankuraykum ñuqaykuqa Jesucristollapi creerqaniku. Bibliata estudiasqayraykum ichaqa yacharurqani Jesuspa taytan Jehova Diosmanta, chaynataq Jehova Diosqa yupaychaqninkunapa hichpallanpi kasqantapas (Mateo 7:7-11). Yacharurqanitaqmi llakipayawasqanchikmanta hinaspa nisqankuna cumpliq kasqanmanta. Chaymi bibliapa nisqankuna imayna cumplikusqanmanta astawan yachayta qallaykurqani. Chaykunamanta yachasqayqa allintam kallpanchawarqa iñiyniypi takyanaypaq.

Chayllam cuentata qukururqani Jehova Diospa testigonkunalla bibliamanta imam kaqta runakunaman yachachisqankutaqa. Jehova Diospa testigonkunapa qillqankunapi rikuriq llapallan textokunata copiaspaymi catolico bibliaypi maskaq kani. Bibliapi ima nisqanmanta astawan yachaspaymi, manaña iskayrayarqanichu Jehova Diospa testigonkunalla Dios kasukuq kasqankumanta.

Bibliapiqa yacharurqanitaqmi kamachikuyninkunata kasukunanchikta Dios munasqanmanta. Efesios 4:22-24 leeruspaymi entienderurqani ñawpa vidayta saqinaymanta, hinaspa musuq pachawan pachakuchkaq hina Diospa munasqanman hina allin ruwaypi takyanaymanta. Chayta yacharuspaymi huchapakuypiqa manaña purirqanichu, manañataqmi qullqipaqqa pukllarqanichu (1 Corintios 6:9, 10). Diospa nisqanman hina kawsakunaypaqqa Dios kuyaq runakunawanñam hukllawakunay karqa, manañam ñawpaq amistadniykunawanqa.

Ñawpa vidayta saqiyqa sasam karqa, ichaqa Jehova Diospa testigonkunapa huñunakuyninman rispaymi tarirqani allin amistadkunata. Hinalla bibliata estudiaspaymi yachasqaykunapipas yuyaymarqani. Tukuy chaykunam yanapawarqa ñawpaqpi imayna kawsakusqayta wiñaypaq saqinaypaq. 1995 watapim bautizakururqani Jehova Diospa testigon kanaypaq.

BENDICIONKUNA CHASKISQAYMANTA:

Kunanqa kapuqllaywanmi hawka kawsakuni. Manañataqmi ñawpaqpi hinachu imamantapas chayllaqa piñakuni. Qipakunaman imayna kanaymantapas manañam llakikunichu.

Anchatam kusikuni tukuy hinastinmanta runakunawan Jehova Diosta servisqayrayku. Paykunaqa ima sasachakuypiña kaspankupas anchatam kallpanchakunku hinalla Diosman sunqu kanankupaq. Kunanqa kusisqam tarikuni Jehova Diosllapaqña kawsakuspay, hinaspa runamasiykunamanpas paymanta willakuspay.

• NACESQAN WATA: 1963

• NACIONNIN: GRAN BRETAÑA

• HUK WILLAKUYKUNA: LLUMPAY HUKMANYASQALLAM KARQA

ÑAWPAQ VIDAY:

Inglaterra nacionpim nacerqani, ichaqa qanchis wataypi kachkaptiymi Australia nacionman aylluywan ripukurqaniku. Ñuqaykuqa manam kapuqniyuq runakunachu karqaniku, chayna kaptinpas manam imaykupas pisirqachu.

Mikunaykupaq, pachakunaykupaq kaptinpas manam kusisqachu ñuqaqa kawsakurqani. Llumpay hukmanyasqallañam karqani. Taytayqa llumpay sinkakuqllañam karqa, chaymi paywanqa mana parlaqpaschu kani. Tragota tomaruspan mamayta qaqchaptinmi piñakuspa hukmanyaq kani. Watakuna pasaytam, yacharurqani ñawpaqta Malasiapi soldado kaspan llumpay ñakarisqanta, chaymi cuentata qukurqani imanasqa chayna kasqanmanta.

Colegiopi kachkaspallayraqmi trago tomayta qallaykurqani. Chunka suqtayuq wataypi kaspayñataqmi colegioyta saqiruspay nacionniyta defiendenaypaq “Marina de guerra” nisqanman yaykururqani. Chaypi kaspaymi wakin drogakunata mallirurqani, chaypitaqmi cigarro pitaytapas yacharurqani hinaspapas llumpaytam tragota tomaq kani. Qallariypiqa sapa semana tukuytam tomaq kani, chaymantam ichaqa sapa punchawña.

Yaqa iskay chunka wataypi kachkaspaymi Dios kasqanmanta iskayrayarqani. Piensaqmi kani: “Dios kaspaqa ¿imanasqataq kayna ñakariykuna kananta saqin?”, nispay. Chayraykum qarawikunatapas qillqarqani mana allinkuna kasqanmanta Diosman tumpaspay.

Iskay chunka kimsayuq wataypi kachkaspayñataqmi marinero kasqaymanta lluqsikururqani. Chaymantam tukuypi llamkapakurqani, huklaw nacionkunamanpas rirqanim, chaywanpas manam kusisqachu karqani. Manam imapaqpas tantiakuqchu kani, nitaq imatapas ruwayta munaqchu kani. Wasiyuq, allin llamkayniyuq kanaypaqpas manam kallpanchakuqchu kani, aswanqa takikunata uyarispa tomakuyllapim karqani.

Polonia nacionpi kachkaspayñataqmi Auschwitz sutiyuq sitioman rirqani. Ñuqaqa uyarirqanim hatun guerra karuptin chay sitiopi runakunata ñakarichisqankumanta, chaymi chay sitiota qawaykuspay llumpayta llakikuspa hukmanyarurqani. Chaymi nirqani: “Runakunaqa imanasqataq llumpay mana allinkunata ruwanku”, nispay. Chay pampanta richkaptiymi wiqiypas atiparuwarqa, chaymi nirqani: “Imanasqataq tukuy kaykunaqa pasarqa”, nispay.

VIDAYTA CAMBIANAYPAQMI BIBLIA YANAPAWARQA:

1993 watapi Australiaman kutiramuspayñataqmi, ñakariykuna kasqanmanta, bibliapi ima nisqanta yachayta munarqani. Chaymanta qipallatam iskay Jehova Diospa testigonkuna wasiyman hamurqaku, hinaspam hatun huñunakuyninkuman invitawarqaku. Chay huñunakuyqa kanan karqa huk estadiopim, rinaypaqmi tantiakururqani.

Chay estadiomanqa iskay killa ñawpaqllatam pelota haytaypi pukllaqkunata qawaq rirqani, kunan riptiyñataqmi mana chay pukllaypi hinachu kasqaku. Jehova Diospa testigonkunaqa llapankum sumaq pachasqa hinaspa kuyakuqllaña kasqaku, warmachankupas hawkam tayta-mamankuwan kasqaku. Chawpi punchawta samaykuptiykum pachaknintin runakuna estadio pampapi tiyaykuspanku mikunankupaq yaykurqaku, maymi tiyasqankuman kaqlla kutimuspankuqa maymi mikusqankupiqqa manam ima basuratapas saqirqakuchu. Hinaspapas llapanku huk sunqulla kusisqa kasqankuta qawaspaymi admirakurqani, chayna kawsakuytam ñawpaqmantaraq ñuqapas munarqani. Chaypi yachachikuykunataqa manam yuyanichu, ichaqa kuyakuqllaña hinaspa llampu sunqu kasqankutaqa manam haykapipas qunqanichu.

Chay tutam primoypa willawasqanta yuyarirurqani, payqa bibliapa nisqanta hinaspa religionkuna imayna kasqantapas yacharqam, pasaq watakunapim niwarqa: “Jesuspa nisqanman hinaqa, Dios kasukuq runakunaqa sutillam imayna kawsakusqankupi”, nispa (Mateo 7:15-20). Chayta yuyarispaymi yachayta munarqani Jehova Diospa testigonkunaqa, imanasqa kuyakuqllaña hinaspa hawka kawsakusqankumanta. Chaykunapi piensaspaymi tumpata kusirikurqani.

Qatiqnin semanatam chay hatun huñunakuyman rinaypaq niwaqniy testigokuna kaqmanta watukamuwarqa. Bibliata paykunawan estudianaypaq niwaptinmi estudiayta qallaykuspay huñunakuykunamanpas rirqani.

Bibliata estudiaspaymi yacharurqani Dios imayna kasqanmanta. Yacharurqanim Diosqa imawanpas mana ñakarichiwasqanchikmanta, aswanqa ñakarisqanchikta qawamuspan llumpay llakikusqanmanta (Genesis 6:6; Salmo 78:40, 41). Chaymi sunquypi nikurqani Diosta manaña llakichinaypaq. Aswanqa kamachisqanta ruwaspa sunqun kusichiytam munarqani (Proverbios 27:11). Chayraykum cigarro pitayta, trago tomayta hinaspa huchapakuypi puriytapas saqirurqani. Hinaspam 1994 watapi marzo killapi, Jehova Diospa testigon kanaypaq bautizakururqani.

BENDICIONKUNA CHASKISQAYMANTA:

Hawka hinaspa kusisqañam kunanqa kachkani. Ñawpaqtaqa tragota tomaspam llakiykunata qunqariq kani. Kunanqa ima llakiytapas Jehova Diosman saqispaymi hawkaña kawsakuni (Salmos 55:22).

Chunka watañam casarasqa kachkani Karen sutiyuq kuyayllapaq testigowan, hinaspa paypa warmachan Nellawan. Kimsaykum kallpanchakuchkaniku Jehova Diosmanta runakunaman astawan willakunaykupaq hinaspa yachachinaykupaq. Kunanqa manañam hukmanyasqañachu kani, kusisqañam kawsakuni.