“Diosqa munan mana [...] huchapakuq kanaykichiktam.” (1 Tesalonicenses 4:3)

¿IMATAM RUNAKUNA NINKU?

Wakin llaqtakunapiqa manaraq casarakuchkaspa puñunankuta hinaspa mozo-sipaskuna llapchapayanakusqankutam allinpaq qawanku.

¿IMATAM BIBLIA NIN?

Diosqa serviqninkuna ‘mana huchapakuq kanankutam’ munan (1 Tesalonicenses 4:3). Huchapakuymanta Bibliapi rimaspanqa, manaraq casarakuchkaspa llapchanakuymantawanmi rimachkan. Kay ruwayqa pierdekuy, layqa ruway, machakuy, taytacha-mamachakuna yupaychay, runa wañuchiy hinaspa suwakuy huchakuna hinam (1 Corintios 6:9, 10; Apocalipsis 21:8).

¿IMANASQAM KAYMANTA YACHANAYKI?

Bibliam nin: “Huchapakuqkunataqa Diosmi juzganqa”, nispa (Hebreos 13:4). Diosta kuyasqanchikraykum astawanqa chaymanta yachananchik, chaytam qawachinchik huchapakuymanta kamachikuyninta kasukuspanchik (1 Juan 5:3). Diosqa yanapanmi kamachisqanta kasukuqkunataqa (Isaias 48:18).

“Amañayá rimayllapas rimariychikchu huchapakuymantaqa chaynataq manaña rimana huchakunamantapas nitaq qollqella kuyaymantapas.” (Efesios 5:3)

¿IMATAM RUNAKUNA NINKU?

Mana casarasqa warmi-qari mana puñuspanku llapchanakuyninkuqa manam imananchu nispam achka runakuna ninku.

¿IMATAM BIBLIA NIN?

Huchapakuymanta Biblia rimaspanqa manam mana casarasqa warmi-qari puñuyllamantachu rimachkan, aswanqa millakuypaq kaqkunamanta hinaspa penqakuypaq ruwaykunamantam rimachkan (2 Corintios 12:21). Chaynaqa manamá mana casarakuspa warmi-qari puñuyllachu nitaq hukwan pierdekuyllachu Diostaqa sientichin.

Bibliam nin warmi-qari puñuywan lluchkapayanakuyqa casadokunallapaq kasqanta. Nintaqmi chay mana allinkuna munapayaytaqa Dios cheqnisqanta (1 Tesalonicenses 4:5). Kaypi piensariy, noviokunam tantearunmanku mana puñunankupaq, ichaqa tantearunkum llapchapayanakunallankupaq. Chay ruwayqa mana allinkunata munapayayñam, manaraq casarasqa kasqankurayku. Diosqa manam allintachu qawan chay ruwaykunataqa (Efesios 5:3-5).

“Amamá huchapakunkichikchu.” (1 Corintios 6:18)

¿IMANASQAM KAYMANTA YACHANAYKI?

Bibliapa nisqanman hinaqa, manaraq casarakuchkaspa warmi-qari puñuyqa Dioswan amistadninchiktam yanqacharunman (Colosenses 3:5, 6).

¿IMATAM BIBLIA NIN?

1 Corintios 6:18 nin: “Amamá huchapakunkichikchu”, nispa. Kay huchaman mana wichiykunapaqqa chayman aysawaqninchik kaqkunamantam karunchakunanchik (Proverbios 22:3). Chaypaqqa Diospa kamachikuyninkunata mana kasukuq amistadkunamantam karunchakunanchik. Bibliam nin: “Yachayniyoq runakunawan juntanakuspaykiqa yachayniyoqmi kanki. Sonso runakunawan juntanakuspam ichaqa sasachakuypi kanki”, nispa (Proverbios 13:20).

Mana allin piensaykunawan yuyayninchikta huntachiptinchikqa huchapakuymanmi aysaykuwachwan (Romanos 8:5,6). Chaymi huchapakuymanta rimaq takikunata, videokunata, librokunata, revistakunata hinaspa imapas kaykunaman rikchakuqtaqa mana yanqallapas qawanachu nitaq uyarinachu (Salmo 101:3).