¿YAQACHU Jesusqa Jehova Diosta agradecekurqa wawa kaptin wañuymanta harkasqanta yacharuspan?... ¿Joseytawan Mariatapas agradecekunmanchu karqa Egiptoman pusaspa wañuymanta ayqichisqankuta yacharuspan?...

Jesusqa manam kay pachapiñachu nitaq wawachañachu kachkan. Ichaqa, ¿imaynataq runakunapaqqa kachkan?... Achka runakunapaqmi Jesusqa wawallaraq kachkan, chaymi navidad fiestapi Jesustaqa yuyarinku artesapi puñuchkaq wawachata hinalla.

Ichaqa, ¿imaynataq Jesusqa kachkan?... Dios kawsarirachiptinmi hanaq pachapi kamachiqña kachkan. Hinaptinqa, ¿yaqachu imallapipas yanapawachwan?... Arí, yanapawachwanmi. Kay pachapi kachkaspanpas qatiqninkunatam yanaparqa. Yachaykusunyá botepi kachkaptinku qatiqninkunata imayna yanapasqanmanta.

Huk punchawmi Jesusqa Galilea hatu-hatun quchapa patanpi tukuy punchaw runakunata yachachichkarqa, tutayaruptinñataqmi  qatiqninkunata nirqa: “Hakuchik quchapa wak law chimpanman”, nispa. Chaymi boteman siqaspanku chimparqaku, Jesusñataqmi pisipasqallaña kaspan botepa qipanpi sawnakuykuspan miskillataña puñuchkarqa.

Qatiqninkunañataqmi boteta apasqankurayku mana puñurqakuchu. Chayna hawkalla richkaptinkum qunqayllamanta wayrakamuyta qallakuykurqa. Llumpa-llumpayta wayrakuptinmi lamar quchapas aywityayta qallakuykurqa, hinaptinmi botemanpas yaku huntaykuchkarqaña.

Chaymi qatiqninkunaqa manchakuyllawanña kachkarqaku, Jesusñataqmi miskillataña puñukuchkarqa. Hinaptinmi qatiqninkunaqa qaparispa nirqaku: “¡Yachachikuq, yachachikuq, wañuy patapiñam kachkanchik!”, nispa. Jesusñataqmi chaylla hatariruspan wayratawan lamar quchata qaqchaspan nirqa: “¡Upallaspayki hawkayay!”, nispa.

Hinaptinmi suma-sumaqta wayrapas hinaspa lamar quchapas hawkayarurqa. Chaymi Jesuspa  qatiqninkunaqa wamaq chayta rikurusqankurayku qawanakuspa ninakurqaku: “¿Pitaq kay runaqa kanman wayratapas, lamar quchatapas kamachiptin kasunanpaqqa?”, nispa (Lucas 8:22-25; Marcos 4:35-41).

Qampaqqa, ¿pitaq Jesusqa?... ¿Imanasqataq Jesusqa ancha atiyniyuq karqa?... Chayraykum qatiqninkunaqa mana manchakunankuchu karqa Jesuswan kuska kasqankurayku. Jesusqa ancha atiyniyuq kasqanraykum runapa mana ruway atinankunata ruwarqa. Kunanñataq willasqayki kaqlla chayna llumpay wayra kaptin qatiqninkunarayku Jesuspa ima ruwasqanmanta.

Huk kutipim Jesusqa qatiqninkunata kamachirqa lamar quchata chimparuspa wak law chimpapi suyachkanankupaq. Payñataqmi urquman rirqa sapallanpi taytanta mañakunanpaq.

 Qatiqninkunañataqmi boteman siqaruspanku richkarqaku. Hinaptinmi manaraq unayta richkaptinku wayrakuyta qallaykurqa. Tutañam karqa, hinaptinmi Jesuspa qatiqninkunaqa boteta wayra mana aysakachananpaq botepa tolderanta huñururqaku. Qucha patanman chayanankupaq tukuyta ruwaptinkupas wayraqa qipamanmi botetaqa kutichiq. Llumpayta wayrakuptinmi yakupas boteman yaykuptin boteqa chinkaykuqraq manaraq.

Jesusqa unayñam urqupiqa kachkarqa. Ichaqa qatiqninkuna sasachakuypi kasqankuta musyaruspanmi chaylla yanapaqnin rirqa, hinaspanmi lamar quchaman chayaruspan aywityachkaq yakupa hawanta paykunapa kasqanman rirqa.

¿Atiwaqchu yakupa hawanta puriyta?... Yakuman chinkaykuspachiki hiqiparuwaq. Jesusmi ichaqa mana chinkaykurqachu atiyniyuq kasqanrayku. Chaymi yaku hawallanta botepa kasqankama rirqa karupiraq kachkaspanpas. Chayqa karqa achikyaykuqtañam. Qatiqninkunañataqmi rikuruspa mana imanakuytapas atispanku mancharikuspa qaparirqaku. Jesusñataqmi nirqa: “¡Ama manchakuychikchu! Ñuqam kani, kallpanchakuychikyá”, nispa.

Chaynata niykuspanmi Jesusqa boteman qispiykurqa. Hinaptinmi wayrapas lamar quchapas chaylla hawkayarurqa. Chaywanmi qatiqninkunaqa mana ima niytapas atispanku Jesuspa ñawpaqninpi kumuykuspa nirqaku: ‘Chiqaptapunim qamqa Diospa churin kasqanki’, nispa (Mateo 14:22-33; Juan 6:16-21).

Mayna kusikuypaqya karqa Jesuspa tukuy chaykuna ruwasqanta qawayqa ¿aw?... ¿Imanasqataq Jesusqa chaykunata ruwarqa?... Qatiqninkunata kuyaspan yanapayta munasqanraykum hinaspa atiyniyuq kasqanta qawachiyta munasqanraykum. Chayqa yachachiwanchikmi hamuq punchawkunapipas tukuyta  ruwaspan yanapawananchikmanta.

Kunanpas Jesusqa atiyninwanmi yanapawanchik satanas harkakuptinpas Diosmanta hinalla willakunanchikpaq, ichaqa manaraqmi yanapawanchikchu unquykunamanta hampiwananchikpaqqa nitaq unquykunamanta harkaykuwananchikpaqqa. Jesusqa manam qatiqninkunatapas wañuymantaqa harkaykurqachu. Chaymi Juanpa wawqin Santiagopas wañuchisqa karqa hinaspa kikin Juanpas presochasqa karqa (Hechos 12:2; Apocalipsis 1:9).

Chaynam kunanpas runakunaqa unquqlla utaq wañuqlla kanchik Diosta serviq utaq mana serviq kaspapas. Ichaqa kay pachata Jesus kamachiptinqa manañamá ima ñakariypas kanqañachu. Diospa kamachisqanta kasukuq runakunaqa hawkañam kawsakunqaku (Isaias 9:6, 7).