¿LLAMKAYTACHU icha pukllakuytachu munawaq?... Arí, pukllakuypas allinmi. Bibliapas nirqam Jerusalen llaqtapa ‘plazankunapi pukllaq qari wawakunawan hinaspa warmi wawakunawan huntarinanmanta’ (Zacarias 8:5).

Jesuspas kusikurqam warmachakunata pukllaqta qawaspanqa. Ichaqa hanaq pachapiraq kaspan ima ruwasqanmantam nirqa: ‘Diospa ruwaysiqnin maestro hinam ñuqaqa karqani, tukuy tiempom Diospa ñawpaqninpi kusikurqani. Runakunaraykum ñuqaqa anchata kusikurqani’, nispa. Kay nisqanwanmi yachanchik Jesusqa Dioswan kuska hanaq pachapi llamkasqanmanta. Yachanchiktaqmi runakunata  hinaspa warmachakunata anchata kuyasqantapas (Proverbios 8:30, 31).

Chayna kaptinpas warmacha kaspanqa, ¿imallawanpas Jesusqa pukllanmanchu karqa?... Yaqapasmi. Ichaqa hanaq pachapi Diospa ruwaysiqnin maestro kachkaspanqa, ¿manachum kay pachapipas llamkanman karqa?... Arí, llamkarqam. Chaymi paytaqa riqsirqaku “carpinteropa churin” nispa, riqsirqakutaqmi “carpintero” nispapas. ¿Imatam chaywan yachanchik?... Joseyqa carpintero kayta Jesusman yachachisqantam, chaymi Jesusqa carpintero karqa (Mateo 13:55; Marcos 6:3).

¿Imayna carpinterotaq karqa?... Sichum hanaq pachapi Diospa alli-allin ruwaysiqnin  maestro kachkaspanqa, kay pachapipas carpintero kaspanqa alli-allin carpinterochiki karqa ¿aw?... Ichaqa sasam karqa Jesuspa tiemponpi carpintero kayqa. ¿Imanasqa? Carpinterokunaqa kikinkum sachakunata maskaqku, kuchupaspa wasinkuman apaqku hinaspa mesakunata, sillakunata utaq imakunatapas ruwaqku.

¿Kusisqachu Jesusqa chayta ruwanman karqa?... ¿Kusisqachu qamqa suma-sumaq mesakunata, sillakunata utaq imakunatapas ruwawaq?... Bibliapiqa ninmi ‘llamkasqanchikmanta kusikuy’ allin kasqanta. Chaymi ima llamkaypas anchata kusichiwanchik pukllayllapi kanamantaqa (Eclesiastes 3:22).

Llamkaspaqa hawkam kawsakusun. Ichaqa achka warmakunam televisionllata qawakuspanku utaq pukllaylla-pukllakuspanku qilla-qilla rikurirunku. Paykunaqa manam kusisqachu kawsakunku nitaq runamasinkutapas kusichinkuchu. Chaynaqa, ¿imatam ruwachwan kusisqa kawsakunapaqqa?...

17 kaq yachachikuypim yachamurqanchik hukkunaman imatapas quy utaq paykunapaq imatapas ruway kusichiwasqanchikmanta (Hechos 20:35). Jehova Diosqa ‘kusikuq Diosmi’ (1 Timoteo 1:11). Chaymi Proverbios qillqapi qawamusqanchikman hina Jesuspas ‘Diospa ñawpaqninpiqa kusisqallaña’ karqa. ¿Imanasqa?... ‘Taytan hina hinalla llamkasqanraykum’ (Juan 5:17).

Jesusqa carpintero kaymantapas aswan hatun llamkayniyuqraqmi karqa. ¿Imataq chay llamkayqa karqa?... Runakunaman Diosmanta willakuymi, chaymi nirqa: “Diospa munaychakuyninmanta sumaq willakuytaqa willakunaymi, chaypaqmi ñuqataqa kachamuwarqa”, nispa (Lucas 4:43). Runakunaman Diosmanta willakuptinqa, chay uyariqnin runakunapas yachasqankutam hukkunaman willakuqku. Chaytam kay Samaria llaqtayuq warmipas ruwarqa (Juan 4:7-15, 27-30).

 ¿Tukuy sunquwanchu Jesusqa chay llamkayta ruwarqa?... Arí, chaymi nirqa: “Ñuqapa mikuyniyqa kachamuwaqniypa munayninta ruwaymi hinaspa kamachiwasqanta tukuymi”, nispa (Juan 4:34). ¿Kusikunkichu munasqayki mikuyta mamayki yanukuruptin?... Chayna kusisqallañam Jesuspas karqa Diosmanta runakunaman willakuspanqa.

Diosqa unanchawarqanchik ‘llamkaspa kusisqa’ kawsakunapaqmi. Chaymi warmaraq kaspa kusisqa llamkayta yachaspaykiqa hatunña kaspaykipas kusisqa llamkanki (Eclesiastes 5:19).

Ichaqa manam kunan warmaraq kaspayki hatun runa hina llamkanaykitachu nichkanchik, aswanqa llamkachkaq hina imapipas yanapakunaykimantam. Tayta-mamaykiqa maynataya llamkanku imaykimantapas mana ususqata uywasunaykipaqqa hinaspa wasiyuq kanaykipaqqa. Wasikipipas tukuytachá ruwanku wasiki mana qachallaña kananpaqqa.

¿Imakunata ruwaspataq paykunata yanapawaq?... Camaykita mastaspa, qachallaña kaq platokunata hinaspa mankakunata mayllaspa, chaynataq wasikita pichakuruspa utaq pukllanaykikunata maymi kananman churaruspam. Sichum chaykunata ruwachkankiña hinaspaqa allintam ruwachkanki.

¿Imanasqataq ancha allin kanman pukllayta tukuruspa pukllanaykikunata maymi kananman churayniki?... Chayta ruwaptikiqa wasikim sumaq allichasqa kanqa, manataqmi pipas chaykunata saruruspaqa urmarunqachu. Sichu pukllanaykikuna pampapi kanqa hinaptinqa ichapas huk kaqninta mamayki chaykunawan urmaruptin hospitalmanraq apana kanqa. Chayqa llakikuypaqmi kanman ¿aw?... Chaymi pukllanaykikunata huqariynikiqa ancha allin.

 Warmakunaqa escuelapi tareankutapas ruwanankum. Escuelapi tareakunaqa allintam yanapawanchik leeyta yachanapaq. Chay ruwayqa wakinpaqqa sasam, wakinpaqmi ichaqa mana. Qampaq sasa niraq kaptinpas maypacha leeyta yacharuspaykiqa tukuy imatam yachanki hinaspam kusisqa kanki. Chaymantapas kikikiñam biblia leeyta yachanki. Chaynaqa tareaykikunata ruwayqa ancha allinmi ¿aw?...

Wakin runakunaqa manam llamkaytaqa munankuchu. Ichaqa llamkanapaq Diosninchik unanchawasqanchikraykum kallpanchakunanchik llamkaspa kusisqa kananchikpaq. ¿Jesusqa kusisqachu llamkasqanwan karqa?... Arí, kusisqam karqa. ¿Imataq chay llamkayninqa karqa?... Runakunaman Jehova Diosmanta willakuymi hinaspa imayna wiñay kawsayta haypanamanta yachachiymi.

Qampas ruwasqaykikunawan kusisqa kanaykipaqqa tapukuwaqmi: “¿Imanasqataq kaytaqa ruwanay?” nispa. Chaymanta allinta yachaspaykiqa sasaña kaptinpas kusisqallañam ruwanki. Hinaspam Jesus hina ima ruwasqaykiwanpas kusisqa kanki.