1. David ¿imara sintica Jehová Diosmanda shinallara imara chi sintishcara rurachica?

 REY DAVID quillcaca: “Jehová atunmari an, pailla valijmi alabashca tucungajpas” (Sal. 145:​3). Pai Jehová Diosta llaquica chiraigu “congregación chaupi shungüi” alabacami (Sal. 22:22; 40:​5). Ñucanchis shinallara Jehová Diosta llaquinchi chiraigu David rimashca cuinta iyanchi: “Jehová, can alabashca tucungui unai unaigama, Israel ñucanchi yayapaj Dios” (1 Crón. 29:​10-13).

2. a) ¿Imasnara Jehová Diosta alabana ushanchi? b) ¿Imara huaquin huauquiunara pasanun, shinashas imara ricungaraunchi?

² Cuna Jehová Diosta alabana ushanchi tandarinaunai maquira aisasha rimasha, shinajpis ashca huauqui paniunaras shinzhi ricurin. Maquira aisasha rimangaj munanun shinajpis mana aisanun. ¿Imasnara cai manzhaira vinsina ushanun? Maquira aisasha animachij rimashcaunara cungaj ¿imara yanapana ushan? Cai tapuigunara manara cutipashcallaira ricushun chuscu iyaiguna imarasha tandarinaunai maquira aisasha rimanchi.

3-5. a) Hebreos 13:15 nishca shina ¿imarasha tandarinai comentana anchi? b) ¿Imarasha yachanchi Jehová Dios mana chapan chi tunu comentariogunallara tucuiguna cunuchu?

³ Jehová Dios ñucanchima valij ruranara cuca: paita alabana ushanchi (Sal. 119:108). Tandarinai maquira aisasha rimasha Diosta ‘alabana sacrificio’ an, mana pis ñucanchi randimanda caita rurana ushan (leai Hebreos 13:15). ¿Jehová mañanzhu tucuiguna chi tunu sacrificiollara chi tunu comentariogunallara cungaj? Mana.

⁴ Caran tunu shu shuj ruranara, pasaushcaras Jehová yachanmi chiraigu ñucanchi ushashca tupu ruranara valichinmi. Israelitagunamanda caran tunu sacrificiogunara Jehová chasquishcara ricushun. Ushajcuna shu burigu o shu chivu cunuj aca. Shinallara pugriuna ishqui ichilla palomaguna cuna ushanuj aca. Shinajpis cai ishqui pishcuunara mana cuna ushajpis ansa ali harina pulvura cushcara Jehová chasquica (Lev. 5:​7, 11). Harina mas barato ajpis Yaya Dios cai sacrificiora valichij aca shinajpis pai caita chasquichu ali harina pulvu ana aca.

⁵ Yaya Dios cuna shinallara iyasha catin. Ñucanchi tandarinai maquira aisasha rimanai, Jehová Dios mana chapan ñucanchi ali yapajta ali gustu rimanuchu Apolos cuinta o quirichij shimiunahua Pablo cuinta (Hech. 18:24; 26:28). Pai munanmi ñucanchi ushashca tupu rurachu. Iyarishun ishqui ichilla cullqui palara cuj huaccha huarmira. Cai huarmi tucui charishcara cushcamanda Jehová Dios chasquicami (Luc. 21:​1-4).

6. a) Hebreos 10:24, 25 nishca shina ¿imara rurana ushan tandarinai uyashca comentarioguna? b) ¿Imasnara ricuchina ushangui huauqui paniuna cutipashcaunara valichishcara?

⁶ Ñucanchi rimashcaunahua parijumanda animarinchi (leai Hebreos 10:24, 25). Ali gustu caran tunu rimashcaunara uyangaj munanchi. Imasna huahuauna maquira aisasha shungumanda ansahualla rimanun, cai rimashcauna ñucanchira cushiyachin. Maicambas mushuj intindishcara rimajpi, manzhai charijcunas maquira aisasha rimanujpi o shu mushuj shimira yachaujcuna rimanujpi cushi sintirinchi (1 Tes. 2:​2). ¿Imasnara paiguna ursarishcaunara valichina ushanchi? Tandarina huasha paigunara pagarachuna ushanchi maquira aisashcamanda shinallara paiguna comentarioguna ñucanchiras animachishcamanda. Ñucanchis maquira aisana ushanchi rimangaj. Casna rurasha ñucanchi animachishcara chasquishun shujcunaras animachishun (Rom. 1:​11, 12).

7. Comentana ¿ima tunu yanapana ushan?

⁷ Maquira aisasha rimana yanapanmi (Is. 48:17). ¿Imasnara? Shuj, tandarinai maquira aisana munashaga tandarinara mas ali puruntuchishun, Diospa Shimira mas ali intindishun, mas yachachishcaunara ñucanchi causaibi pactachishun. Ishqui, casna rurashaga tandarinara mas ali uyashun yachangaraushcara munashcamanda. Quinsa, maquira aisasha rimangaj ursarina ministirishcamanda rimashcauna ñucanchi iyaibi saquiringa.

8, 9. a) Malaquías 3:​16 nishca shina ¿iyanguichu imasna Jehová Dios ricun comentangaj ursarishcara? b) Shina ashas ¿imasnara huaquinguna sintirina ushan?

⁸ Jehová munanmi ñucanchi quirinara ricuchichu. Ñucanchi tandarinai maquira aisasha rimangaj ursarishcaunara Jehová Dios uyanmi valichinmi, caita sirtu pacha quirinchi (leai Malaquías 3:16). Astaumbas ñucanchira llaquishcara ricuchingaj bendicianmi (Mal. 3:10).

⁹ Ña ricushcanchi imarasha tandarinai maquira aisasha rimana ashcara. Shinajpis maicanguna chara manzhaira charinun. Cambas manzhaira charisha ama desanimarichu. Ricushun maican Bibliamanda iyaigunara, ejemplogunara, camachishcaunaras tandarinai maquira aisasha rimangahua.

10. a) ¿Maicambi imara sintinchi? b) ¿Imarasha ninchi comentangaj manzhai charina ali ashcara?

¹⁰ ¿Tandarinai maquira aisasha rimangaj camba shungu du saquirishcachu? Mana canlla shina sintishcanguichu. Ñacas tucuiguna shinallara manzhaira charishcanchi comentangahua. Shinajpis manzhaimanda mana comentana ushashaga riparana angui imarasha shina sintishcangui. ¿Rimanara cungaringuichu? ¿Iyashcanguichu camba comentarioguna shujcuna rimashcasna mana yapa ali anga nisha? Manzhaira charina alimi, cai ricuchin can mansu shungu ashcara shinallara shujcunamanda can mana yali sintirishcara. Mansu shunguyuj ajcunara Jehová yapa gustan (Sal. 138:​6; Filip. 2:​3). Shinallara Jehová munanmi ñucanchi tandarinai paita alabanuchu ñucanchi huauqui paniunaras animachichu (1 Tes. 5:11). Jehová canda llaquin, mana manzhaira charingahua yanapanga.

11. ¿Ima Bibliamanda iyaiguna ñucanchira yanapanga?

¹¹ Ricushun maican Bibliamanda iyaigunara. Diospa Shimi ñucanchira iyarichin tucuiguna rimashcai pandarinchilla (Sant. 3:​2). Jehová Dios huauqui paniunas mana chapanun ñucanchi mana ima huras pandarichu (Sal. 103:​12-14). Ñucanchi aillu anun ñucanchira llaquinunmi (Mar. 10:​29, 30; Juan 13:35). Paiguna intindinunmi huaquimbi ñucanchi munashca cuinta mana rimana ushashcara.

12, 13. Nehemías, Jonaspas ejemploguna ¿imara yachachin?

¹² Ricushun huaquin Bibliamanda iyaigunara ñucanchi manzhaira vinsingahua. Iyarishun Nehemías runai, pai shu rey apura sirvica. Jerusalemba punguuna quinzhauna huajlirishcara uyasha Nehemías llaquirica (Neh. 1:​1-4). Iyarina ushanchi imasna Nehemías manzhai sintirishcanga imarasha llaquirishca angui nisha rey apu paita tapujpi. Nehemías manara cutipashcallaira Yaya Diosta mañaca. Casna rurashcamanda cai rey Diospa llactara ashcara yanapaca (Neh. 2:​1-8). Nehemías rurashca ñucanchira yachachin manara cutipashcallaira Yaya Diosta mañana ashcara. Jonás pasashcara iyarishun. Ninivitagunara camachichu nisha Jehová Dios Jonasta mandajpi Jonás manzharisha shuj partima rica (Jon. 1:​1-3). Shinajpis Dios yanapaihua paihua tarbanara pactachica shinallara pai rimashcauna ninivita runaunara ashcara yanapaca (Jon. 3:​5-10). Jonás pasashca yachachin ñucanchi ashca manzhaira charijpis Jehová Dios yanapana ushan paita sirvingahua. ¿Manzhu ñucanchi huauqui paniuna mana anun ninivita cuinta paigunara manzhangahua?

¹³ Huauqui paniunara ñucanchi comentariogunahua animachingaj ¿ima camachishcauna ñucanchira yanapanga? Ricushun huaquin camachishcaunara.

14. a) Tandarinaunara ¿imarasha purunturina anchi? b) ¿Ima huras purunturina ushanchi?

¹⁴ Tucui tandarinaunara purunturishun. Ñucanchi horarioi timpura llucchisha purunturingahua mana manzhaihua comentariogunara cushun (Prov. 21:​5). Caran shuj, shuj tunu horario charinchi. Eloise, 80 huata charij huaccha huarmi semana callarishcai La Atalaya quillcara estudian. Pai nin: “Ashca punzhauna pishishcallaira purunturisha tandarinaunara, ñucara yapa gustahuan”. Joy nishca pani, intiru punzhauna tarbashcamanda tandarina uyana shu punzha pishishcallaira Atalaya quillcara purunturin yachashcara ama cungaringahua. Ike, precursor an shinallara anciano ashcaraigu ashca tarbanara charin, pai nin: “Tucuira estudiana randi ansa ansa estudiana ñucara yanapan”.

15. ¿Imasnara ali purunturinchi tandarinara?

¹⁵ ¿Imasnara ali purunturinchi tandarinara? Punda Jehová Diosta espíritu santu mañana anchi (Luc. 11:13; 1 Juan 5:14). Huasha, ricushun intiru temamanda ima yachangaraushcara. Leashun temara, subtemagunara, fotogunara, recuadrogunaras. Huasha caran párrafo estudiasha ushashca tupu tucui textogunara leashun. Leashcara iyarishun shinallara maquira aisasha rimangaj iyaigunara mas riparashun. Leashcara ali estudiajpi ñucanchira yanapangami shinallara maquira aisasha rimana ushanalla anga (2 Cor. 9:​6).

16. ¿Imara charingui ali yachangahua, imasnara utilizangui?

¹⁶ Tiaj yanapaigunara utilizashun. Ali puruntuchingahua Jehová Dios paihua organizacionhua ashca yanapaigunara cushca internetmanda llucchingaj. JW Library^® nishca aplicación yanapanmi internetmanda llucchisha estudiana publicaciongunara ñucanchi telefonoi, tabletai charingahua. Shina publicaciongunara estudiana, leana, uyanas ushanchi ima huras, maibi ashas. Maicanguna cai aplicación utilizanun estudiangaj escuelai, tarbanai micuna huraspi o shuj partima riushcai. Shinallara cai programa Watchtower Library shinallara INTERNETPI BIBLIOTECA Watchtower^™ nishcas yanapana ushan mas estudiangahua.

17. a) ¿Imarasha ali an ashca comentarioguna purunturina? b) ¿Imara yachacangui Jehovahuaj amigo tucui: Tandarinai cutipangaj ali purunturi nishca videomanda?

¹⁷ Ushashaga rimangahua ashca comentariogunara purunturishun. ¿Imarasha? Maquira aisashas mana tucui rimana ushangaraunchi. Shinallara shujcuna maquira aisanujpi yachachij paigunaras ajllanga mana ñucanchiras. Astaumbas La Atalaya quillcara yachachij huaquingunallara rimachu ajllanga timpu mana pasangahua. Chiraigu mana piñarina, mana desanimarina anchi punda parrafogunai mana comentana ushashcamanda. Mas comentariogunara purunturina yanapanga mas rimangaj. Bibliamanda shu texto leana, shungumanda rimangaj purunturina ushanchi. b

18. ¿Imarasha comentashcai ansalla rimana anchi?

¹⁸ Comentashcai ansalla rimashun. Ansalla shimiunahua comentarioguna cusha huauqui paniunara mas animachin. Chiraigu ursarishun ñucanchi comentarioguna treinta segundogunahualla unayachu (Prov. 10:19; 15:23). Ashca ministirishca an tandarinai ashca huatauna participajcuna cai tunu ruranuchu. Paiguna ashca unayaj comentariogunara cunujpi shujcuna “mana comentana ushashachu paiguna cuinta” iyasha, maquira mana aisana munanunga. Comentashcai ansalla rimajpi shuj huauqui paniuna lugar charinunga comentangahua. Parrafoi punda comentario cusha intindinalla pasajta rimana anchi, mana parrafoi tucui tiaj iyaigunara rimasha. Parrafomanda punda comentario cushca huasha shuj iyaigunamanda rimasha catina ushanchi (ricungui “ Comentashcai ¿ima iyaigunamanda rimana ushani?” nishca partii).

19. La Atalaya quillcara yachachij ¿imasnara ñucanchira yanapana ushan, shina ashas imara rurana anchi?

¹⁹ Ñaupara yachachijta rimana ushanchi shu parrafoi comentana munashcara. Caita rurana munasha tandarina manara callarishcallaira huauquihua rimashun. Cai párrafo pactashcai maquira mas ahuama aisana anchi ñucanchira ricuchu.

20. Tandarina ¿imasnara amigopura micushca cuinta ricurin?

²⁰ Congregaciombi tandarinauna anmi amigopura micuna rurashca cuinta. Huauqui paniuna micungaj cumbiranujpi imahuaras apaichi nijpi ¿imara rurashun? Maicambi manzharishun shinallara tucuiguna gustarishcara apangaj ursarishun. Tandarinaunai ñucanchira Cumbiraj Jehová Dios gustu micuna cuinta ñucanchira cushca (Sal. 23:​5; Mat. 24:45). Jehová munanmi ñucanchi mas ushashca tupura cunuchu. Chiraigu alira purunturisha tucui ushashca tupu maquira aisasha rimashun. Shina rurasha mana ñucanchillara Jehová yachachishcaunara chasquishun, shujcunas chasquinuchu yanapashun.