PUNTO 6
¿Huañushcauna atachi tucunungachu?
1. Huañushcauna ¿imara tucununga?
Jesús Allpai causaushca timpui paihua amigo Lázaro huañuca. Lazaroga Betania llactai causaca, Jerusalén mayambi. Jesús pactamungagama, Lázaro ña chuscu punzha huañushca aca. Jesusga Lázaro pambashca partima Martandi, Mariandi rica. Chibi ashca runauna munturinuca. Marta, shinallara María paiguna turira Jesús atachishcara ricusha ¿imasnara sintirinushcanga? Leapai Juan 11:21-23, 38-44.
Bibliaga ali gustu cuintashcaunamanda rimashaga ninmi, huañushcauna atarinungami. Marta yachacami, Jehová Dios huañushcaunara atachingaraushcara cai Allpai causangahua. Leapai Juan 11:24.
2. Huañushca huasha ¿imara tucunchi?
Adanma Dios nica: “Allpa pulvu angui, allpa pulvumallara tigrangui” (GÉNESIS 3:19)
Runaunaga “allpa pulvumanda” rurashcaunami anchi (1 Corintios 15:47). Aicha ucui almara mana charinchichu. Aichayuj, tulluyuj anchi. Chiraigumanda huañushca huasha ismunchi, mana maitas purinchichu. Ñucanchi iyai tucurinmi. Chiraigu huañushcauna mana imaras sintinunzhu. Lázaro huañushcamanda atachijpi, mai lugarbis puricani nisha mana cuintacachu. Leapai Eclesiastés 9:5, 6, 10.
¿Yaya Diosga runaunara ucu pachai rupachisha castiganzhu? Mana. Ñami Bibliai yachashcanchi, huañushcauna imaras mana sintinunzhu. Yaya Dios ucu pachai rupachin nijcuna llullanunmi. Shina nisha Jehová Diosta yanga culpanun. Yaya Diosga ninahua turmindachina iyaillaras mana charinzhu. Leapai Jeremías 7:31.
Huañushca huasha ¿imara tucunchi? nishca video ricui.
3. ¿Huañushcaunahua cuintarinara ushanchichu?
Huañushcauna mana rimanunzhu, mana uyanunzhu (Salmo 115:17). Runaunara umachingahua, supaigunami huañushca runauna cuinta rimasha ricurimunun (2 Pedro 2:4). Chiraigumanda Yaya Dios mana munanzhu huañushcaunahua cuintaringahua. Leapai Deuteronomio 18:10, 11.
4. Huañushcaunamanda ¿pigunara atarinunga?
Huaranga huaranga huañushcauna atarinungami cai Allpai causangahua. Shinallara Jehová Diosta mana ricsishcamanda manalira rurajcunas atarinungami. Leapai Rashcauna (Hechos) 24:15.
Atachishcauna Jehová Diosmanda ricsina ushanunga. Shinallara Jesusta casusha paita quirishcara ricuchinunga (Ricuchina [Apocalipsis] 20:11, 12). Paiguna casushaga cai Allpai huiñai huiñaigama causanunga. Leapai Juan 5:28, 29.
5. Jehová Diosga ¿imarasha huañushcaunara atachinga?
Jehová Diosga llaquij, ali shungu ashcamanda huañushcaunara atachinga. Jehová paihua Churira huañungaj cachamushcamandami atachina punzhara chapana ushanchi. Chi punzhai ¿pihua tuparinara munangui? Leapai Juan 3:16; Romanos 6:23.
