1. ¿Ima ricsishca oracionda cai temai ricungaraunchi?

HUARANGA huaranga runauna padrenuestro nishca oracionda ricsinun. Jesús cai oracionhua paita catijcunara yachachica imasna mañanara. Jesús chi oraciombi ¿imara mañaca? ¿Imarasha valin chi oracionda ali intindingahua?

2. ¿Imamanda mañangaj Jesús yachachica?

² Jesús nica: “Cangunaga casna mañaichi: ‘Ñucanchi ahua pachai tiaj Yaya, camba shutira ahuayachishca achu, shamuchu camba mandana. Can munashcara rashca achu, imasna ahua pachais, shinallara cai pachais’” (leapai Mateo 6:​9-13). ¿Imarasha casna mañangaj Jesús yachachica? (Nota 20 ricungui).

3. Cai temai ¿imara ricushun?

³ Ña yachashcanchi Diospa shuti Jehová an. Astaumbas Yaya Dios ima rangahua cai Allpara, runaunaras rurashca. Shinajpi Jesús: “Shamuchu camba mandana” nijpi ¿imara nisha nica? Cai temai ricushun imara an Diospa Reino, imara ruranga, imara rurangaraun Diospa shuti ahuayachishca tucuchu.

4. a) Diospa Reino ¿imara an? b) ¿Pita an chi Rey?

⁴ Diospa Reinomi shu gobierno Jehová Dios ahua pachai churashca an. Chi Reinoi Jehová Dios, Jesús Rey apu tucuchu ajllacami. Bibliaga riman Jesús “rey apuunamanda Rey Apumi, señorgunamanda  Señormi” (1 Timoteo 6:15). Jesús runa gobiernogunamanda mas alira rurana ushan. Shinallara, tucui cai huangurishca runa gobiernogunamanda mas ushaira charinmi.

5. Diospa Reino ¿maimanda mandangaraun?

⁵ Jesús ahua pachama 40 punzha causarishca huasha cutillara tigraca. Timpu pasashca huasha Jehová Dios paita Rey tucuchu ajllaca (Rashcauna 2:33). Diospa Reino ahua pachamanda cai Allpara mandangaraun (Ricuchina 11:15). Chiraigu Biblia nin Diospa Reinoga ‘ahua pacha’ mandanami an (2 Timoteo 4:18).

6, 7. ¿Imarasha Jesús tucui mandajcunamanda mas ali mandaj an?

⁶ Biblia nin Jesús tucui mandajcunamanda mas ali mandaj an ‘paiga sapalla huañui illaj’ ashcamanda (1 Timoteo 6:16). Tucui runa gobiernoguna huañusha tucuringaranun. Randi Jesús mana ima huras huañungachu. Chiraigu tucui Jesús ali rashcauna unai unai durangami.

⁷ Biblia nin Jesús ali dirichu ruraj, llaquij shunguyuj Reymi anga. Shu profecía nin Jesusmanda “paihuajpi tiarina an Jehovahuaj espíritu, yachana intindina espíritu, camachina ushana espíritu, ricsina espíritu Jehovara manzhangahua”. Astaumbas nin: “Pai paihua ñahui ricushcamandalla mana taripangachu, mana rimangachu uyashcamandalla. Ali dirichu ranahua mansu runaunara taripana an” (Isaías 11:​2-4). ¿Chi tunu Rey charingahua munanguichu?

8. ¿Imarasha yachanchi Jesús sapalla mana mandangachu?

⁸ Bibliaga riman Yaya Dios huaquin runaunara ajllashcami Jesushua pariju ahua pachai mandanuchu.  Apóstol Pablo Timoteora nica: “Ñucanchi turmindarishas, shinallara paihua pariju rey apuuna tucushun” (2 Timoteo 2:12). ¿Masna runauna Jesushua mandanunga?

9. a) ¿Masna runauna Jesushua mandanunga? b) ¿Ima hurasta Jehová 144.000 runaunara ajllangaj callarica?

⁹ Imasna tema 7​pi yachashcanchi, Juan shu ricuchinai Jesusta Rey cuinta ahua pachai ricuca, paihua 144.000 reyguna tianuca. ¿Pigunara anun cai 144.000? Juanllami cutipan: “Caiguna Burigura catijcunami anauca pai maita rijpis”. Astaumbas nica “caiguna runaunamanda randishcaunami anauca” (leapai Ricuchina 14:​1, 4). Jesús chi Burigu anmi. Cai 144.000 Jesusta ali catijcuna anun, Yaya Dios paigunara ajllashcami Jesushua ‘cai pachai mandangaj’. Paiguna huañushca huasha ahua pachai causarinun (Ricuchina 5:10). Jesús cai Allpai tiashca punzhaunai Jehová 144.000 runaunara ajllangaj callarica.

10. Jehová cai 144.000 runauna Jesushua pariju mandanuchu ajllashcaga ¿imasnara llaquishcara ricuchin?

¹⁰ Jehová Dios ñucanchira ashcara llaquishcamanda runauna Jesushua pariju mandanuchu ajllashcami. Jesús shu ali mandaj anga, pai runa cuinta llaquira intindishcamanda. Apóstol Pablo rimaca Jesusga yachanmi ñucanchi imasna sintirishcara, “ñucanchi turmindarishcara”, paiga “ñucanchisna tucuibi tintashca” ashcaraigu (Hebreos 4:15; 5:8). 144.000 ajllashca runauna uchayuj, unguyujcuna ashcaraigumanda runaunara intindinun. Chita ricuchin Jesús, 144.000 ajllashca runaunas ñucanchi sintishcaunara, problemagunaras intindinungami.

11. ¿Imarashara Jesusga Diospa munai ahua pachai rashca achu mañangaj yachachica?

¹¹ Jesús paita catijcunara, Diospa munashcara cai Allpais shinallara ahua pachais rashca achu mañangaj yachachicami. ¿Imarashara Diospa munai ahua pachai rashca achu mañana anuca? Tema 3​pi yachashcanchi Satanás Yaya Dioshua cuntra tucuca. Jehová Dios saquicami Satanasta mana casuj angelgunara o supaigunaras ahua pachai ansa timpu chara saquirinuchu. Chiraigu ahua pachai tucuiguna Diospa munaira mana ruraj anuca. Tema 10​pi Satanasmanda paihua supaigunamandas mas yachashun.

12. Ricuchina 12:10​pi ¿maican ishqui yali pasashcaunamanda riman?

¹² Biblia nica Jesús, Diospa Reinoi Rey tucushca huasha Satanashua macanununga (leapai Ricuchina 12:​7-10). Ricuchina 12:10​pi ishqui yali pasashcaunamanda riman. Punda, Jesucristo mandangaj callarin. Huasha, Satanasta ahua pachamanda cai Allpama shitashca tucun. Imasna yachangaraunchi chiguna ña pasashcaunara.

13. ¿Imara tucuca ahua pachai, Satanás cai Allpama shitashca tucujpi?

¹³ Ahua pachai casuj tiaj angelguna ashcara cushiyanuca Satanasta paihua supaigunara ahua pachamanda shitashca ashcaraigu. Biblia ninmi: “Cushiyaichi, ahua pachauna, chihui causajcunandi” (Ricuchina 12:12). Cunaga ahua pachai tiajcuna, Dios munashca cuinta rurasha gustu, gunlla causanunmi.

14. ¿Imara tucuca cai Allpai Satanás ahua pachamanda shitashca tucujpi?

 ¹⁴ Cunaga cai Allpai shuj tunu causai an. “Supai apu cangunajma irgushcami” chiraigu cai Allpai ashca turmindusguna tian, paiga “ashcara piñarisha” sintirinmi, “paihua timpu ña pactariupi yachasha” (Ricuchina 12:12). Satanás ahua pachamanda shitashca tucusha yapa piñarishca an, astaumbas tucuchishca tucungaraushcamanda yachashcaraigu. Chiraigu tucui runaunara turmindachisha llaquichisha causaun.

15. Yaya Dios cai Allpara ¿ima rurangaraun?

¹⁵ Diospa munai cai Allpai mana turcarishcachu. Paiga chara munanmi cai Allpa shu paraíso tucuchu, runauna ucha illaj achu, huiñaigama causanuchu (Salmo 37:29). Diospa Reinoga ¿imasnara chita pactachinga?

16, 17. Diospa Reinomanda Daniel 2:44 profeciaga ¿imara yachachin?

¹⁶ Daniel 2:44 profecía nin: “Chi rey apuuna punzhaunai ahua pachamanda Diosmi shu mandanara churanga mana ima huras tucuchishca tucunga. Paihua mandana mana shuj llactama cushca tucunga. Astaumbas cai tucui gobiernogunara ñutusha tucuchinga, paillara huiñai huiñaigama angami”. Cai profeciaga, ¿imara yachachin Diospa Reinomanda?

¹⁷ Punda, yachachin Diospa Reinoga “chi rey apuuna punzhaunai” mandangaj callaringaraun. Caita ricuchin chara cai Allpai gobiernoguna tiajllarami chi Reino mandangaj callaringa. Huasha, yachachin Diospa Reino unaigama tiangami, mana pi gobiernoguna chi Reinora randi mandangachu. Puchucai, cai mundumanda gobiernoguna Diospa Reinohua  macanununga yachachin. Diospa Reino vinsingami, paillami cai Allpara mandanga. Ña cai profecía pactarijpiga, cai Allpai causajcuna mas ali gobiernora charinungami.

18. Diospa Reino, runa gobiernogunahua guerra ¿ima shuti an?

¹⁸ ¿Imara tucunga manara cai runa gobiernoguna, Diospa Reinohua macanunungaj callarishcallaira? Supaiguna pandachinunga “cai pacha rey apuunama rinaun tucui mundui, paigunara macanaunama tandachingaj, Tucuira Ushaj Diospa atun punzhai”. Chi guerra Armagedón nishcai runa gobiernoguna Diospa Reinohua macanununga (Ricuchina 16:​14, 16; nota 10 ricungui).

19, 20. ¿Imarasha Diospa Reino ministinchi?

¹⁹ ¿Imarasha Diospa Reino ministinchi? Ricushun quinsa iyaiguna. Punda, uchayuj ashcamanda ungurinchi, huañunchi. Shinajpi Diospa Gobierno tiajpi cushillami huiñaigama causashun. Biblia ricuchin: “Casnami Dios cai pachara llaquica, paihua sapalla Churira cuca, maicans paihuajpi quirisha ama chingarichu, astaumbas huiñai causaira charichu” (Juan 3:16).

²⁰ Huasha iyai, manali runauna tiaj mundui causanchi. Ashcauna llullanun, shujcunara umachinun, manali causai charinun, ñucanchi mana imaras rurana ushajpiga, Jehová ushanmi. Paiguna causaira mana turcaringaj munajcunara Armagedombi tucuchingaraun (leapai Salmo 37:10). Puchucai iyai, runa gobiernoguna mana ali, llulla anun, astaumbas runauna problemagunara alichingahua mana ushanun, runaunara Yaya Diosta casungaj mana yachachinun, chiraigu  Diospa Reinora ministinchi. Biblia ninmi “runaga shu runara llaquichingahua mandaun” (Eclesiastés 8:9).

21. ¿Imara ruranga cai Reino, Diospa munashcara cai Allpai pactarichu?

²¹ Armagedón huasha, cai Reino yanapangami Diospa munashcara cai Allpai pactarichu. Satanás paihua supaigunandi ishcashca tucununga (Ricuchina 20:​1-3). Ansa ansa mana pis unguringachu, mana huañungachu. Quishpichishcamanda tucui casujcuna Paraisoibi huiñaigama causangaj ushanungami (Ricuchina 22:​1-3; nota 21 ricungui). Shinallara cai Reino rurangami Diospa shuti ahuayachishca tucuchu. ¿Imara yachachin cai? Diospa Gobierno cai Allpai mandajpimi tucui runauna Diospa shutira respetanunga.

22. ¿Imarasha yachanchi Jesús mandangahua mana callaricachu cai Allpai tiashcai o ahua pachama uctalla tigrashca huasha?

²² Jesús cai Allpai tiashcai paihua catijcunara yachachicami cai oracionda mañangahua: “Shamuchu camba mandana”. Caita yachachin Diospa Reino chara mana shamushcachu. Ñaupa punda, Jehová chi Gobiernora churana aca, Jesusta Rey apu tucuchu. Shinajpi  Jesús ahua pachama tigrashca huasha, paita ¿uctallachu Rey tucuchu churaca? Mana. Jesús chara chapana aca. Jesús causarishca huasha apóstol Pedro, Pablohua caita intindichingaj Salmo 110:1 tiaj profecía Jesuspi pactaricami ninuca. Cai profeciai Jehová nica: “Ñuca ali maquima tiari, ñuca canda chijnijcunara camba chaqui ucui churanagama” (Rashcauna 2:​32-35; Hebreos 10:​12, 13). Caita yachachin Jesús chara chapana aca Jehová paita Rey apu rurachu.

23. a) ¿Ima huras Jesús Rey apu cuinta, Diospa Reinoi mandangaj callarica? b) ¿Imara ricushun shamuj temai?

²³ Ashca huatauna ñaupallara Jesusta ali catijcuna muntun intindinuca 1914 huata yapa valij ashcara Biblia profeciagunamanda. Cai mundui tucushcaunara 1914 huatamanda ricuchin chi Jesusta ali catijcuna muntun cierto rimanucami: Jesús chi huatai mandangaj callarica (Salmo 110:2; nota 22 ricungui). Chi huasha Satanás cai Allpama shitashca aca, cuna “paihua timpu ña pactariupi” (Ricuchina 12:12). Shamuj temai mas ricungaraunchi imarasha ninchi “paihua timpu ña pactariupi”. Shinallara yachangaraunchi ñallami cai Reino, Diospa munaira cai Allpai pactarichu rurangami.