Apocalipsis libropica ima tucunata ricuchingapajmi chˈimbapuraicunahuan parlan (Apocalipsis 1:1). Por ejemplo, shuj huainayaj huarmimantami parlan. Paica “Babilonia jatun pueblo” shutitami frentepi quillcashca charin. Chai huarmica ‘achca gentecunapaj, tucui llajtacunapaj’ jahuapimi tiyacun (Apocalipsis 17:1, 5, 15). Chaitaca aichayuj tulluyuj huarmica mana rurai tucunchu. Shinashpaca ¿Babilonia jatun pueblo nishca huainayaj huarmica imataj can?

Apocalipsis 17:18-pica, chai ‘huarmica allpa pachapi jatun mandajcunata, mandacuj jatun pueblomi’ ninmi. Shinashpaca Babilonia jatun puebloca muyundij Allpapimi mandacun. “Pueblo” nishpaca achca gentecunamantami parlacun. Shinapish ¿maijan pueblotaj can? Chai jatun  puebloca tucui panda religioncunami can. Caita ashtahuan entendingapajca Apocalipsis libropi shujtaj versocunata ricushun.

Babilonia jatun puebloca mana politicocunachu can, mana comerciantecunachu can. Bibliapica: “Allpa pachapi jatun mandajcunaca chai huarmihuanmi huainayarcacuna” ninmi. Panda religioncunaca Allpapi mandajcunahuan o politicocunahuan chagrurishpami ima ruranata ricungapaj tandanacushcacuna. Shinallataj politicocunata mandasha nishpami panda religioncunaca imatapish rurancuna. Chaimantami Babilonia jatun pueblotaca ‘huainayashpalla causaj huarmi’ nin (Apocalipsis 17:1, 2; Santiago 4:4). Shinashpaca Babilonia jatun puebloca mana politicocunachu can. Tucui panda religioncunami can.

Bibliapi yachachishca shinaca, chai huarmita tucuchijpica “allpa pachapi randishpa cˈatushpa causajcunaca” o comerciantecunaca “jatunta llaquirishpami huacangacuna”. Shinallataj Bibliapica mandajcunapish, comerciantecunapish chai huarmita llaquichishcataca ‘carumantami’ ricushpa saquiringacuna ninmi (Apocalipsis 18:3, 9, 10, 15-17). Shinashpaca Babilonia jatun puebloca mana politicocunachu can, mana comerciantecunachu can. Tucui panda religioncunami can.

Religioncunamanta parlacushcata entendichingapajca Bibliapica: “Tucui llajtacunatami cambaj brujianahuan umarcangui” ninmi. (Apocalipsis 18:23). Tucui laya brujeriacunaca panda religionmanta, supaicunamantami shamun. Chaimantami Bibliapica Babilonia jatun pueblotaca ‘supaicuna causana jutcu’ nin (Apocalipsis 18:2; Deuteronomio 18:10-12). Shinallataj Babilonia jatun puebloca alli religionta pˈiñashpami ‘profetacunata, Diospajlla cajcunata’ llaquichicun (Apocalipsis 18:24). Alli religionta yallitaj millanayachishpami ‘Jesusmanta huillajcunataca’ llaquichishcacuna, huañuchishcacunapish (Apocalipsis 17:6). Shinashpaca Babilonia jatun puebloca Jehová Diosta mana cazuj tucui panda religioncunami can.