Diluviu pasarinqanchöqa, Noëpa tsurinkunapa wamrankunaqa mëtsikaqmi kayarqan. Mëtsika familia tikrarirqa, Jehovä mandakunqannömi më tsëpa ëwakuyarqan.

Peru wakin familiakunaqa manam Jehoväta cäsukuyarqantsu. Pëkunaqa kënömi niyarqan: “Juk markata rurashun y ciëluyaq chaq törrita sharkatsishun. Tsënömi reqishqa kashun y mananam më tsëpa rakikäshunnatsu”.

 Peru Jehovätaqa manam gustarqantsu, tsëmi micharqan. ¿Musyankiku imanö michanqanta? Illaqpitam tukuy idiömakunata parlatsir qallëkurqan. Tsëmi tsë markata Babel nir reqiyarqan, tsëqa “mana entiendinakuy” ninanmi. Tsënam parlayanqankunata manana entiendinakur, rurëkäyanqan törrita dejarir më tsëta ëwakuyarqan. Peru täräyanqan sitiukunachöqa mana allikunata rurarmi sïguiyarqan. ¿Llapankunatsuraq mana cäsukoq kayarqan? O ¿pillapis Jehoväta cäsukurqantsuraq? Qateqnin kaqchömi tsëta yachakushun.