Eden huertapita yarqurirqa Adanwan Ëvaqa mëtsika wamrayoqmi kayarqan. Punta kaq wamranqa Cainmi karqan. Pëqa frütakunata y verdürakunatam murukoq. Y qateqnin kaqnam Abel karqan, y pëtaqa üshakunata wätëmi gustaq.

Juk kutim Cainwan Abelqa Jehoväpaq rupatsiyänampaq qarëta apayarqan. Tsë apayanqan qarëqa Diospaqqa alläpa väleqmi karqan. Jehoväqa Abel apanqan qarëpita kushikurqanmi, peru Cainpa qarëninqa manam gustarqantsu. Tsëmi Cainqa alläpa cölerakurqan. Peru Jehoväqa Cainta kënömi nirqan: “Cölerashqalla kakurqa ima mana allitapis rurëkunkim”. Tsënö nikaptimpis Cainqa manam cäsurqantsu.

 Cainqa kënömi Abelta nirqan: “¿Aku washa chakrakunapa?”. Y chakrachö këkäyaptinmi Abelta wanuratsirqan. Y tsëta Cain ruranqampitam Jehoväqa castigarqan, y kënömi nirqan: “Familiëkipita mëtapis ëwakuy”. Y imëpis manana kutinampaqmi nirqan.

¿Imatataq yachakuntsik? Imapis munanqantsiknö mana yarquptinqa capazchi cölerakushun. Peru mas y mas cölerakuykanqantsikta cuentata qokurqa, o cölerashqata pipis rikämashqaqa, imamampis manaraq charmi cölerantsikta dominanantsik y geniuntsikta cambianantsik.

Abelqa alläpam Jehoväta kuyaq y allim portakoq, tsëmi Jehoväqa pëta yarparëkan. Kë Patsa shumaq tikrariptinmi Jehoväqa Abelta kawaritsimunqa.