Apostolninkunata Jesus yuripunqampita juk tiempu pasariptinmi, Galilëa qochaman apostol Pëdru pescaq ëwarqan. Y Tomas, Santiägu, Juan y maskunam pëwan ëwayarqan. Y waraqnimpim pescayarqan, peru manam ni juktapis tsariyarqantsu.

Waräninqa patsa waraqllam qocha kuchunchö këkaqta juk nunata rikäriyarqan. Y tsë nunaqa, “¿imallatapis tsariyämurqunkiku?” nirqanmi. Pëkunanam, “manam” niyarqan. Tsë nunanam, “barquïkikunapa derëcha lädunman mällëkikunata jitayë” nirqan. Y jitarkurmi mälla junta pescädukunata tsaririyarqan, y manam jorqëtapis puëdiyarqantsu. Tsë höram Juanqa cuentata qokurirqan tsë nunaqa Jesus kanqanta. Tsëmi, “¡Señortaq!” nirqan. Tsënam Pëdruqa jinan höra yakuman saltëkur qocha kuchunyaq nadar ëwarqan. Y wakin kaq qateqninkunapis barcuwanmi qepanta ëwayarqan.

 Qocha kuchunman chärirmi tantata y rawrëkaq rumikunachö pescädukunata taririyarqan. Y Jesusqa, “tsariyanqëkipitapis juk ishkëta kankanapaq apayämï” nirqanmi. Nïkurmi, “desayunariyë” nirqan.

Desayunar ushariyaptinmi Pëdruta Jesus kënö tapurqan: “¿Kë pescädukunata kuyanqëkipitapis masku kuyamanki?”. Pëdrunam, “awmi Teytë, qamqa musyankim kuyanqaqta” nirqan. Tsënam Jesusqa, “tsëqa achkasnïkunata atiendi” nirqan. Y yapëmi, “Pëdru, ¿kuyamankiku?” nirqan. Y Pëdruqa, “Teytë, qamqa musyankitaq kuyanqaqta” nirqanmi. Jesusnam, “üshäkunata mitsi” nirqan. Y yapëmi Jesusqa kaqllata tapurqan. Tsënam Pëdruqa alläpa llakikur, “Teytë, qamqa llapantam musyanki. Jina musyankim qamta kuyanqaqta” nirqan. Y Jesusqa, “üshäkunata atiendi” nirqanmi. Nïkurmi, “qatimar sïgui” nirqan.