Juk paqasmi gobernanti Nabucodonosorqa suëñunqanta mana entiendirnin alläpa yarpachakurqan, y manam punuytapis puëdirqantsu. Tsëmi brüjukunata, suerti qateqkunata y caldeu nunakunata qayatsirqan. Y chäriyaptinnam kënö nirqan: “Suëñunqä imapaq kanqantam musyëta munä”. Tsënam kënö niyarqan: “Suëñunqëkita willëkayämë y noqakunam niyashqëki imapaq kanqanta”. Peru pëqa kënömi nirqan: “¡Manam willayashqëkitsu! Qamkunam suëñukunqäta y imapaq kanqantaqa niyämänëki, mana niyämaptikiqa wanuratsiyashqëkim”. Tsënam pëkunaqa yapë kënö niyarqan: “Teytë, suëñunqëkita willëkayämë y noqakunam niyashqëki imapaq kanqantapis”. Gobernantinam nirqan: “Engañamëtam munëkäyanki. ¡Imata suëñunqäta niyämë!”. Tsënam kënö niyarqan: “Niyämanqëkitaqa manam kë patsachö ni pillapis ruramuyta puëdinqatsu. Mana puëdipaqmi”.

Gobernantiqa alläpa cölerarmi Babiloniachö llapan yachaq nunakunata wanutsiyänampaq o wañutsiyänampaq mandakurqan. Y Danielta, Sadracta, Mesacta y Abednëgutapis wanutsiyänanmi karqan. Danielqa gobernantiman ëwëkurmi kënö nirqan: “Teytë, suëñunqëki imapaq kanqanta willanaqpaq ichik maslla shuyëkallämë”. Nïkurmi amïgunkunawan juntu yanapëkunampaq Jehoväman mañakuyarqan. ¿Y Jehoväqa imatataq rurarqan?

Teyta Diosqa, Danieltam paqaspa revelarqan gobernanti suëñunqan imapaq kanqanta willanampaq. Danielqa waränin junaqmi gobernaqpa sirweqninta kënö nirqan: “Babiloniachö yachaq nunakunataqa ama mëqantapis wanutsitsu. Gobernantiman pushamë suëñunqan imapaq kanqanta willanäpaq”. Tsënö niptinmi gobernantiman pusharqan y Danielqa kënömi gobernantita nirqan: “Teyta Diosqa, rikätsishurqunki ima pasanampaq kaqtam. Teytë, suëñuynikichömi rikarqëki nuna niraq jatun monumentuta. Tsë monumentupa peqanqa o umanqa alli kaq örupitam karqan, pëchunwan rikrannam pläta metalpita karqan, pachanwan chankannam cobripita karqan, y ishkan chakinnam fiërrupita y mitupita karqan. Tsëpitam juk jirkapita juk rumi pakikar ishkimurqan, y monumentupa chakintam fuertipa chëkatsirqan. Y monumentuqa  pasëpam ushakarqan. Y vientu shamurmi llapanta apakurqan. Y tsë monumentuta ushakätseq rumiqa jatun jirkamanmi tikrarqan y entëru Patsamanmi juntarqan”.

Tsëpitanam Danielqa kënö nirqan: “Teytë, tsëtam suëñurqëki, y kananmi nishqëki imapaq kanqanta: Örupita rurashqa tsë monumentupa peqanqa o umanqa qammi kanki. Pläta metalpita kaqqa, juk gobiernuna sharkunampaq kaqtam rikätsikun. Tsëpitaqa, cobri cuenta gobiernum entëru patsata gobernanqa. Tsëpitanam fiërrunö chukru gobiernu kanqa. Y ultimutanam, wakin wakinchö fiërrunö chukru y wakin wakinchö mitunö dëbil gobiernu kanqa. Y jirkaman tikraq rumiqa Diospa Gobiernuntam rikätsikun. Tsë Gobiernuqa llapan gobiernukunatam ushakätsinqa y manam ni imëpis ushakanqatsu”.

Tsënö willaptinmi gobernanti Nabucodonosorqa patsamampis urkun chanqanyaq Danielpa puntanman respetar qonqurikurqan. Y Danieltam nirqan: “Qamkunapa Diosnikikunanö diosqa manam kantsu”. Tsëpitanam llapan yachaq nunakunapa mandaqnin y Babilonia provinciapa gobernaqnin kanampaq Danielta churarqan, y manam wanutsirqannatsu. ¿Cuentata qokurqunkiku Daniel mañakunqanta Jehovä imanö contestanqanta?