Xinkʼiy pa Warialda (Nueva Gales del Sur). Pa wajun tinamit riʼ kekikʼiysaj chij y wakax, xuqujeʼ ktik ichaj, ixim, kinaqʼ y nikʼaj chik. Xuqujeʼ sibʼalaj chʼajchʼoj ri tinamit y kʼo ta itzelal kbʼanik.

Ri in, in nabʼeʼal chke 10 alkʼwalaxelabʼ, rumal laʼ xinmajij chak are chiʼ 13 nujunabʼ rech kintoʼ ri nufamilia. Rumal che xinok ta pa ri escuela xinmaj chak pa taq ri ranchos. Are chiʼ 15 nujunabʼ kentijoj chi kej ri kkiya ta kibʼ pa chapik rech keʼux manxoʼ.

Ri chak pa taq ri ranchos kʼo utz taq jastaq y kʼo utz taj. Sibʼalaj utz kinwil ri kinbʼano y ri lugar che kinchakun wi. Pa taq chaqʼabʼ kintʼuyiʼ chunaqaj ri qʼaqʼ y kinwil ri ikʼ, ri chʼumil y kinaʼ ri kuxlabʼ ri taq qʼayes. Kinchomaj che kʼo jun riʼ xbʼanow ronojel ri utzalaj taq jastaq riʼ. Are kʼu xuqujeʼ pa ri nuchak e kʼo itzel taq achilanik che kkibʼij itzel taq tzij y kkitij sikʼ, rumal laʼ xinbʼan we ri kkibʼano.

Are chiʼ 18 junabʼ xinbʼe pa Sydney. Xwaj xinok pa ri ejército, are kʼu xkaj taj xinokik rumal che xinbʼe ta pa escuela. Xinriq jun chak chilaʼ y xinkanaj kan jun junabʼ. Chilaʼ xinchʼobʼ wi kiwach ri testigos rech Jehová. Xinbʼe kukʼ pa ri kiriqbʼal ibʼ y aninaq xinwilo che are ri qastzij.

Are kʼu chunaj ta tiempo xintzalij pa ri nutinamit. Y xinkanaj kan pa Goondiwindi (Queensland). Xinriq nuchak y xinkʼulik, are kʼu xinmajij qʼabʼarik.

Xekʼojiʼ kebʼ qalkʼwal rukʼ ri wixoqil. Are chiʼ tajin kekʼiyik xinok che uchomaxik ri kinbʼan rukʼ ri nukʼaslemal. Are kʼu xnaʼtaj chwe ri xinwetaʼmaj are chiʼ xinbʼe pa jun riqbʼal ibʼ pa Sydney rumal laʼ xinchomaj ri rajawaxik kinbʼano.

Xinriq jun ojer wuj rech La Atalaya. Chilaʼ kʼo wi ri udirección ri sucursal kech ri testigos rech Jehová re Australia, rumal laʼ xintzʼibʼaj bʼik y xintaʼ tobʼanik chke. Y xkitaq lo jun Testigo che wilik che sibʼalaj utz y kloqʼoqʼenik y xinmajij jun etaʼmanik re ri Biblia rukʼ.

Are chiʼ xinwetaʼmaj chrij ri Biblia, xinwilo che kʼo rajawaxik kinbʼan pa ri nukʼaslemal. Jun versículo rech ri Biblia che xopan pa ri wanimaʼ are 2 Corintios 7: 1, kubʼij chqe che rajawaxik kqesaj «pa ri qakʼaslemal ronojel ri jastaq ri e tzʼil ri e kʼo pa ri qacuerpo».

Xinmajij uyaʼik kan utijik tzam y utijik sikʼ. Are kʼu kʼax xinriq che e ubʼanik wariʼ rumal cheʼ in naqʼatal chi che ubʼanik. Are kʼu kwaj che kinbʼan pa ri nukʼaslemal ri kraj ri Dios. Ri xuyaʼ tobʼanik chwe are ri kubʼij pa Romanos 12:2, «Mitaqej kʼaslemal jas ri ucholajil taq ri e uchomanik taq ri qʼij junab’ ri uj kʼolik; xaneʼ, chik’exaʼ ri chomanik ri inaqʼatisam wi iwib’». Xinwilo che rech kinkunik kinkʼex ri nukʼaslemal, rajawaxik kinkʼex ri nuchomanik y kinwil ri jastaq junam ri kubʼan ri Dios che rilik, jastaq che xa kubʼan kʼax chwe. Rukʼ ri utobʼanik ri Dios xinkunik xinya kan ubʼanik ri jastaq riʼ.

Ri más kʼax xinriq che uyaʼik kanoq are ubʼixik ri itzel taq tzij. Wetaʼm ri kubʼij pa Efesios 4:29 che kubʼij: «Mel uloq pa ichiʼ jun itzel tzij», are kʼu naj tiempo xukʼam bʼik rech xinkunik xinya kanoq. Ri xintoʼwik are uchomaxik ri kubʼij Isaías 40:26. Che kchʼaw chkij ri taq chʼumil, ri jun versículo riʼ kubʼij: «Chixkaʼyampeʼ chikaj, chiwilaʼ kʼut: ¿Jachin xbʼanow ronojel waʼ? Ri kujach kiwach chkijujunal, konojel kʼut keʼusikʼij rukʼ ri kibʼiʼ. Sibʼalaj nim ri ukunem xuqujeʼ ri uchuqʼabʼ, chi man kʼo ta jun chke ma ta kopanik». Rumal che ri Dios sibʼalaj nim ri uchuqʼabʼ kʼolik rech xkunik xubʼan ri kajulew, kkun che uyaʼik nuchuqʼabʼ rech kinkʼex ri nukʼaslemal y kibʼan ri kraj areʼ. Rukʼ ri chʼawem y chuqʼabʼ xinkunik xinya kan ubʼixik ri itzel taq tzij.

Paneʼ in ajchak are kʼu qas ta kinkunik kintzijon kukʼ ri winaq, rumal che e kʼi taj keʼopan pa ri rancho ri kinchakun wiʼ. Are kʼu rumal ri tijonik che xyaʼ chwe pa ri riqbʼal ibʼ kech ri testigos rech Jehová, xinwetaʼmaj jas kinbʼan che umajixik jun tzijonem. Xuqujeʼ ri xkʼut chnuwach xinutoʼo rech kinchʼaw kukʼ ri winaq chrij ri utz taq tzij re ri uQʼatbʼal tzij ri Dios (Mateo 6:9, 10; 24:14).

Are chiʼ xqʼax ri junabʼ xinux kʼamal bʼe re ri congregación. Sibʼalaj nim kinwilo che kentoʼ ri qachalal. Are kʼu ri más nim tewchibʼal are che kinkunik kinpatanij ri Jehová rukʼ ri sukʼ y loqʼalaj wixoqil y kukʼ ri qalkʼwal.

Sibʼalaj kinmaltyoxin che ri Jehová che xuya bʼe chwe che kwetaʼmaj uwach paneʼ kʼo ta wetaʼmabʼal (Isaías 54:13). Kinbʼij che qastzij ri kubʼij pa Proverbios 10:22: «Ri utewichibʼal ri Ajawaxel qʼinomal waʼ». Ri nufamilia xuqujeʼ in kqaj kqetaʼmaj más chrij ri Jehová y kqapatanij chbʼe qʼij saq.