Ri Biblia xukʼex ri kikʼaslemal

¿Jas xbʼanowik che jun achi xuya kan ri etzʼanem y ri elaqʼ y xukʼex ri ukʼaslemal? Chqilaʼ ri kuya ubʼixik.

«Sibʼalaj utz xwil ri carreras chkij kej» (RICHARD STEWART)

XALAX PA RI JUNABʼ: 1965

TINAMIT: JAMAICA

NIKʼAJ CHIK: UTZ XRIL RI ETZʼANEM Y XUBʼAN ELAQʼ

RI OJER NUKʼASLEMAL: Xinalax pa Kingston jun lugar che mebʼaʼ, ri capital re Jamaica, jawiʼ kʼo ta wi chak y kʼi kʼax kbʼan chilaʼ. Ri winaq kkixibʼij kibʼ kumal ri itzel taq winaq che e kʼo chilaʼ. Ronojel taq qʼij kesax balazos.

Ri nunan sibʼalaj kchakunik rech kuya ri kajwataj chwe xuqujeʼ chke ri kebʼ nuchaqʼ —jun alaj ala y jun alaj ali—, y xukoj uchuqʼabʼ rech kojbʼe pa escuela. Are kʼu in are más utz xwil ri carreras chkij kej, are ta ri escuela. Utz ta xinwilo che kinbʼe pa ri escuela, más utz na xinwilo che kinbʼe pa ri lugar che kbʼan wi carreras chkij kej. Xuqujeʼ xenkejej jujun taq kej.

Chi’ qʼaxinaq chi ri tiempo xkʼaman chwe che kinbʼan apuestas y xenchʼabʼej kʼi ixoqibʼ. Xuqujeʼ xintij marihuana. Rech xinbʼan ronojel wariʼ, xinbʼan elaqʼ y xekʼojiʼ kʼi pistolas wukʼ. ¡Kʼi taq elaqʼ xinbʼano are kʼu kʼo ta nijun winaq xinkamisaj!

Xopan na jun qʼij xinchapik y xinkʼam bʼi pa cárcel. Are chiʼ xintzoqopix loq xinmaj chi ubʼanik ri xinbʼan ojer. Más kʼax chi na ri xinbʼano. Xinbʼano che jetaneʼ kʼo ta numak, are kʼu in itzel winaq y kinta ta chʼabʼexik. Xaq xiw chwij in kinchoman wi.

RI BIBLIA XUKʼEX RI NUKʼASLEMAL: Pa wajun tiempo riʼ che tajin kinbʼan itzel taq jastaq, ri nunan xumajij retaʼmaxik chrij ri Biblia y xux testigo rech Jehová. Ri xukʼex pa ri ukʼaslemal xubʼan chwe che xinchoman chrij. Y xwaj xwetaʼmaj jasche xukʼex ri ukʼaslemal, rumal laʼ xintzijon kukʼ ri testigos rech Jehová chrij ri Biblia.

Xwilo che ri areʼ pa ri Biblia kkesaj wi ri kkikʼutu, e junam ta kukʼ nikʼaj chik kojonem che xa kkimol ri kkibʼij. Xaq xiw e areʼ kkitzijoj ri utzij ri Dios chuchiʼ taq ja, junam rukʼ ri xkibʼan ri nabʼe taq cristianos (Mateo 28:19; Hechos 20:20). Ri loqʼoqʼenik che kkikʼut chbʼil taq kibʼ are waʼ xbʼanowik che xwilo che are ri qastzij kojonem (Juan 13:35).

Chiʼ xinmaj retaʼmaxik chrij ri Biblia, xinchʼobʼo che rajawaxik kinkʼex ri nukʼaslemal. Rumal che ri Jehová itzel kril ri tzʼil taq makaj y we kwaj kinbʼan ri kqaj chuwach rajawaxik kinya kan ubʼanik ronojel ri kubʼan kʼax che ri nukʼaslemal (2 Corintios 7:1; Hebreos 13:4). Sibʼalaj xinmayo chiʼ xwetaʼmaj che ri Jehová kkikotik o kbʼison rumal ri kinchaʼ ubʼanik pa ri nukʼaslemal (Proverbios 27:11). Rumal laʼ xinya kan ri marihuana y ri pistolas y xinkoj nuchuqʼabʼ rech kʼo jun utz nubʼantajik. Ri más kʼax xinbʼan kan che uyaʼik are ri ixoqibʼ y ri apuestas.

Kwaj taj che ri e wachiʼl kketaʼmaj che tajin kwetaʼmaj chrij ri Biblia kukʼ ri Testigos. Are kʼu xkʼextaj ri nuchomanik are chiʼ xinsikʼij ri utzij ri Jesús che kʼo pa Mateo 10:33: «Ri man kinuqʼalajisaj ta chkiwach ri winaq, xuqujeʼ ri in man kinqʼalajisaj ta chuwach ri nutat ri kʼo pa ri kaj». Rumal la’ aninaq xinbʼij chke ri e wachiʼl ri tajin kwetaʼmaj. Sibʼalaj xkimayo: kkikoj taj che kwaj kinux cristiano. Paneʼ je xkichomaj waʼ, are kʼu xinbʼij chke che kwaj kinkʼex ri nukʼaslemal.

RI TEWCHIBʼAL CHE NURIQOM: Ri nunan sibʼalaj xkikotik chiʼ xrilo che tajin kinbʼan pa nukʼaslemal ri tajin kwetaʼmaj pa ri Biblia. Chanim ri’ ri nunan kbʼison ta chik rumal che kʼo ta chi itzel jastaq kinbʼano. Are chiʼ kojtzijon oj kebʼ sibʼalaj kojkikotik: rumal che kqaloqʼoqʼej ri Jehová. Are chiʼ, kinchoman chrij ri xinbʼan kan ojer, kinmayo rumal che rukʼ ri utobʼanik ri Jehová xinkunik xinkʼex ri nukʼaslemal. Kimik kinchoman ta chi chrij ri tzʼil taq makaj xuqujeʼ kinrayij ta chi kʼi jastaq junam rukʼ ojer kanoq.

Qas kinchʼobʼo che wet mat xwetaʼmaj chrij ri Biblia weneʼ kʼa in kʼo na riʼ pa carcél o in kaminaq chik. Are kʼu kinkikotik rumal che xwetaʼmaj ri qastzij che kʼo pa ri Biblia, y qas kojkikot rukʼ ri nufamilia. Ri wixoqil y ri numiʼal kinkitoʼo rumal che kenimanik, y rukʼ kikotemal tajin kqapatanij ri Jehová. Wetaʼm ta ri kinbʼan che umaltyoxixik che xkʼut chnuwach chrij ri Biblia. Rumal laʼ kinkoj nuchuqʼabʼ rech kinkʼut chke ri winaq ri kubʼij ri Biblia. Xuqujeʼ kinmaltyoxin che ri Jehová che in kʼo pa ri utinamit y che xwetaʼmaj uwach.

[Comentario]

«Sibʼalaj xinmayo chiʼ xwetaʼmaj che ri Jehová kkikotik o kbʼison rumal ri kinchaʼ ubʼanik pa ri nukʼaslemal»

[Wachbʼal]

Rukʼ ri wixoqil xuqujeʼ ri numiʼal

[Wachbʼal]

Are chiʼ ri nunan xukʼex ri ukʼaslemal xubʼan chwe che kinchoman chrij