SAULO sajra kajta ruwasqanmanta, ¿pitaj kusikorqa?... Kuraj Supay Satanás, chantá judiospa religionninkuta kamachejkuna. Sauloqa Jesuspa yachachisqanman tukuspa, Pablo sutiwan rejsisqa karqa. Judiospa religionninkuta kamachejkunataj chejnikuyta qallarerqanku. ¿Reparankichu imaraykuchus Jesuspi creejkuna allin kajta ruwayta mana atillasqankuta?...

Uj kuti, kuraj sacerdote Ananiasqa, Pablota uyanpi sajmanankuta kamacherqa. Chantapis carcelman wisqʼachiyta munarqa. Apóstol Pabloqa Jesuspi creesqanrayku mayta ñakʼarerqa. Sajra runas seqʼorqanku, rumiswan chʼanqaspataj wañuchiyta munarqanku (Hechos 23:1, 2; 2 Corintios 11:24, 25).

Runasqa Diospa chejnisqan imasta ruwanapaj tanqawasun. Chayrayku tapurikuna: “¿Allin  kajta munakunipunichu? Chejniwajtinkupis, ¿allin kajta ruwallasajpunichu?”, nispa. Allin kajta ruwanapajqa wapu kana tiyan, ¿icharí?...

Ichá tapukunki: “¿Imaraykutaj allin kajta ruwajtiy chejniwanqankuri? ¿Manachu astawanpis munakunawanku kanman?”, nispa. Munakunawanchej allin kanman. Jesustapis runasqa allin imasta ruwasqanrayku munakoj kanku. Uj kutipi, Jesús uj wasipi kashajtin, llajtamanta tukuy runas chay wasi punkuman tantakamorqanku. Chayman rerqanku Jesús onqosqasta sanoyachisqanrayku (Marcos 1:33).

 Wakin kutistajrí, Jesuspa yachachisqanqa runasta phiñachej. Payqa mana llullatachu yachachej, chayrayku wakin runas chejnikoj kanku. Jesusqa ajinapi rikukorqa Nazaret llajtanpi. Chaypi payqa sinagogaman yaykorqa. Sinagogaspeqa judíos Diosta yupaychanankupaj tantakoj kanku.

Chaypitaj Jesusqa Diospa Palabranmanta sumajta sutʼincharqa. Qallariypeqa Jesuspa yachachisqan runasman mayta gustarqa, parlasqanmantataj tʼukorqanku. Mana creeyta aterqankuchu llajta masinku ajina sumajta yachachishasqanta.

Chantá Jesusqa parlarqa, Dios mana judío kajkunatapis bendecisqanmanta. Sinagogapi kajkunataj chayta uyarispa phiñarikorqanku. ¿Imaraykutaj?... Chay runasqa Dios paykunallata bendecisqanta yuyaj kanku, aswan sumaj runaspajtaj qhawakoj kanku. Chayrayku, Jesusta chejnikuyta qallarerqanku. ¿Yachankichu imanaytachus munasqankuta?...

Biblia nin: ‘Jesusta japʼispa llajtamanta orqhorqanku. Pusarqankutaj qaqa pataman, tanqaykuspa wañuchinankupaj. Jesustajrí chaupinkuta llojsispa, riporqa’, nispa (Lucas 4:16-30).

Ajinapi rikukuspa, ¿chay jina runasman Diosmanta yachachej kutiwajchu?... Kutinapaj, ¿wapucharí kana tiyan?... Watanman jina, Jesusqa Nazaretman kuterqa. Biblia nin: “Sinagogankupi yachachisharqa”, nispa. Jesusqa cheqa kajmanta parlallarqapuni, nitaj chay sajra runasta manchachikorqachu (Mateo 13:54).

Waj kutipi, Jesusqa sabadopi sinagogaman rerqa. Chaypitaj uj makin chʼakisqa runa kasharqa. Jesusqa chay runata sanoyachinanpaj Diosmanta atiyta japʼerqa. Wakin runastajrí, pantachiyta munarqanku. ¿Imatataj Jesús ruwarqa?... Paykunaman nerqa: ‘Pipis qankunamanta uj ovejayoj kaspa, sabadopi ovejan tʼoqoman urmaykojtin, ¿manachu orqhokapunman?’, nispa.

 Arí, sabadopipis ovejankuta orqhonkumanpuni karqa. Chayrayku Jesús nerqa: ‘¿Manachu runaqa aswan valorniyoj ovejamanta nisqaqa? Chayrayku sabadopipis allin kajtaqa ruwana’, nispa. Jesusqa makin chʼakisqa runata sanoyachinanpuni karqa.

Chayrayku chay runata nerqa: “Jaywariy makiykita”, nispa. Chay ratopachataj makin sanoyaporqa. Chay runaqa, ¡mayta kusikorqa! Chaypi kajkunarí, ¿kusikorqankuchu?... Mana. Jesusta astawan chejnikorqanku. Llojsiytawantaj, parlarqanku imaynamantachus payta wañuchinankumanta (Mateo 12:9-14).

Kunanpis ajinallataj. Imata ruwaspapis, mana tukuytachu kusichisun. Chayrayku pitachus kusichiyta munasqanchejta ajllana tiyan. Jehovata, Wawan Jesucristotawan kusichinapajqa, yachachiwasqanchejman jinapuni ruwana. Chayta ruwajtinchej, ¿pitaj chejniwasun? ¿Pitaj allin kajta ruwajta mana saqewasunchu?...

Kuraj Supay Satanás. ¿Pikunapiwantaj mana saqewasunchu?... Supaypa atiyninpi kajkuna. Jesusqa religionta kamachejkunaman nerqa: “Qankunaqa tataykichej Kuraj Supaymanta kankichej, chay tataykichejpa munaynintataj ruwayta munankichej”, nispa (Juan 8:44).

May chhika runas Supaypa munayninta ruwanku. Jesusqa chay runasta “kay pacha” nispa sutichan. ¿Imamantá parlasharqa “kay pacha” nispa?... Maskʼarina Juan 15:19 versiculota. Chaypi Jesús nerqa: “Kay pachajtachus kawajchej chayqa, kay pachamanta runasqa munakusunkichejman. Kunanrí mana kay pachajtachu kankichej, manachayqa noqa kay pachapi kajkunamanta ajllarqaykichej. Chayraykumin kay pachamanta runasqa chejnisunkichej”, nispa.

Jesusqa “kay pacha” nispa, payta mana kasojkunamanta parlasharqa. Paykunaqa Jesuspi creejkunata chejninku. ¿Imaraykutaj  chejninku?... Kaypi tʼukuriy. ¿Pitaj kay pachata kamachishan?... Biblia nin: ‘Kay pachapi kaj chhika runasqa Kuraj Supaypa atiyninpi kashanku’, nispa (1 Juan 5:19).

¿Reparankichu imaraykuchus mana atikullanchu allin kajta ruway?... Satanaswan, pachanwan sajra kajman tanqawasqanchejrayku. Nitaj chayraykullachu. ¿Yuyarikunkichu 23 yachaqanapi yachakusqanchejta?... Chaypeqa tukuypis juchayoj nacekusqanchejta yachakorqanchej. Jucha, Supay, sajra pachanpis chinkajtin, ¿sumajcharí kanqa?...

Biblia nin: “Kay pachaqa tukukapushan”, nispa. Chay niyta munan, Jesuspi mana creejkunaqa wiñay kausayta mana japʼinankuta, chinkachisqa kanankuta. Chantá, ¿pikunataj wiñaypaj kausanqanku?... Biblia nin: “Diospa munayninta ruwajrí, wiñaypaj kawsanqa”, nispa (1 Juan 2:17). Allin kajta ruwajkunalla, nisunman “Diospa munayninta” ruwajkunalla, mosoj pachapi wiñaypaj kausanqanku. Chayrayku, allin kajta ruway mana facilchu kajtinpis, allin kajtapuni ruwayta munanchej, ¿icharí?...