62 yachachiy

Davidpa wasinpi llakiykuna

DAVID Jerusalenpi kamachiyta qallarisqanmanta, Jehovaqa achkha maqanakuykunapi atipayta yanaparqa. Jehová Diosninchik israelitas Canaán jallpʼapi tiyakunankupaq parlarqa. Kunantaq Dios parlasqanmanjina Canaán jallpʼaqa paykunapta.

Davidqa juk allin kamachiq karqa. Payqa Jehovata munakuq. Chayrayku Jerusalenpi kachkaspaña, Jehovap trato ruwasqan arcanta chayman apan. Payqa Diospaq wasita ruwapuyta munan, chayman arcata churananpaq.

Chaymanta qhipaman, Davidqa mayta juchachakurqa. Payqa, runamanta imallatapis qhichuyqa mana allin kasqanta yacharqa. Chaywanpis, juk tuta wasin patamanta, juk kʼacha warmita rikurqa. Payqa Betsabé sutikurqa, qusantaq Urias, payqa Davidpa soldadon karqa.

Betsabep qusanqa karupi maqanakuchkarqa. chaykamataq David Betsabeta munapayaspa qhawasqanrayku, wasinman apachimuspa, paywan puñuykakapurqa. Chaymanta Davidpaq wiksallisqa rikhurirqa. Davidqa mana imanakuyta atispa, soldadosmanta kuraq kaq Joabwan maqanakuypi Uriasta ñawpaqman churachin, wañunanpaq. Urias wañuptintaq, David Betsabewan casarakun.

Jehová Davidwan mayta phiñakurqa. Chayrayku, profeta Natanta Davidpa juchanta rikuchinanpaq kacharqa. Kay urapi Natanta Davidtawan rikunkichu. Davidqa juchanmanta mayta pesachikuchkan, chayrayku Jehovaqa mana wañuchirqachu. Chaywanpis nirqa: ‘Kay saqra ruwaykunata ruwasqaykirayku, may chhika llakiykuna wasiykipi kanqa’, nispa. ¡May chhika llakiykunatataq David muchurqa!

Qallarinapaqqa, Betsabep churin wañun. Chanta, Davidpa kuraq churin Amnón Tamar pananta kallparpaspa paywan puñuykakapun. Chayrayku phiñakuspa Absalón Davidpa juknin churin Amnonta wañuchin. Chantá Absalón runaspata sunqunta suwaspa, reyjina sayaykun. David Absalonta juk maqanakuypi atipan, Absalontaq chaypi wañun. Ari, Davidqa may llakiykunata muchurqa.

Chay llakiykunapi Betsabé juk wawitata Salomón sutiyuqta nacechikun. David machuña, unqusqa ima kachkaptin churin Adonias rey kayta munarqa. Chayrayku, Davidqa Salomón rey kananta rikuchinanpaq sacerdote Sadocwan Salomonpa umanman aceiteta suruchirqa. Chaymanta tumpamantawan, David 40 watata kamachiytawan 70 watasniyuq wañupurqa. Chaymanta Salomón reyman tukun.

2 Samuel 11:1-27; 12:1-18; 1 Reyes 1:1-48.