IREN MEHN KASUKUHL 22

Ia Duwen Omw Kak Ehukihong Meteikan Rongamwahwo?

PLAY

Ni omw sukuhlkier padahk mehlel kan nan Paipel, mweinele ke pahn medewe, ‘Aramas koaros anahne ese duwen met!’ Mehlel, koaros anahne ese! Ahpw mwein ke kin salohki padahkihong meteikan dahme ke kin sukuhlki. Kitail pahn koasoiapene ia duwen atail kak sohla saloh oh tepida perenki ehukihong meteikan rongamwahu sang nan Paipel.

1. Ia duwen omw kak ehukihong aramas akan me ke ese dahme ke sukuhlkier?

Sapwellimen Sises tohnpadahk ko koasoia: “Se sohte kak uhdihsang koasoia duwen soahng kan me se kilangehr oh rongehr.” (Wiewia 4:20) Re uhdahn kesempwalki padahk mehlel me kahrehda re men ehukihong uwen aramas tohto me re kak. Ke kin ahneki soangen pepehm wet? Ma ei, rapahki ahnsou mwahu kan me ke kak koasoiaiong omw peneinei oh kompoakepahmw kan dahme ke sukuhlkier ni elen wahu.—Wadek Kolose 4:6.

Ahl akan me ke kak tapiada

Ni omw koasoiong omw peneinei, kihda ehu ire sang nan Paipel ni omw nda: “I sukuhlki mehkot ehu nan wihket.”
Ehukihong kompoakepahmw men me soumwahu de kin pwunod iren Paipel kangoang ehu.
Ma iengomw tohndoadoahk men idek dahme ke wia nan wihko, padahkihong dahme ke sukuhlki ni omw onopki Paipel de nan mihting en mwomwohdiso ehu.
Kasalehiong kompoakepahmw kan website jw.org.
Luke meteikan ren iang uhk onop Paipel, de kasalehiong irail duwen ar kak peki onop Paipel nan jw.org.

2. Dahme kahrehda e mwahu en iang mwomwohdiso kalohk?

Sapwellimen Sises tohnpadahk ko wia laudsang en ehukihong aramas akan me re ese duwen rongamwahwo. Sises ketin “poaroneirailpeseng mwowe wad riemen nan kahnimw” koaros pwe ren kalohk. (Luk 10:1) Wiepen koasoandi en kalohk wet elehda ahnsou mwahu ong aramas tohto ren rong rongamwahwo. Ni tohnpadahk ko ar kin ehupene kalohk, met pil kin wadohng irail peren laud. (Luk 10:17) Duwehte irail, ke kak nantihong iang mwomwohdiso kalohk ehu rahn?

KALAUDEHLA OMW ESE MET

Tehk ia duwen omw kak sohla nohn saloh oh ahneki peren me kohsang omw kin ehukihong meteikan rongamwahwo.

3. Siohwa pahn ketin ieiang uhk

Ekei aramas me men iang kalohk mweinele kin saloh pwehki dahme aramas pahn medewehkin irail de dahme aramas akan pahn wiahiong irail.

Ke kin salohki ehukihong meteikan dahme ke kin sukuhlki? Dahme kahrehda, de dahme sohki?

Kilang KISIN KASDO, oh mwuri koasoiapene peidek wet.

KISIN KASDO: I Prayed to Jehovah for Courage (4:05)

Dahme Sounkadehde pwulopwul pwukat wia pwe ren sohla masepwehk?

Wadek Aiseia 41:10, oh mwuri koasoiapene peidek wet:

Ma ke pehm me ke masak kalohk, ia duwen kapakap eh pahn seweseiuk?

Ke ese met?

Mie Sounkadehdehn Siohwa tohto me kin medewe me re sohte douluhl pahn kak ehukihong meteikan rongamwahwo mwohn ar tepida kalohk. Karasepe, Sergey kin pehm me sohte katepe oh e kin apwalki koasoiong aramas akan. Ahpw e tepida onopki Paipel. E nda: “Mendahki ei kin masepwehk, I tepida koasoiaiong meteikan dahme I kin sukuhlki. I pwuriamweikihla me ni ei kin koasoiaiong aramas akan duwen Paipel, met kalaudehla ei kamehlele me I kak wia soahng tohto. Oh met pil kakehlakahla ei pwoson.”

4. Kin kasalehda wahu

Ni omw ehukihong meteikan rongamwahwo, dehr medewehte dahme ke pahn nda ahpw pil medewe mwomwen omw pahn nda met. Wadek 2 Timoty 2:24 oh 1 Piter 3:15, oh mwuri koasoiapene peidek pwukat:

Ia duwen omw kak kapwaiada iretikitik pwukat ni omw koasoiaiong meteikan duwen Paipel?
Ekei omw peneinei de kompoakepahmw kan mwein sohte pahn pwungki dahme ke nda. Dahme ke kak wia? Dahme ken dehr wia?
Dahme kahrehda e mwahu en doadoahngki peidek kamantik kan a kaidehn en padahkihong aramas akan dahme re anahne kamehlele?

5. Ehukihong meteikan rongamwahwo kin wahdo peren

Siohwa ketikihong Sises doadoahk en ehukihong meteikan rongamwahwo. Ia sapwellimen Sises madamadau ong doadoahk wet? Wadek Sohn 4:34, oh mwuri koasoiapene peidek pwukat:

Kang mwenge mwahu kin kahrehiong kitail en kehlail oh peren. Dahme kahrehda Sises mahsanih me atail wia dahme Koht kupwurki, karasepe kalohk, kin duwehte mwenge?
Soangen peren dah me ke pahn alehdi sang ni omw ehukihong meteikan rongamwahwo?

Iren sawas kan

Erein mihting en nan wihk, kilang dahme ke kak sukuhlki duwen tepida koasoiong meteikan.
Koasoiong me kin onop rehmwo duwen omw kak wiahla emen tohnsukuhl en mihting wet. Kamwomwada pwukat kak seweseiuk en onopada mwahu en padahkihong meteikan dahme ke sukusukuhlki.
Doadoahngki wasa kan me nda “Ekei Aramas Kin Nda” de “Ma Emen Idek” pwe ken praktiski duwen omw pahn sapeng peidek oh uhwong kan.

MA EMEN IDEK: “Dahme ke kin wiewia rahnpwukat?”