E KIN apwal ong uhk en onop ehuehu wihk? Ele kitail koaros kin ahneki pepehm wet ekei pak. Ahpw medewehla soahng teikan me kitail kin kaukaule wia, duwehte duhdu. Duhdu kin anahne atail ahnsou oh nanti, ahpw mwurin duhdu, kitail kin uhdahn nsenamwahula! Onop Paipel pil kak kansenamwahu ni atail kin “kamwakelehkihda pihl, me iei mahseno.” (Ep. 5:26) Tehk iren sawas pwukat:

• Wiahda koasoandi ong ehuehu wihk. Wia pein omw onop en Paipel iei ehu rehn soahng kan me “keieu kesempwal” me Kristian men anahne wia. (Pil. 1:10) Pwehn seweseiuk en dehr manokehla ahnsoun onop, ntingihedi rahn oh ahnsou nan kisin doaropwe oh langahda wasa kis me ke kak kilang. De wiahda alarm nan noumw sehlpwohno pwehn katamankihong uhk mwohnte omw pahn onop.

• Pilada ahnsou oh wiepen onop me pahn keieu mwahu ong uhk. Mehnia me mengei ong uhk? Karasepe, e pahn mengei ong uhk en onop oh sohte medewe soahng teikan likin onopo erein awa ehu? De ke mwahuki ken kin kalapw onop ahpw ongete ahnsou mwotomwot? Kowe me ese dahme pahn keieu mwahu ong uhk. Eri medewe met ni omw wiahda omw ahnsoun onop. Ma ke pehm ke sohte men onop ni ahnsou me ke koasoanedier, ia duwe, ke kak song en onopkihte minit eisek? Mehnda ma ke onopkihte minit eisek, ke kak sukuhlki soahng tohto. Oh mwein mwurin minit eiseko, ke uhdahn pahn perenkihda onopo me kahrehda ke pahn men doulahte onop ekis werei.—Pil. 2:13.

• Pilada mwowe dahme ke pahn onopki. Ma ke mwohndi oh tepida medewe dahme ke pahn onopki, ele ke sohte kin ‘doadoahngki mwahu omw ahnsou.’ (Ep. 5:16) Song en ntingihedi soangen oaralap kan me ke men onopki. Karasepe, ma mie omw peidek duwen soahng ehu me ke sohte uhdahn wehwehki, ntingihedi peideko. Oh ni imwin ehuehu onop, ele ke kak kapatahiong oaralap teikan me ke men onopki.

• Wiahda wekidekla kan ni ahnsou me anahn. Dahme keieu kesempwal iei omw kin kaukaule onop. Pwehn kapwaiada met, ma anahn, wekidala rahn oh ahnsou en omw onop, uwen werei, de oaralap dah me ke onopki.

Ma kitail kin onop ehuehu wihk, e pahn imwila mwahu. Atail nanpwungmwahu rehn Siohwa pahn kehlailla, kitail pahn sukuhlki en wiahda pilipil mwahu kan nan atail mour, oh kitail pahn ale kangoang.—Sos. 1:8.