Paipel—Poahsoan Likilik Ehu ong me Mehlel
Erein poadopoad, aramas sang wasa tohto medewehier me Paipel wia poahsoan likilik ehu ong me mehlel. Rahnwet aramas rar kei kin idawehn eh padahk kan. Ahpw meteikan kin medewehki Paipel nin duwen pwuhk ehu me sohte kesempwal de likamw. Dahme ke kin medewe? Ke kak diarada me mehlel nan Paipel?
DAHME KAHREHDA KE KAK LIKIH PAIPEL
Ia duwen omw kak diarada ma ke kak likih Paipel? Medewehla duwen ehu karasaras: Ma kompoakepahmw men kin ahnsou koaros koasoiaiong uhk me mehlel erein sounpar tohto, ele ke pahn wiahkihla ih aramas likilik men. Ia duwe, Paipel kin duwehte kompoakepahmw likilik men me kin ahnsou koaros koasoiaiong uhk me mehlel? Tehk ekei karasepe kan.
Sounnting Mehlel kan
Sounnting en Paipel kan kin uhdahn mehlel, kalapw kasalehda pein arail sapwung kan oh luwet akan. Karasepe, soukohp Sona ntingihedi duwen pein eh sapeik kan. (Sona 1:1-3) Ni mehlel, e kaimwisekala nah pwuhko nan Paipel ni eh kasalehda ia duwen Koht eh ketin kaweid ih, ahpw e sohte koasoia ia duwen eh kapwungala eh madamadau. (Sona 4:1, 4, 10, 11) Mehlelen sounnting en Paipel kan koaros kin kasalehda me irail kin uhdahn nsenohki me mehlel.
Me Mehlel me Kin Sawas
Ia duwe, Paipel kin ahnsou koaros kihda kaweid mwahu duwen dahme kin wiawi nan mour? Uhdahn. Karasepe, tehk dahme Paipel mahsanihki duwen ahneki nanpwungmwahu rehn meteikan: “Ihme kahrehda, soahng koaros me kumwail men aramas en wiahiong kumwail, kumwail pil anahne wiahiong irail.” (Madiu 7:12) “Sapengki ngihl tikitik kin kameleilei lingeringer, ahpw ngihl kehlail kin kamwakidada.” (Lepin Padahk 15:1) Ei, me mehlel en Paipel kin sawas mwahu rahnwet, duwehte ni ahnsou me e tepin ntingdi.
Poadopoad Mehlel
Soahng tohto me semen en poadopoad kan diarada erein pahr samwalahr ko kadehdehda me soangsoangen aramas akan, wasa kan oh mwekid kan me ntingdi nan Paipel uhdahn mie. Nin duwen karasepe ehu, tehk duwen mehn kadehde en oaritik tikitik ehu. Paipel kasalehda me ni mwehin Nehmaiao, mehn Dair kan (mehn Penisia kan sang Dair) me kin mihmi nan Serusalem “wahdo mwahmw oh soangen kepwe koaros.”—Nehmaia 13:16.
Mie mehn kadehde en utung iretikitik en Paipel wet? Ei, mie. Semen en poadopoad kan diaradahr kepwehn Penisia kan nan Israel, met kasalehda me netinet nanpwungen wehi riau pwukat mahs kin wiawi. Patehng met, re sarepadahr mwahmw kei sang Mediderenien nan Serusalem. Semen kan kamehlele me sounnetinet ko me wahdo mwahmw ko sang limwahn sehd doh ehu. Mwurin arail tehk mehn kadehde wet, emen semen nda: “Ireo nan Nehmaia 13:16 duwen mehn Dair kan ar kin netiki mwahmw nan Serusalem mwomwen pwung.”
Mehlelpen Palien Sains
Paipel iei pwuhk sarawi kesempwal ehu oh pwuhken poadopoad. Ahpw ni eh kin pidada soahng kan me pid duwen sains, e kin pwungiong palien sains. Tehk ehu karasepe.
Mpen sounpar 3,500 samwalahro, Paipel kasalehda me sampah langalang “nan wehwe.” (Sohp 26:7) Met weksang douluhl soai likamw kan me koasoia me dene sampah wie peipei nan pihl de e mihmi pohn lapalahn wehi men. Sounpar 1,100 samwa mwurin pwuhken Sohp eh ntingda, aramas akan pousehlahte kamehlele me sampah sohte kak langalangte nan wehwe; e anahne mehkot pwehn mi powe. Sounparte silipwuki samwalahr ko, nan 1687, Isaac Newton ntingihedi dahme e diarada duwen kehl ehu me ahneki gravity oh kawehwehda me sampah wie piripir nan wehwe ni manaman soh sansal ehu me kamwakamwakid. Mwekid en sains kesempwal wet kamehlelehla dahme Paipel mahsaniher sounpar 3,000 kei mwoweo!
Kokohp Mehlel
Ia uwen pwung en kokohp tohto kan me mi nan Paipel? Medewe duwen ehu karasepe: Kokohp en Aiseia duwen ohlahn Papilon.
Kokohpo: Mpen pahr 732 mwohn Krais, sounnting en Paipel Aiseia kanekehla eh ntingihedi eh kokohpo. Nan kokohpo, e pakairkihda me Papilon—me mwuhr wiahla kahnimw kesempwal en wehi kehlail ehu—pahn lohdi oh kedekedeo sohla aramas pahn mi mwo. (Aiseia 13:17-20) Aiseia pil kasalehda eden ohl me pahn kapwaiada met—Sairus. E pil koasoia duwen en Sairus koasoandi en mahweno, ni eh koasoia me pillap kan pahn ‘madada.’ Oh e kohpada me wenihmw kan en kelen kahnimwo pahn wie langalang.—Aiseia 44:27–45:1.
Eh Pweidao: Sounpar 200 kei mwurin en Aiseia kokohpo, nanmwarkien Persia men mahweniong Papilon. Ia edeo? Sairus. Pwehki e apwal en pedolong nan Papilon, Sairus medewehda en doadoahngki Pillap Iupreitis, me kohlongala nan kahnimwo. Nah sounpei ko weirada dahu ehu pohnangin wasa me pihlo kin kusukuhdihla nan kahnimwo oh kakusala pihlo nan lehpwel ieu. Met kapedepedihala pihlo, pwe nein Sairus karis en sounpeio en kak alu nan pihl me mi ni kelen kahnimwo, me pedepedalahr lel ni wedin nehrail ko. E kapwuriamwei me mehn Papilon ko mweidohng wenihmw en kahnimwo me sallahng ni pihlo en langalangte! Nein Sairus karis en sounpeio eri kohlongala nan Papilon ni arail pedolong ni wenihmw me wie langalang ko, oh eri powehdi kahnimwo.
Ahpw, ire mehlel ehu mihmihte: Papilon wiahla wasa ehu me sohte me kin mi loale? Sounpar epwiki kei mwuri, aramas kin koukousoante mwo. Ahpw rahnwet, mohn kahnimw en Papilon, me karanih Baghdad, Iraq, kadehdehda me kokohp en Paipel pweidahr. Ei, Paipel kin likilik pil ni ahnsou me e kin koasoia duwen dahme pahn kin wiawi ni ahnsou kohkohdo.
