1, 2. (a) Iahd me kisakis ehu kin wia mehkot kesempwal ong uhk? (b) Dahme kahrehda kitail kak nda me pweinen pweipwei sapahl iei kisakis keieu kesempwal me ke kak ale?

 MEHNIA kisakis me keieu laud me ke alehier? Kisakis ehu sohte anahne en pweilaud pwe dene en kesempwal. Kaidehn pweinen kisakis ehu me pahn kasalehda ia uwen kesempwalpe. Ahpw, ahnsou me kisakis ehu kin wahdohng uhk peren de kaitarala anahn mehlel ehu nan omw mour, e kin wia mehkot inenen kesempwal ong uhk.

² Nanpwungen kisakis tohto me ke kak kasik ken ale, mie ehu me siksang koaros. Iei met kisakis ehu sang rehn Koht ong tohnsampah. Siohwa ketikihongehr kitail soahng tohto, ahpw sapwellime kisakis me keieu laud ong kitail iei meirong en pweipwei sapahl en sapwellime Ohl, Sises Krais. (Wadek Madiu 20:28.) Nin duwen atail pahn kilang nan irelaud wet, pweinen pweipwei sapahl wet me wia kisakis keieu kesempwal me ke kak ale pwehki e kak kahredohng uhk peren mwuledek oh pil kak kaitar omw anahn kesempwal kan. Pweinen pweipwei sapahl wet wia kasalepen sapwellimen Koht limpoak me keieu laud ong uhk.

3. Dahkot pweinen pweipwei sapahl? Dahme kitail anahne wehwehki pwe kitail en kak kalahnganki kisakis kesempwal wet?

³ Pweinen pweipwei sapahl iei sapwellimen Siohwa elen kamaiau de doare aramas sang dihp oh mehla. (Episos 1:7) Pwe kitail en kak wehwehki padahk en Paipel wet, kitail anahne pwurehng tamanda dahme wiawi nan mwetuwel en Ihden. Ma kitail wehwehkihla dahme Adam kesehla ni ahnsou me e wiahda dihp, met pahn kahrehiong kitail en kak wehwehki dahme kahrehda pweinen pweipwei sapahl wet wia kisakis kesempwal ehu ong kitail.

4. Ia mwomwen mour en Adam ni ahnsou me e wia aramas unsek men?

⁴ Ni ahnsou me Siohwa ketin wiahda Adam, e ketikihong ih mehkot me inenen kesempwal, me iei mouren aramas unsek. Medewe ia mwomwen met ong Adam. Pwehki eh wiawihkihda paliwar oh madamadau unsek, e sohte pahn soumwahuda, mahla de pil mehla. Pwehki eh wia aramas unsek men, ehupene nanpwungen ih oh Siohwa inenen kerenpene. Paipel mahsanih me Adam wia “sapwellimen Koht.” (Luk 3:38) Kahrehda ara kerenpene duwehte pwutak emen rehn eh pahpa men me inenen limpoak. Siohwa kin ketin mahseniong Adam oh kin ketikihong ih doadoahk kaperen kan oh ketin kaesehkin ih dahme e anahne wia.​—Senesis 1:28-30; 2:16, 17.

5. Ia wehwehn Paipel eh mahsanih me Koht ketin wiahda Adam “rasehng ih”?

⁵ Koht ketin wiahda Adam “rasehng ih.” (Senesis 1:27) Met sohte wehwehki me paliwere duwehte Koht. Duwen atail sukuhlkier nan Irelaud 1 en pwuhk wet, Siohwa iei ngehn soh sansal men. (Sohn 4:24) Kahrehda Siohwa sohte sapwellimaniki paliwar me uduk oh nta. Wiawihda rasehng Koht wehwehki me Adam kepikipikda oh ahneki irair akan me duwehte sapwellimen Koht me iangahki limpoak, erpit, pwung pahrek, oh kehl. Adam pil kin rasehng  semeo ni ehu ahl kesempwal tohrohr pwehki e ahneki saledek en wia pilipil kan. Kahrehda, Adam weksang misihn ehu me kak wia ihte doadoahk me koasoandier en wia. Ni pali teio, e kak wiahda pilipil kan, e kak pilada mehnia me pwung oh sapwung. Ma e pahn pilada en peikiong Koht, e pahn kakete mour soutuk nan Paradais nin sampah.

6. Ahnsou me Adam sapeikiong Koht, dahme e katihasang? Dahme met wiahiong kadaudoke kan?

⁶ Eri, ahnsou me Adam sapeikiong Koht oh aleier kalokepe me iei mehla, e katihasang mehkot me inenen kesempwal. Dipeo kahrehiong ih en katihasang eh mour nin duwen aramas unsek men oh pil kapai kan koaros. (Senesis 3:17-19) Me kansensuwed, pwe kaidehn Adam kelehpw me katihasang mour kesempwal wet ahpw pil kadaudoke kan koaros. Mahsen en Koht mahsanih: “Dihp tepidohng sampah sang rehn aramas tehmen [Adam], ahpw tialahng mehla. Eri, mehla lelohngehr aramas koaros, pwe aramas koaros dipadahr.” (Rom 5:12) Kitail koaros sohsohki dihp sang rehn Adam. Kahrehda Paipel mahsanih me e ‘netikihla’ pein ih oh nah seri kan ong nan kalidu en dihp oh mehla. (Rom 7:14) Sohte koapworopwor ong Adam oh Ihp pwehki ira pein piladahr en sapeikiong Koht. Ahpw ia duwen kadaudokara kan, iangahki kitail?

7, 8. Pweinen pweipwei sapahl kin poahsoankihda soahng riau dah kan?

⁷ Siohwa ketin kapitkihla tohnsampah koasoandi en pweinen pweipwei sapahl. Dahkot pweinen pweipwei sapahl? Pweinen pweipwei sapahl kin poahsoankihda soahng riau. Keieu, pweinen pweipwei sapahl iei pweipwei ehu me kin wiawi pwehn kasaledekla de pwain pwehn kapwurehdo mehkot. E kak rasehng pweipwei ehu me wia mehn kasaledekihala aramas emen me lohdi nan mahwen. Keriau, pweinen pweipwei sapahl iei pweipwei ehu  me kin wiawi pwehn pwainla pweinen mehkot. Karasepe, ma aramas emen me kahrehda aksident ehu, e pahn pwain wehieu me pahn pahrekiong pweinen dahme e kauwehla.

⁸ Dahme anahne wiawi pwehn pwainla luhs laud me Adam kahredohng kitail koaros oh en kapitkitailsang nan kalidu en dihp oh mehla? Kitail pahn tehkpene duwen pweinen pweipwei sapahl me Siohwa ketikihda oh dahme met kak wiahiong kitail.

9. Soangen pweinen pweipwei sapahl dah me anahn en wiawi?

⁹ Pwehki mour en aramas unsek men me salongala, sohte mouren aramas soh unsek kak pwainda sapahl. (Melkahka 49:7, 8) Dahme anahn iei pweinen pweipwei sapahl ehu me pahn pahrekiong dahme salongalahro. Met pahrekiong koasoandi en pwung pahrek me dierek nan Mahsen en Koht, me mahsanih: “Mour ong mour.” (Lipai 24:18) Dahme pahn pwainla pweinen mour en aramas unsek men me Adam kasalongehlahro? Iei pil ehu mour en aramas unsek men me wia pweinen pweipwei sapahl me pahrekiong dahme salongalahro.​—1 Timoty 2:6.

10. Ia duwen Siohwa eh ketikihda pweinen pweipwei sapahl?

¹⁰ Ia duwen Siohwa eh ketikihda pweinen pweipwei sapahl wet? E ketin kadarodo emen sapwellime ngehn unsek ong sampah. Ahpw Siohwa sohte ketin kadar ngehn sohte lipilipil. E ketin poaronehdo ih me e kin ketin keieu kesempwalki, iei sapwellime Iehroso. (Wadek 1 Sohn 4:9, 10.) Sapwellimen Koht menet kupwurperenki ketidihdo sang nanleng. (Pilipai 2:7) Nin duwen atail sukuhlki nan irelaud en mwoweo nan pwuhk wet, Siohwa ketikihda manaman ehu ni eh ketin kasawada mour en sapwellime Ohlo ong nan kapehden Mery. Pwehki sapwellimen Koht  manaman, Sises ketin ipwidier oh wia aramas unsek emen oh sohte iang mi pahn keriahn dihp.​—Luk 1:35.

11. Ia duwen aramas tehmen eh kak wia pweinen pweipwei sapahl ehu ong aramas tohto?

¹¹ Ia duwen aramas tehmen eh pahn kak wia pweinen pweipwei sapahl ehu ong aramas tohto? Ia duwen tohnsampah kan wiahla aramas dipan akan? Tamanda me ni eh dipada, Adam kesehla kapai kesempwal en ahneki mour nin duwen aramas unsek men. Kahrehda, e sohla kak kadaur mour unsek ong nah seri kan. Dahme e kak uhd wia iei kadaur dihp oh mehla. Sises, me Paipel kahdaneki “Adam en . . . mwuhro,” sapwellimanki mour unsek nin duwen aramas oh sohte ketin wiahda dihp. (1 Korint 15:45) Me wehwehki Sises ketin wiliandi Adam pwehn doareikitailla. Ni eh ketin tounmeteikihla sapwellime mour unsek oh peikiong Koht ni unsek, Sises ketin pwainlahr pweinen dipen Adam. Kahrehda, Sises ketikihdo koapworopwor ong kadaudoken Adam akan.​—Rom 5:19; 1 Korint 15:21, 22.

12. Dahme sapwellimen Sises lelepek pahn lokolok kin kadehdehda?

¹² Paipel kawehwehda ni oaritik duwen lokolok me Sises ketin lelohng mwohn eh pwoula. E ketin lelohng wowoki, poasdahng nin tuhkehn kalokoloko, oh lokolok lao pwoula. (Sohn 19:1, 16-18, 30; oaralap en Oaritik kan, “E Konehng Kristian akan en Doadoahngki Lohpwu nan Arail Kaudok?”) Dahme kahrehda e kesempwal Sises en ketin lelohng lokolok laud? Mwuhr nan ehu irelaud nan pwuhk wet, kitail pahn sukuhlki me Sehdan peidengki ma mie sapwellimen Siohwa ladu kan nin sampah me pahn kak wie kolokolete arail lelepek ma re pahn lelohng kalokolok. Sang ni eh dadaur oh lelepek mendahki eh kin ketin lelohng lokolok laud, Sises kin ketikihda pasapeng keieu kehlail pwehn sapeng ahn Sehdan peideko. Sises ketin kadehdehda me aramas unsek men me ahneki saledek en pilipil kak kolokol eh lelepek unsek ong Koht mendahki dahme Sehdan wiahiong  ih. Siohwa uhdahn kupwurperenkihda sapwellime ohl kesempwalo eh lelepek ong ih!​—Lepin Padahk 27:11.

13. Ia duwen pweinen pweipwei sapahlo eh pweipweila?

¹³ Ia duwen pweinen pweipwei sapahlo eh pweipweila? Ni rahn kaeisek pahieu en sounpwong en Nisan en kalendar en mehn Suhs akan nan pahr 33, Koht ketin mweidala sapwellime Ohl unsek oh sohte dipeo en kamakamala. Sises ketin meirongkihla sapwellime mour en aramas unsek “pahn mehpak.” (Ipru 10:10) Ni rahn kesiluh mwurin Sises eh pwoulahr, Siohwa ketin kaiasada ih ong ni mour nin duwen ngehn emen. Ni eh ketier nanleng, Sises patohwanlahng Koht pweinen sapwellime mour en aramas unsek me e meirongkihlahro. Met iei pweinen pweipwei sapahl ehu pwehn pwainkihda nein Adam seri kan. (Ipru 9:24) Siohwa ketin alehda pweinen sapwellimen Sises meirongo nin duwen pweinen pweipwei sapahl ehu me anahn pwehn kamaiauda tohnsampah sang dihp oh mehla.​—Wadek Rom 3:23, 24.

14, 15. Pwe kitail en kak ale mahkpen “dipatail kan,” dahme kitail en wia?

¹⁴ Mendahki atail dipan, kitail kak ale kapai kan sang pweinen pweipwei sapahl. Kitail tehk ekei kapai kan me kitail kak ale ni ahnsou wet oh pil ni ahnsou kohkohdo sang sapwellimen Koht kisakis keieu laud wet.

¹⁵ Mahkpen dihp akan. Pwehki kitail sohsohki soh unsek, e kin apwal en wiahda dahme pwung. Kitail koaros kin wiahda dihp ni lokaia de ni wiewia. Ahpw pwehki sapwellimen Sises meirong en pweipwei sapahl, kitail kakehr ale mahkpen “dipatail kan.” (Kolose 1:13, 14) Ahpw, pwe kitail en kak ale soangen mahk wet, kitail anahne koluhla mehlel. Ni karakarahk, kitail pahn peki rehn Siohwa mahk, oh met pahn poahsoankihda atail pwoson meirong  en pweipwei sapahl me sapwellime Ohlo ketikihda.​—Wadek 1 Sohn 1:8, 9.

16. Dahme kahrehiong kitail en kak kaudokiong Koht ni nsenmwakelekel? Ia kesempwalpen kolokol soangen nsenmwakelekel wet?

¹⁶ Nsenmwakelekel mwohn Koht. Ma kitail sohte ahneki nsenmwakelekel, e pahn mengei kitail en ahneki pepehm me sohte atail koapworopwor oh sohte katepatail. Ahpw pwehki mahk eh miehier pwehki pweinen pweipwei sapahl wet, Siohwa ni kadek ketin kamangaiong kitail en kaudokiong ih ni nsenmwakelekel mendahte atail soh unsek. (Ipru 9:13, 14) Met kamangaiong kitail en ahneki saledek en patohong Siohwa. Kahrehda kitail kak kapakapohng ih ni saledek. (Ipru 4:14-16) Kolokol nsenmwakelekel kin wahdo meleilei en madamadau, kakairada pepehm en katepatail oh wahdo peren.

17. Soangen kapai dah kan kakehr wiawi pwehki Sises eh ketin pwoukinkitailla?

¹⁷ Koapworopwor en mour soutuk nan paradais nin sampah. Rom 6:23 mahsanih: “Pweinen dihp, iei mehla.” Iretikitik wette pil kapatahiong: “Ahpw sapwellimen Koht kisakis sapan, iei mour soutuk rehn Krais Sises atail Kaun.” Nan Irelaud 3 en pwuhk wet, kitail koasoiapene duwen kapai kan me pahn wiawi nan Paradais nin sampah. (Kaudiahl 21:3, 4) Soangen kapai en ahnsou kohkohdo pwukat koaros, iangahki mour soutuk ni roson unsek, kak mie pwehki Sises eh ketin pwoukinkitailla. Pwe kitail en kak ale kapai pwukat, kitail anahne kasalehda me kitail kalahnganki kisakis en pweinen pweipwei sapahl.

18. Dahme kahrehda kitail anahne kalahngankihong Siohwa sapwellime kisakis en pweinen pweipwei sapahl wet?

¹⁸ Dahme kahrehda kitail anahne uhdahn kalahngankihong Siohwa sapwellime kisakis en pweinen pweipwei  sapahl? Kisakis ehu kin inenen kesempwal ma aramaso pahn doadoahk laud oh doadoahngkihla ahnsou laud oh mwohni laud pwehn kihda kisakiso. E kin sair loalatail ni atail kin kilang me kisakiso wia kasalepen ahn me kisikise kitailo limpoak mehlel ong kitail. Pweinen pweipwei sapahl wet iei kisakis me keieu kesempwal sang kisakis koaros pwehki Koht ketin wia tounmetei ehu me keieu laudsang koaros me e ketin wiahier. Sohn 3:16 mahsanih: “Iei uwen Koht eh ketin loalloale sampah, me e ketikihdohki Sapwellime Iehros.” Pweinen pweipwei sapahl me wia kasalepen sapwellimen Siohwa limpoak me keieu laud ong kitail. E pil wia mehn kadehdehpen sapwellimen Sises limpoak pwehki e kupwurki ketikihda sapwellime mour pwehki kitail. (Wadek Sohn 15:13.) Kisakis en pweinen pweipwei sapahl wet kin kamehlelehiong kitail me Siohwa oh sapwellime Ohlo ketin poakohng emenemen kitail.​—Kalesia 2:20.

19, 20. Ni soangen ahl dah kan me ke kak kasalehda me ke kalahnganki sapwellimen Koht kisakis en pweinen pweipwei sapahl?

¹⁹ Ia duwen omw kak kasalehda me ke kalahnganki sapwellimen Koht kisakis en pweinen pweipwei sapahl?  Keieu, ke anahne kalaudehla omw wehwehki duwen Siohwa me ketikihong kitail kisakis wet. (Sohn 17:3) Omw sukuhlki Paipel ni omw doadoahngki pwuhk wet pahn sewese iuk en wia met. Ni omw pahn kalaudehla omw wehwehkihla duwen Siohwa, omw poakohng ih pahn laudla. Limpoak wet pahn uhd kamwakid uhk en men kaperenda ih.​—1 Sohn 5:3.

²⁰ Pwoson sapwellimen Sises meirong en pweipwei sapahl. Me pid duwen Sises, Paipel mahsanih: “Mehmen me kin pwosonla Sapwellime Iehros, iei ih me kin ahneki mour soutuk.” (Sohn 3:36) Ia duwen atail kak pwoson Sises? Soangen pwoson wet sohte kin sansaliki lokaia kelehpw. Seims 2:26 mahsanih: “Pwoson, ma sohte wiewia iang, pwoson mehla ehu.” Ei, pwoson mehlel kin sansalikihda atail “wiewia” kan. Ehu ahl en kasalehda me kitail pwoson Sises iei sang ni atail kin wia uwen atail kak pwehn kahlemengih ih kaidehn sang koasoite ahpw pil dahme kitail kin wia.​—Sohn 13:15.

21, 22. (a) Dahme kahrehda kitail anahne iang towehda Saken Soutik en Kauno me kin wiawi sounpar koaros? (b) Dahme Irelaud 6 oh 7 pahn kawehwehda?

²¹ Iang towehda kataman en Saken Soutik en Kauno. Ni soutik en Nisan 14, pahr 33, Sises ketin wiahda kataman tohrohr ehu me Paipel kahdaneki “Saken Soutik en Kauno.” (1 Korint 11:20, NW; Madiu 26:26-28) Kataman wet pil kin adaneki Katamanpen pwoulahn Krais. Sises ketin wiahda met pwehn sewese sapwellime wahnpoaron ko oh koaros me pahn wiahla Kristian mehlel akan en tamataman me pwehki sapwellime pwoula nin duwen aramas unsek emen, e ketikihda sapwellime mour pwehn wia pweinen pweipwei sapahl ehu. Ong kataman wet, Sises mahsanih: “Kumwail wia met ong ni katamanpei.” (Luk 22:19) Iang towehda Katamano kin katamankin  kitail duwen limpoak laud me Siohwa oh Sises kin ketin kasalehda sang pweinen pweipwei sapahl wet. Kitail kak kasalehda atail kalahnganki pweinen pweipwei sapahl wet sang ni atail pahn iang towehda Katamanpen pwoulahn Sises nan pahr koaros. a

²² Sapwellimen Siohwa koasoandi en pweinen pweipwei sapahl kin uhdahn wia kisakis kesempwal ehu. (2 Korint 9:14, 15) Kisakis kesempwal wet kak wia kamwahu ong pil irail me melahr akan. Irelaud 6 oh 7 pahn kawehwehda duwen met.