3 Wuarom motten de goode Menschen lieden?
Wuarom es daut wichtich to weeten?
Wan goode Menschen lieden motten, dan tal wie daut nich fa rajcht. Eenje es dan soo: “To waut dan noch goodet doonen?”
Toom nodenkjen
Eenje jleewen, daut Menschen emma wada stoawen un fresch jebuaren woaren. Dee sajen, daut wan een Mensch goodet jedonen haft, dan woat dee fresch jebuaren un haft daut dan scheen. Oba wan deejanja schlajchtet jedonen haft, dan mott dee toobrinjen. Wan daut soo wia, dan wudd een Mensch, waut nu een goodet Läwen fieet, lieden motten, bloos wäajen dee en een verhäajet Läwen schlajchtet jedonen haud. Oba denkj wie mol:
-
Waut wudd daut halpen, wan deejanja, waut minkj fresch jebuaren wia, sikj nich mol von sien väajet Läwen besennen kunn?
-
Wan wie aulmols krank woaren un Ojjlekjs haben wäajen daut, waut wie ea mol jedonen haben, to waut wudd wie dan noch sea proowen, jesunt to bliewen un Ojjlekjs väatobieejen?
LIA NOCH MEA
Kjikj daut Video Wuarom lat Gott too, daut daut soo väl Lieden jeft? opp jw.org.
Waut sajcht de Schreft?
Wan wie lieden motten, dan es daut nich eene Strof von Gott.
Välet es bloos Ojjlekj: Wie wieren wua opp eene onpaussende Städ ooda to eene onpaussende Tiet.
“Dee wäa daut bosichste ranen kaun, jewent nich emma dän Rees; dee stoakjsta Soldot, jewent nich emma dän Kjrich; dee waut weis sent, haben uk nich emma jenuach to äten; dee waut väl weeten, sent nich emma rikj; un dee waut goot aunjeseenen sent, kjrieen nich emma dän basten Plauz. Tiet un Jlekj spälen emma eene Roll” (LIERA 9:11)
Välet Lieden kjemt, wäajen wie fälahauft sent.
De Menschen räden foaken von “Sind”, wan een Mensch waut schlajchtet jedonen haft. Oba de Schreft rät uk von de Sind, waut aule Menschen metjeorwen haben: de Goode uk de Schlajchte.
“De Sind wia en mie aus ekj em Muttalief aunsad, un wia en mie aus ekj jebuaren wia” (PSALM 51:7)
De Sind haft de Menschen grooten Schoden jebrocht.
De Sind haft daut jeschot, woo wie ons met Gott stonen un daut aulet aundre uk nich mea soo toopschauft, aus daut wudd sellen. Un daut haft de gaunze Menschheit, un uk jiedrem eenen oppoat, sea väl Lieden veuasoakt.
“Ekj mucht daut goode doonen oba daut beese es noch en mie” (REEMA 7:21)
“De gaunze Kjreatua [deit] noch emma stänent en Jeburtsweedoag lieden” (REEMA 8:22)
