De ieeschta Breef aun Timotäus 3:1-16
3 Dise Wieed sent opp to veloten: Wan een Maun* doano sträft, een Oppsechta to woaren, dan es dee ut no een goodet Woakj.
2 Eenen Oppsechta saul met nuscht to beschuljen gonen; dee kaun bloos eene Ehefru haben; dee saul en siene Jewanheiten utjejlikjt sennen; kloa denkjen kjennen*; ordentlich sennen; oppnäment sennen; emstaund sennen, aundre to lieren.
3 Daut saul nich een Drinkja sennen; nich eena, waut Jewault* brukt. Daut saul eena sennen, waut nich bloos opp sienen Stekj stonen blift*; nich opp strieden helt un nich daut Jelt leeft.
4 Daut saul een Maun sennen, waut dee, waut to sien Hus jehieren, fein weet veropptogonen* un soone Kjinja haft, waut unjadon sent un sikj derchjedocht un iernst oppstalen.
5 (Wiels wan een Maun nich weet, dee von sien Hus veropptogonen*, woo woat dee sikj dan kjennen om Gott siene Vesaumlunk kjemren?)
6 Daut saul nich een Maun sennen, waut korz toom Gloowen jekomen es, daut dee nich met eenst voll Stolt woat un dan krakjt soo veuadeelt woat aus de Beesa Fient.
7 Un dan uk noch saul dee eenen gooden Nomen* haben bie dee, waut nich to de Vesaumlunk jehieren, soo daut kjeena dän met waut beschuljen kaun*, un daut dee nich en dän Beesen Fient siene Schlenj nennkjemt.
8 Krakjt soo sellen uk de Vesaumlungshelpa* riep* sennen; nich onopprechtich sennen em Räden*; nich väl Wien drinkjen; nich bejierich sennen no onopprechtjen Vedeenst.
9 Dee sellen dän christeljen Gloowen, aulsoo daut heilje Jeheemnis*, met een reinet Jewessen fausthoolen.
10 Buta daut saul dee ieescht mol jeprooft woaren, aus dee dän Deenst doonen kjennen*; wan dee dan met nuscht to beschuljen jeit, dan lot dee aus Vesaumlungshelpa* deenen.
11 De Frues sellen uk riep* sennen; nich äwa aundre utholen toom dee eenen schlajchten Nomen moaken; utjejlikjt sennen en äare Jewanheiten un en aule Stekjen tru sennen.
12 De Vesaumlungshelpa* kjennen bloos eene Ehefru haben; dee sellen äare ieejne Kjinja un dee, waut to äa Hus jehieren, fein weeten veropptogonen.
13 Wiels de Mana, dee äaren Deenst fein doonen, moaken sikj eenen gooden Nomen un kjennen gaunz frie von äaren Gloowen aun Christus Jesus räden.
14 Ekj schriew die dit, wan ekj uk hop, daut ekj em Korten kaun no die komen.
15 Oba sull daut met eenst lenja dieren, bat ekj kom, dan weetst du, woo du die vehoolen saust aus Poat von dee, waut to Gott sien Hus jehieren, aulsoo dän läwendjen Gott siene Vesaumlunk. De Vesaumlunk es een Stenda un eene Stett fa de Woarheit.
16 Daut heilje Jeheemnis*, Gott tru to deenen*, es werkjlich waut Besondret: “Hee wort aus Mensch* openboat un aus Jeist fa jerajcht jetalt. Hee leet sikj von Enjel seenen; von am wort mank de aundre Sorten Menschen* jeprädicht; Menschen enne Welt jleewden aun am un hee wort en Harlichkjeit em Himmel oppjenomen.”
Footnooten
^ Aulsoo een Maunsmensch.
^ Ooda: “goot unjascheeden kjennen”; “schneiw sennen”.
^ Daut griechische Wuat, waut hia fa “Jewault” jebrukt woat, kaun bedieden, wäm vekjielen ooda wäm met Wieed schlonen.
^ Ooda: “nich ieejenkoppich es”. Wuatlich: “waut nojäwen kaun”.
^ Ooda: “to leiden”.
^ Ooda: “to leiden”.
^ Wuatlich: “een goodet Zeichnis”.
^ Ooda: “daut dee nich toschaund jeit”.
^ Wuatlich: “iernst”.
^ Wuatlich: “nich met eene dobbelde Tung räden”.
^ Ooda: “Deenstaumthelpa”.
^ See Wuaterkjläarunk bie “Heiljet Jeheemnis”.
^ Ooda: “de Bedinjungen erfellen”.
^ Ooda: “Deenstaumthelpa”.
^ Wuatlich: “iernst”.
^ Ooda: “Deenstaumthelpa”.
^ See Wuaterkjläarunk bie “Heiljet Jeheemnis”.
^ Ooda: “Gott hanjejäft to deenen”.
^ Wuatlich: “em Fleesch”.
^ Ooda: “de Velkja”; “aundre Raussen”.
