Evil hott kshteaht vo da Satan da eahsht leek ksawt hott. Da Satan is en engel es pirfikt voah fa shteahra mitt, avvah “eah is nett in di voahret geblivva.” (Johannes 8:44, NWT ) Eah hott kshteaht en falanga greeya fa gedeend sei, avvah bei recht sell heaht yusht zu Gott. Da Satan hott gleekt zu’s eahsht veibsmensh, di Ayfaw, un hott see nei kshvetzt fa een heicha in blatz funn Gott. No hott da Adam’s saym ding gedu es di Ayfaw, nett Gott keicht. Miah henn soffahres un shtauves deich vass da Adam gedu hott.​—Lays 1 Mosi 3:1-6, 19.

 Gott is da Alli-Haychsht un hott’s recht fa roola. Vo da Satan kshvetzt hott zu di Ayfaw veyyich Gott nett heicha, voah sell da shteaht fa boviahra alli ebbah drayya geyyich da Alli-Haychsht un sei recht fa roola. ’S mensht leit nemma da Satan sei seit un sinn geyyich Gott sei rool. So, da Satan is da roola, adda “ivvah-saynah funn deahra veld” vadda.​—Lays Johannes 14:30; Di Offenbarung 12:9.

 Alles es Gott dutt un macht is pirfikt. Di mensha un di engel es Gott gmacht hott, hedda een immah heicha kenda grawt vi eah havva hott vella. (5 Mosi 32:4, 5) Gott hott uns gmacht mitt di gleyyaheit fa unsah aykni choices macha, fa goot adda evil du. Selli gleyyaheit gebt uns en vayk fa veisa es miah leevi henn fa Gott.​—Lays Römer 6:16; 1 Johannes 5:3.

 Fa nau, is Jehova nett am ennich ebbah shtobba funn shtay geyyich sei recht fa roola. Favass? Fa veisa’s dutt leit kenn goot fa boviahra roola unni Gott. (Breddichah  7:29; 8:9) Fa ivvah 6,000 yoah henn mensha’s boviaht, un’s is eesi fa sayna’s nett shaft. Mensha roolahs henn nett kenna greek, crime, grankeda, un vass nett feah is, vekk nemma.​—Lays Jeremia 10:23; 2 Mosi 9:16.

 Nett vi da rool funn mensha, Gott sei rool dutt selli helfa es sei rool ohnemma. (Jesoiya 48:17, 18) Jehova zayld glei awl di mensha governments zu an end bringa. Yusht leit es da choice macha fa groold sei bei Gott zayla uf di eaht voona.​—Jesoiya 11:9.​—Lays Daniel 2:44.

 Vatsh da video Favass Dutt Gott Soffahres Ohgay Lossa?

 Da Satan hott ksawt da aynsisht reesin es mensha Jehova deena, is yusht fa vass si raus greeya. Vetsht du veisa es sell nett voah is? Du kansht! Veil Gott geduldich is, kenna miah veisa eb ma da rool vella funn Gott adda da rool funn mensha. Bei da vayk es ma layva doon, veist’s vellah choice es ma gmacht henn.​—Lays Hiob 1:8-12; Shpricha 27:11.

 Miah kenna da choice macha fa Gott havva fa unsah Roolah bei lanna vi fa een deena in da recht vayk es kfunna is in di Bivvel, un du vass’s sawkt. (Johannes 4:23) So vi da Jesus hott, miah kenna veisa es miah nett da Satan vella fa unsah roolah bei nett in greek gay adda ennich part nemma in politics.​—Lays Johannes 17:14.

 Da Satan boviaht veeshti un shlechti sacha goot gukka macha. Vann miah nimmi so sacha du vella, dann mechta samm funn unsah family un friends uns fashpodda adda even geyyich uns drayya. (1 Petrus 4:3, 4) So, miah missa en choice macha. Vella miah friends es uns fashpodda adda friends es leevi henn fa Gott? Zayla miah sei goodi gebodda halda? Vann ma dutt, dann veisa miah es da Satan gleekt hott vo eah ksawt hott es nimmand zayld Gott heicha vann’s hatt vatt fa du.​—Lays Shpricha 13:20; 1 Korinther 6:9, 10.

 Gott sei leevi fa mensha zayld’s shuah macha es evil un soffahres zu’n end kumd. Selli vo veisa es si dess glawva, zayla layva enjoya uf di eaht fa’immah.​—Lays Johannes 3:16.