1, 2. Ngua ngera uldesuir a rebebil el bedul a Dios?

 A REBETOK el chad a omdasu el kmo a tekoi el loruul a diak a ngera el lerellii er a tekoi el loruul a Dios. Me a rebebil a oumerang el kmo a Dios a diak el semeriar el mo medengei a tekoi el lechelebangel a rechad. Sel taem el Super Typhoon Haiyan a siliseb el kmal mlo meringel el tomellii a beluu er a Huriping er a November 2013, e a mayor er a ta er a mats er tia el beluu a dilu el kmo: “A Dios a locha mla er a ta er a beluu.”

² A rebebil a meruul a tekoi e omdasu el kmo a Dios a diak el sebechel el mesterir. (Isa. 26:10, 11; 3 Jn. 11) Tirkang a di ua tirke el chad el lulsaod er tir a apostol el Paulus el kmo: “Tirkel chad a diak el sorir el melebedebek a meral klemedengei el kirel a Dios.” Me tirkang a “kmal mlo imis er a bek el bedengel a chelebirukel, ma delengerenger, ma ngibes, ma delebsochel.”​—Rom 1:28, 29.

3. (a) Ngera el ker el kirel a Dios a soad el di kid el oker? (b) A Biblia ngousbech er a “chimal” a Dios el mesaod er a ngerang?

³ E kid a kuk mekerang? Kid a diak deua tirka el chad el dulsaod er tir, e le kede medengei el kmo a Jehovah a di sebechel el mes a rokui el tekoi el doruul. Engdi kid, kede kongei el kmo ngsemeriar er kid e kongei el olengeseu er kid? Me a lmuut el tang, kid kede teloi er tirke el chad el Jesus a dilu el kmo te mo “mesa Dios”? (Mt. 5:8) A lsoad el mo medengelii  a belkul tia el tekoi e bo dosaod a bebil el kerebai el ngar er a Biblia el kirir tirke el milsang a klisichel a Dios el meruul a tekoi me tirke el dimlak lekengei el olengesenges. Seikid e ngmo sebeched el mesang a klisichel a Jehovah el olengeseu er kid el okiu a klaumerang er kid. Me sel dosaod aika el tekoi e lak dobes el kmo a Biblia a blechoel el mesaod er a “chimal” a Dios el kmo ngklisichel el lousbech er ngii el olengeseu er a remesiungel e dirrek el ousbech er ngii el mo mesisiich er a recherrouel.​—Monguiu er a Duteronomi 26:8.

4. Te milekerang a recherrouir a rechad er a Israel e mo diak lesang a klisichel a Dios?

⁴ Ngar er a uchelel a reksi er a rechad er a Israel e a rechad a mla er ngii a techellir el remenges e ulemes a omerellel a Dios er a lolsobel er a rechad er a Israel. Nguleak a mengasireng el rolel e a Jehovah a ultebedeterir a rechedal er a Ekipten, e dirrek el ulemekoad er a reking el millasem el oltoir er tir. (Jos. 9:3, 9, 10) Me alta e tirke el king er a mo bedul a ngebard er a Jordan a rirenges e ulemes aika el tekoi, engdi te “mlo kldibel e mlo ta tekingir e mo oldechelakl er a Josua ma re chad er a Israel.” (Jos. 9:1, 2) Me te ulemes er a klisichel a Dios el olengeseu er a rechedal engdi te di millasem el omuchel a mekemad. Me ngokiu a klisichel a Jehovah e ngrirellii a ‘sils el di mlo chelellakl ma buil a di mlo diak lorael el dimerkmo re chad bocha le mesisiich er a re cherrouir.’ (Jos. 10:13) Me a Jehovah a “rirelleterir el mor ngii er a rengrir a oumekemad er a re chad er a Israel.” (Jos. 11:20) Me a recherrouir a rechad er a Israel a dimlak lekengei el kmo a Dios a uluumekemad el kirir a rechedal me seikid a uchul me tirka el cheraro a mlo mechitechut.

5. A mekngit el King el Ahab, ngdimlak lekengei er a ngera el tekoi?

⁵ A uriul e a King el Ahab a dirrek el mlo er ngii a techellel el mesang a klisichel a Dios el oureor. A Elias a dilu er ngii el kmo: “Ng mo diak a nguches ma lechub e ng chull . . . el dimerkmo bo kdu el kmo ng mor ngii.” (1 Ki. 17:1) Me ngbleketakl el kmo a Jehovah a ngike el mirruul er tia el telbiil, engdi a Ahab a dimlak lekengei el mo oumerang er tia el tekoi. A uriul e ngii el Ahab a milsang a ngau el metengel er a eanged er sera loluluuch a Elias el olengit me lemedul a tengetengel. Me a Elias a milsaod el kmo a Jehovah a mo torebengii a kemtimt me ngmilsumech el mo er a Ahab me “bo lerei er uchei er a le mekaud er a chull.” A Ahab a ulemes aika el tekoi el dilubech engdi ngdimlak lekengei el kmo aikang a meketmokl el okiu a klisichel a Dios. Me tia el tekoi me aike el dulsaod er a uchei a mekltkid er a klou a ultutelel el tekoi el kmo, ngkmal kired el mo ungil el omtab er a klisichel a Jehovah sel loruul a tekoi.

6, 7. Ngera te mirruul er ngii a rebebil el chad er sel taem er a Josua?

⁶ A rebebil er a rechad a dimlak leua tirke el mekngit el king e le te milsang a klisichel a Dios el meruul a mengasireng el tekoi e mlo oumerang er ngii. El ua tiang, alta e ngbetok el renged a uluumekemad er a rechad er a Israel engdi a rechad er a Gibeon a mirruul a budech er a delongelir tir me a rechad er a Israel. E ngera uchul? Te dilu el kmo: “A re mesiungem a mlar cheroid el beluu el mei, el ngklel a RUBAK el Dios er kau a uchul. Aki rirenges a chisel ma chisel a ikel le riruul.” (Jos. 9:3, 9, 10) Me te mle ungil el medengei el kmo a mera el Dios a olengeseu er a rechedal el chad er a Israel.

⁷ A Rahab a dirrek el milsang a klisichel a Dios el meruul a mengasireng el tekoi. Sera bo lodengelii a rolel e a Jehovah a ulelsobel er a rechedal e ngdilu er a reteru el ourabek el chad er a Israel el kmo: “Ak medengei el kmo, a RUBAK a mla meskemiu a beluu.” Me alta e tia el omerellel a mle sebechel el mo uchul a kodellel engdi ngulechotii el kmo ngoumerang el kmo a Jehovah a sebechel el mo osebelii ngii me a telungalek er ngii.​—Jos. 2:9-13; 4:23, 24.

8. Te milekerang a rebebil el chad er a Israel e mesang a klisichel a Dios el oureor?

⁸ A rebebil el chad er a Israel a dimlak leua King el Ahab e le ngmle sebechir el mesang a nger er a  Jehovah el mo er a Elias. Sera lesang a klisichel a Jehovah el otengelii a ngau el durur a tengetengel a Elias, e te dilu el kmo: “A RUBAK a Dios, a RUBAK el di ngii el tang a Dios!” (1 Ki. 18:39) Me tia el omeruul a rirelleterir el mlo ulterekokl a rengrir!

9. Ngokiu a ngera el rolel e kede mesa klisichel a Jehovah el oureor?

⁹ Me aika el ungil me a mekngit el kerebai er a rechad el bla desaod a ngosukid el mo ungil el medengelii a klisichel a Dios sel oureor. Me a cherengel a taem el lemukeroul a klemedengei er kid er Ngii e ngmo sebeched el mo medengei a blekerdelel me a omerellel e “mesa llemesel.” (Efe. 1:18) Me kede ulterekokl el soad el mo ua blekerdelir a rechad er a irechar me chelechang el milsang a klisichel a Jehovah el olengeseu er a rechedal. Me a ker a kmo, ngmera el ngar er ngii a olechotel a tekoi el ochotii el kmo a Dios a olengeseu er a rechad er chelecha el taem?

10. Ngera ochotii el kmo a Jehovah a olengeseu er a rechad er chelechang? (Momes er a siasing er a uchelel a suobel.)

¹⁰ Ngar er ngii a ungil el uchul me kede oumerang el kmo a Jehovah a melemolem el olengeseu er a rechad. Kede blechoel el orrenges a chisir a rederta el chad el milluluuch el olengit a ngeso e mlo sebechir el mongeseu. (Psa. 53:2) Sera loldingel a obliil a Allan er a beluu er a Huriping e ngmiltik er a ta el redil el mlo lmangel. A Allan a dmu el kmo: “Sel tutau e ngika el redil a milluluuch el mo er a Jehovah me bo el sebechir a Resioning el mo metik er ngii. E le sera dirk lengeasek e ngmilsuub a Biblia el obengterir a Resioning engdi sera bo lebechiil e lolukl el mei er tia el beluu e ngmlo diak losuub. Me a Dios a kmal di mle mereched el onger er a nglunguchel me ngkmal mlo ungil a rengul.” Me ngdi mle chelsel a ta el rak e ngmlo tongetengii a klengar er ngii el mo er a Jehovah.

11, 12. (a) Ngokiu a ngera el rolel e a Jehovah a olengeseu er a remesiungel? (b) Mosaod er a chad el ngiluu a ngelsuil a Dios.

¹¹ A rebetok el mesiungel a Dios a dirrek el mlo melechesuar a ngelsuil er sel taem el lolasem el mengoit a mekngit el blekerdelir, el ua omelamech el dekool me a usbechel a mekngit el kar me a dirrek el osengel a siasing er a remeau. Me a rebebil a melekoi el kmo te millasem el di tir el mengoit aika el tekoi engdi ngdimlak el sebechir. Me nguaisei, engdi sel lolengit a ngeso er a Jehovah e ngmilsterir a “klou el klisiich” me ngmlo sebechir el mo mesisiich er aika el chelitecheterir.​—2 Ko. 4:7; Psa. 37:23, 24.

¹² A Jehovah a mla ngosuterir a rebetok el mesiungel el mo outekangel a omelsemai er a klengar er tir. A Amy a kmal mlo meringel er ngii er sera lemodurokl el mo olengeseu a okedecherul a Blil a Ongdibel me a dirrek el blirir a remissionari er a ta el kekerei el iungs er a Pacific. Ngdmu el kmo: “Aki kiliei er a kekerei el hotel, e bek el sils el ki morael er a mla meieleb el rael el mo oureor.” Ngmle kirel el mesmechokl er a uldesuel el mo oltirakl a siukang er a beluu e dirrek el oumesingd el taem e ngdiak a dengki me a lechub e ngralm. Ngdilu el kmo: “Ngdirrek el mlo mekngit a tekingek el bedul a ta er a odos el kim dak el oureor. Me ak mlo remei el kmal mekngit a renguk. Me ak ngar er a chelsel a delmerab er ngak el di milkolk e meluluuch el olengit a ngeso er a Jehovah.” Me sera bo lekard a dengki e a Amy a ngiluu a Ongkerongel el mla er ngii a suobel el mesaod el kirel a prokuram er a Omelilt er a Gilead. Tia el babier a milsaod el kirel aike el rokui el tekoi el ngii a chilarm er ngii er tia el beluu, e aikang a ngodech el siukang, me a uldesuel el di melatk er a belual me a rebeches el chad el mle kirel el oureor el obengterir. Me ngdilu el kmo: “Ak mlo melechesuar el kmo a Jehovah a milengedecheduch er ngak er sel kesus. E tiang a silsichak me ngmlo sebechek el melemolem el meruul er a ngerachel el mla moterekokl er ngak.”​—Psa. 44:25, 26; Isa. 41:10, 13.

13. Ngera ochotii el kmo a Jehovah a olengeseu er a rechedal me ngsebechir el omerk er a klumech er a ungil chais?

¹³ Me tia el urerir a Resioning er a Jehovah el omerk er a ungil chais el di meleketek e merael el beduluchei, a ta er a olechotel a kmo a klisichel a  Jehovah a olengeseu er ngii el ureor. (Fil. 1:7) Me a bebil el kabelment a mla melasem el merrob er a rechedal a Dios me bo lak lomerk er a klumech. Engdi sel domes el bedul uriul e desang el kmo a Resioning er a Jehovah a mla mo kats er a bekord el 268 el ngarbab el kerrekeriil, el 24 er ngii a blo lemesisiich er ngii er sel European Court of Human Rights er a di chelsel a rak er a 2000 el mei, e nglmuut el mo bleketakl el kmo ngdiak a ngii di el chad el sebechel el torebengii a klisichel a Jehovah me lak loureor.​—Isa. 54:17; monguiu er a Isaia 59:1.

14. Ngokiu a ngera el rolel e kede mesang a klisichel a Dios el olengeseu er a berkel a klumech me a kltarreng er a delongeled?

¹⁴ Me tia el ureor er a berkel a ungil chais el meliuekl er a beluulechad a mo sebechel el meketmokl el di okiu a ngelsuil a Dios. (Mt. 24:14; Rel. 1:8) Me a lmuut el tang, tia el klodam er a rekakerous el bedengir a rechad el chedal a Jehovah er chelechang a tekoi el diak el sebechel a beluulechad el mekesiur. Seikid a uchul me a rebebil a melekoi el kmo: “A Dios a meral ngar a delongeliu.” (1 Ko. 14:25) Me tia el cheldebecheled a klou el olechotel el kmo a Dios a oureor el olengeseu er a rechedal. (Monguiu er a Isaia 66:14.) E kau, ngkuk ua ngera uldesuem? Ngsebechem el mesang a klisichel a Jehovah el olengeseu er kau?

15. Msodii sel uchul me a lebebil er a taem e ngmo diak desang a klisichel a Jehovah el olengeseu er kid?

¹⁵ Ngera bebil er a mo uchul e ngmo diak desang a klisichel a Dios el olengeseu er kid? A omelsemai el bo dechelebangel er a klengar er kid a sebechel rullid el mo uaisei. E tiang a sebechel el rullid me ngmo diak desang el kmo a Jehovah a olengeseu er kid. Sel taem el Kuin el Jesebel a mlo soal el omekoad er a Elias, engdi mle mereched a Elias el obes er a rolel e a Jehovah a olengeseu er ngii. Me a Biblia a mesaod er a ongtil a Elias el “uluureng me le mad.” (1 Ki. 19:1-4) Me ngera mle sebechel el sumecheklii a mondai er a Elias? Ngmle kirel el olengit er a Jehovah me lolisiich er ngii.​—1 Ki. 19:14-18.

16. Kede mekerang e mo ua osengel a Job el bedul a Dios?

¹⁶ A Job a kmal di mlo mechesang el melatk a mondai er ngii me ngmlo diak el oba osengel a  Dios el kirel a tekoi. (Job 42:3-6) Me kid a di ua Job el kired el mo blak a rengud el omtab a omerellel a Dios. Ngmekerang a doruul er tiang? Ngokiu a omesodel a Bades e ngkired el mo kerekikl el omtab a tekoi el dubechang el meliuekl er kid. Me sel bo dutebengii a rolel e a Jehovah a olengeseu er kid e ngmo mera el Dios er a rengud. Seikid e kede mo ua Job el sebeched el dmu el kmo: “Ak mle medengelkau el di ulekiu a ikel krirenges, ngdi chelechang e ak mla mesekau el olab a ikal medak.”

17, 18. (a) Ngokiu a ngera el rolel e kede mo medengei el kmo a Jehovah a olengeseu er kid? (b) Mosaod er a tekoi el dilubech el ochotii a rolel e a Dios a olengeseu er kid er chelechang.

¹⁷ Ngmekerang e mo sebeched el mesang a klisichel a Jehovah el oureor? Aikakid a bebil el rolel: Ke locha omdasu el kmo sel rolel e ke mlo medengelii a klemerang a mera el ulekiu a ulekrael er a Dios. Ngmla ta el mngar er a miting er a Rekristiano e rongesii a cheldecheduch e mlo melatk el kmo: “Tiang a kmal di melutk el kirek”? Me a lechub e ke milluluuch e ngiluu a nger er a nglunguchem. Ke locha tilbir el mo menglou er a omesiungem e mera el milsang a klisichel a Jehovah el ngosukau el kirel tia el tekoi. Me a lechub e ke chilitii a urerem el tekoi er a omesiungem a uchul e mlo sebechem el mtebengii a klemerang er a telbilel a Dios el kmo: Ngdiak “bo kubes er kau”? (Heb. 13:5) Me sel bo dungil el meruul er a omesiunged e ngmo sebeched el mtebengii el kmo a Jehovah a mla ngosukid el okiu a betok el rolel.

¹⁸ A Sarah el redil er a Kenya a mesaod el kmo: “Ak milluluuch el kirel a chad el kusuub el obengkel e mlo mtebengii el kmo ngdiak loba omereng el saul el kirel a omesubam. Me ak ullengit er a Jehovah me bo lak kusuub el obengkel. Me a uriul er a kdu el kmo ‘Amen,’ e ngmengerodech a dengua er ngak. E ak nguu e ngika el redil el kusuub el obengkel el mla mo soal el mo er a miting el obengkek! Me ngkmal mlo imis el mechas a renguk!” Me ngdi osisiu, a lsekum kede kerekikl el omtab e ngmo sebeched el mesa rolel e a Dios a olengeseu er kid. A odos el Rhonna el kiei er a Asia a kmo: “Ngmo sebeched el mtebengii a ulekrael er a Jehovah el okiu sel dekerekikl el omtab a tekoi el duubech er a klengar er kid. Engdi sel bo domtab aika el tekoi e kede mera el mo medengei el kmo Ngii a kmal betik a rengul e semeriar el ngosukid!”

19. Ngera lmuut el bebil er a tekoi el kired el meruul me bo lekes a deleuill er kid me a Dios?

¹⁹ A Jesus a kmo: “Te ngeltengat a re klikiid a rengrir; ele te mo mesa Dios!” (Mt. 5:8) Me ngmekerang e mo ‘klikiid a rengud’? Ngbelkul a kmo ngkirel el mo diak doruul a ngii di el mekngit el omeruul. (Monguiu er a 2 Korinth 4:2.) Me sel dolemolem el melisiich er a deleuill er kid lobengkel a Dios e domeklemalt a omerelled e ngmo kmes a deleuill er kid el obengkel. Me a ongingil el suobel e kede mo mesaod el kirel aike el tekoi el sebechel el ngosukid el mo mtebengii el kmo a Jehovah a olengeseu er kid el okiu a klaumerang er kid el bedul ngii.