Kau el Betik a Rengum er a Jehovah:

A Jesus a dilu el kmo:“Kom mo medengelii a klemerang, ma klemerang a ngubetemiu el mo diak msibai.” (Johanes 8:32) Aikang a kmal mengelaod er kid el tekoi! Nguaisei, ngkmal sebeched el mo medengelii a klemerang, alta e ngkmeda “ulebongel er a beluulchad” me kede kiei el iliuekl er a betok el cheleblad el omeruul. (2 Timothy 3:1) Me kau, ke dirk melatk er sera omkot el mo medengelii a klemerang el ngar er a Tekingel a Dios? Tia locha kmal mle ungil el tekoi el blo modengelii!

Me alta e ngklou a ultutelel el kired el mo medengelii a klemerang e dirrek el mo ouchais er a rechad el kirel, engdi ngdirrek el kmal kirel a omerelled el mo oltirakl er a klemerang el bla bo dodengelii. Ngmo sebeched el rullii tiang a lsekum kede melemolem el ngar er a bltikerreng er a Dios. Me tiang, nguldimukl er a ngerang? A tekingel a Jesus er sel ulebongel el kesus er ngii er a uchei er a kodellel a onger er tia el ker. Ngdilu er a rechapostol er ngii el kmo: “A cho moltirakl a tekingek, e kom di mo ngar a chelsel a bltikerreng er ngak, el di ua ingak el oltirakl a tekingel a Demak mak di ngar a chelsel a bltkil a rengul.”—Johanes 15:10.

Kede mesang el kmo, a Jesus a millemolem el ngar er a bltikerreng er a Dios e le ngullengesenges er a Demal. Me ngdi osisiu el kired er chelechang, a lsoad el melemolem el ngar er a bltikerreng er a Dios e ngkired el kiei el oltirakl er a klemerang er a bek el sils. Sel osisiu el kesus e a Jesus a dilu el kmo: “Chelechal bocha modengelii tial klemerang, e ng kmal ungil cho bo moruul er ngii!”—Johanes 13:17.

Me aki kmal oureng me bo lsebechel tia el babier el ngosukau el kiei el oltirakl er a klemerang e molemolem “el ngar a bltikerreng er a Dios,” me bo lsebechem el mo kiei el diak a ulebengelel.—Jude 21.