Mito: Testigunan di Yehova no ta selebrá Pasku di Nasementu pasobra nan no ta kere den Hesus.

 Bèrdat: Nos ta kristian i nos ta kere ku ta solamente pa medio di Hesukristu hende por haña salbashon.—Echonan 4:12.

 Mito: Boso ta kousa divishon den famia pasobra boso ta siña boso miembronan pa no selebrá Pasku di Nasementu.

 Bèrdat: Famia ta masha importante pa nos; de echo, nos ta promové balornan di Beibel ku ta fortalesé e lasonan di famia.

 Mito: Boso no ta disfrutá di e “ambiente di Pasku”, e ambiente di generosidat, pas i armonia ku ta reina durante e temporada ei.

 Bèrdat: Nos ta purba di ta pasífiko i generoso tur dia, henter aña. (Proverbionan 11:25; Romanonan 12:18) Por ehèmpel, nos no ta pidi sèn na nos reunionnan ni kobra pa prediká, pues nos ta obedesé e mandato di Hesus: “Boso a risibí pòrnada, duna pòrnada.” (Mateo 10:8) Ademas, nos ta proklamá e Reino di Dios komo e úniko speransa pa pas riba tera.—Mateo 10:7.

•   Hesus a manda pa konmemorá su morto, no su nasementu.—Lukas 22:19, 20.

•   Ni e apòstelnan di Hesus ni e promé kristiannan no a selebrá Pasku di Nasementu. Segun e New Catholic Encyclopedia, e fiesta akí a “kuminsá na Roma 330 aña despues di Kristu,” mas ku 200 aña despues di e morto di e último apòstel.

•   No tin prueba ku Hesus a nase dia 25 di desèmber; de echo, Beibel no ta menshoná ningun kaminda e fecha di su nasementu.

•   Nos ta kere ku Dios no ta aprobá Pasku di Nasementu, pasobra e ta bini di orígen i kustumbernan pagano.—2 Korintionan 6:17.

 Maske mayoria di hende sa ku Pasku di Nasementu no ta na armonia ku Beibel i ta bini di orígen pagano, hopi ta selebr’é pasobra nan ta pensa ku e no ta hasi niun hende daño i ku no ta bale la pena bai kontra loke mayoria di hende ta kere.

 Beibel ta animá nos pa usa nos “kapasidat di pensa,” pa tuma nos propio desishonnan. (Romanonan 12:1, 2) E ta siña nos pa balorá e bèrdat tambe. (Huan 4:23, 24) Nos ta interesá den loke otro hende ta pensa di nos, pero nos lo no desobedesé prinsipionan di Beibel djis pa hasi loke mayoria di hende ta kere.

 Pues, maske nos a disidí di no selebrá Pasku di Nasementu, kada persona ta liber pa tuma su mes desishon tokante e asuntu akí. Nos no ta stroba otro hende di selebrá Pasku di Nasementu.