TÓPIKO PRINSIPAL:DIKON TIN ASINA TANTU SUFRIMENTU? KI DIA LO BINI UN FIN NA DJE?
Nan Tur Tabata Víktima Inosente!
Noelle tabata un mucha muhé masha kariñoso, i e tabata gusta pinta. Riba un anochi den zomer el a bai parti patras den kurá, i di un manera òf otro el a trompeká i kai den e pisina di nan kas. Noelle a hoga nèt dos siman promé ku el a kumpli kuater aña.
Charlotte, Daniel, Olivia i Josephine . . . Esakinan ta nòmber di algun di e 20 muchanan di 6 òf 7 aña di edat ku tabata entre e 26 víktimanan di un tiroteo ku a tuma lugá dia 14 di desèmber 2012 na un skol na Connecticut, Merka. Durante e akto di entiero, presidente Obama a menshoná nòmber di e hobensitonan akí i a bisa e públiko deskonsolá: “Mester bini un fin na e tragedianan akí.”
Bano, un mucha muhé di 18 aña di edat, a bandoná Irak na 1996 huntu ku su famia pa bai biba na Noruega. Su amigunan tabata yam’é na su beinam: Rayo di Solo. Ma lamentablemente, dia 22 di yüli 2011, Bano tabata entre e 77 víktimanan ku a pèrdè nan bida na man di un ekstremista, ku despues a broma bisa: ‘Ta duel mi ku mi no por a mata mas tantu hende.’
Di tur parti di mundu bo por tende bes tras bes di e notisianan tristu akí. Djis pensa un ratu riba e doló i sufrimentu ku aksidente, krímen, guera, terorismo, desaster natural i otro tragedianan ta kousa. Anto mayoria di e víktimanan ta hende inosente ku ta pèrdè nan bida inhustamente!
Algun hende ta kulpa Dios i ta pensa ku nos Kreador no ta interesá den e rasa humano. Otronan ta kere ku Dios ta mira nos sufrimentu pero ta preferá di no hasi nada. Tin ta bisa ku tur loke ta pasa ta destino di hende i ku esei ta inevitabel. Ta parse ku tin mil i un punto di bista riba e tópiko akí. Unda nos por haña kontestanan konfiabel i satisfaktorio? Den e siguiente artíkulonan, nos lo analisá e Palabra di Dios, Beibel, pa trata di haña sa kiko ta kousa sufrimentu i kon lo e yega na su fin.
