“E Dios di shelu lo lanta un reino ku nunka lo no wòrdu destruí, i e reino ei lo no pasa pa ningun otro pueblo; e lo garna i pone un fin na tur e reinonan akí, ma e mes lo dura pa semper.”—Daniel 2:44.

E Reino di Dios ta un gobièrnu selestial. Hesukristu, esun skohí pa goberná, lo remplasá gobièrnu humano i lo perkurá pa e boluntat di Dios tuma lugá no solamente den shelu, sino tambe riba tera. (Mateo 6:9, 10) E gobièrnu akí lo no ser remplasá pa ningun gobièrnu humano pasobra e ta “e Reino eterno di nos Señor i Salbador Hesukristu.” Esei ta garantisá pas duradero.—2 Pedro 1:11.

“Satanas mes ta sigui disfrasá su mes na un angel di lus. P’esei, no ta nada ekstraordinario ku su sirbidónan tambe ta sigui disfrasá nan mes na sirbidó di hustisia. Ma nan fin lo ta konforme nan obranan.”—2 Korintionan 11:14, 15.

E Reino di Dios lo eksponé religion falsu komo un obra di Satanas i lo eliminá esaki for di tera. Esei lo pone fin tambe na prehuisio religioso i dramamentu di sanger. Asina, tur hende ku ta stima e “Dios bibu i berdadero” por ador’é den “ún fe” i “ku spiritu i ku bèrdat.” E resultado lo ta berdadero pas i union!—1 Tesalonisensenan 1:9; Efesionan 4:5; Huan 4:23.

“Dios mes lo ta huntu ku nan. I lo e seka tur lágrima for di nan wowo, i lo no tin morto mas; ni tristesa ni sklamashon ni doló lo no tin mas. E kosnan ku tabata pasa ántes no t’ei mas.”—Revelashon 21:3, 4.

Yehova Dios lo hasi esaki posibel pa medio di su Yu, Hesus, kende a duna su bida pa henter humanidat.  (Huan 3:16) Bou di e guia di Hesus, hende lo bira perfekto. Nan lo no sufri mas pasobra “Dios mes lo ta huntu ku nan” i lo e kita “tur lágrima for di nan wowo.” Pronto imperfekshon humano i sufrimentu lo pasa pa olvido; “e hustunan lo heredá e tera, i lo biba den dje pa semper.”—Salmo 37:29.

“[Hesukristu] a gara e dragon, e kolebra original, ku ta Diabel i Satanas, i a mar’é pa 1.000 aña. I el a bent’é den e abismo, ser’é aden i pone un seyo ariba, di manera ku e no por a gaña e nashonnan mas.”—Revelashon 20:2, 3.

Tur influensia satániko lo disparsé ora Kristu mara Satanas i e demoñonan i tira nan den “e abismo,” un kondishon di inaktividat kompleto. Nan lo no por influensiá hende mas. Bida den un mundu liber di e influensia di Satanas i di e spiritunan malbado lo ta un gran alivio!

“E último dianan” lo kulminá den loke Hesus a yama e “tribulashon grandi.” El a bisa: “E tempu ei lo tin un tribulashon grandi manera no a yega di sosodé nunka, for di prinsipio di mundu te awor, i ku lo no sosodé nunka mas tampoko.”—Mateo 24:21.

E tribulashon lo ta algu grandi den sentido ku algun kalamidat nunka bisto lo tuma lugá. Nan lo kulminá den “e guera ku lo tuma lugá riba e gran dia di Dios, e Todopoderoso,” mihó konosí komo “Armagedon.”—Revelashon 16:14, 16, nota na pia di página.

Hende ku ta stima hustisia ta anhelá pa e mundu malbado akí yega na su fin. Laga nos wak algun di e bendishonnan ku nan lo haña bou di e Reino di Dios.

“Un multitut grandi” lo sobrebibí pa drenta un mundu nobo pasífiko: E Palabra di Dios ta indiká ku “un multitut grandi” di hende, ku lo ta inkontabel, lo “sobrebibí e tribulashon grandi” i drenta den un mundu nobo kaminda hustisia lo reina. (Revelashon 7:9, 10, 14; 2 Pedro 3:13) Nan ta rekonosé ku nan salbashon ta bini di Hesukristu, “e Lamchi di Dios ku ta kita piká di mundu.”—Huan 1:29.

Dios su programa di edukashon lo trese hopi bendishon: Den e mundu nobo, ‘tera lo ta yen di e konosementu di Yehova.’ (Isaías 11:9) E edukashon akí di parti di Dios lo siña nos pa biba na pas i armonia ku hende i tambe ku naturalesa. Dios ta primintí: “Ami ta SEÑOR bo Dios, kende ta siña bo, pa bo prosperá, kende ta guia bo den e kaminda ku bo mester kana.”—Isaías 48:17.

Nos sernan kerí lo lanta for di morto: Tempu Hesus tabata riba tera, el a lanta su amigu Lázaro for di morto. (Huan 11:1, 5, 38-44) Ku esei el a duna un muestra chikitu di loke lo e hasi riba un eskala muchu mas grandi komo rei di e Reino di Dios.—Huan 5:28, 29.

Pas i hustisia lo reina pa semper: Bou di mando di Kristu, maldat lo pasa pa historia. Kon nos por sa esei? Pasobra Hesus por lesa kurason di hende, i lo e usa e kapasidat ei pa distinguí hende hustu for di esnan malbado. Lo e no permití ningun hende ku no ke kambia su mal proseder biba den Dios su mundu nobo.—Salmo 37:9, 10; Isaías 11:3, 4; 65:20; Mateo 9:4.

Loke nos a konsiderá akí ta djis algun di e hopi profesianan di Beibel ku ta tira lus riba e futuro briante ku nos tin nos dilanti. Ora e Reino di Dios ta goberná riba tera, pa semper lo tin “pas abundante.” (Salmo 37:11, 29) Tur loke ta kousa doló i sufrimentu pa humanidat aworakí lo disparsé. Nos por ta sigur di esei pasobra Dios a duna nos su palabra: “Tende! Mi ta traha tur kos nobo. . . . E palabranan akí ta digno di konfiansa i bèrdat.”—Revelashon 21:5.