1, 2. Kiko e artíkulo akí lo yuda nos kuné?

PA HOPI aña kaba, Testigunan di Yehova ta reuní na nan kongresonan internashonal i di distrito. Atraves di añanan, hopi di nos a yega di asistí na algun òf asta na un gran kantidat di e kongresonan akí.

² Míles di aña pasá tambe e pueblo di Dios tabata tene kongreso. Den e artíkulo akí, nos lo analisá e kongresonan ku Beibel ta menshoná i mira ki similaridat tin entre esakinan i nos kongresonan djawe. Ademas, nos lo enfoká riba e benefisionan di asistí na kongreso.—Sal. 44:1; Rom. 15:4.

3. (a) Kiko a sosodé na e promé kongreso di e pueblo di Yehova ku Beibel ta menshoná? (b) Kon e israelitanan por a sa ku nan mester a bini huntu?

³ E promé kongreso ku Beibel ta menshoná a tuma lugá na pia di Seru Sinaí kaminda tur israelita a reuní pa risibí instrukshon di Yehova. Esei tabata un okashon masha spesial den historia di adorashon berdadero. Na e okashon emoshonante ei, Yehova a demostrá su poder na e israelitanan i a duna nan su Lei. Esei tabata un dia ku hamas nan lo a lubidá. (Éks. 19:2-9, 16-19; lesa Éksodo 20:18; Deuteronomio 4:9, 10.) Desde e dia ei, Israel a bira un pueblo spesial pa Yehova. Un poko tempu despues, Yehova a establesé un sistema pa yama su pueblo bini huntu: El a manda Moises traha dos tròmpèt di plata. Ora “henter e kongregashon” mester a reuní “na entrada di e tènt di reunion,” nan tabata supla tur dos tròmpèt. (Num. 10:1-4) Bo por imaginá bo kon animá i entusiasmá e israelitanan tabata na e okashonnan ei?

4, 5. Dikon e kongresonan ku Moises i Hosue a organisá tabata importante?

 ⁴ Na final di e 40 añanan ku e israelitanan tabata den desierto, Moises a organisá un kongreso pa henter e nashon. Esaki tabata na un momento krusial ya ku nan tabata a punto di drenta e Tera Primintí. Esei tabata un bon momento pa Moises a rekordá su rumannan tur loke Yehova a hasi i lo a sigui hasi pa nan.—Deu. 29:1-15; 30:15-20; 31:30.

⁵ Podisé ta na e kongreso ei Moises a bisa e pueblo ku regularmente lo a bai tin kongreso i instrukshon spiritual pa e pueblo di Dios. Kada shete aña, durante e Fiesta di Tabernakel, òf Kabaña, hòmber, muhé, mucha i stranhero mester a reuní na e lugá ku Yehova a skohe ‘pa nan tende i siña teme Yehova i kumpli ku tur e palabranan di e Lei.’ (Lesa Deuteronomio 31:1, 10-12.) Pues, for di prinsipio di e historia di e pueblo di Yehova, tabata bisto ku e tabata ke pa su pueblo reuní regularmente pa siña di su palabra i di su propósito. Despues ku e israelitanan a konkistá e Tera Primintí, Hosue tambe a organisá un kongreso. E tempu ei, ainda nan tabata rondoná di nashonnan pagano. Pues, Hosue tabata sa ku nan tabatin mester di animashon pa yuda nan keda leal na Yehova. Anto na e kongreso ei, e pueblo a hura ku nan lo sirbi Dios.—Hos. 23:1, 2; 24:1, 15, 21-24.

6, 7. Dikon nos por bisa ku den tempunan resien tambe e pueblo di Yehova tabatin kongresonan históriko?

⁶ Den tempunan mas resien, tambe e pueblo di Yehova tabatin kongresonan históriko. Na e kongresonan akí nan a anunsiá kambionan den nan organisashon i den komprondementu di e Skritura. (Pro. 4:18) E promé kongreso grandi ku Studiantenan di Beibel a organisá despues di Promé Guera Mundial tabata na 1919 na Cedar Point, Ohio, Merka; tabatin un asistensia di 7.000 persona. Ta na e kongreso ei, nan a anunsiá e kampaña pa prediká e bon notisia rònt mundu. Na 1922, na e mesun sitio ei, durante un kongreso di nuebe dia, Ruman Joseph F. Rutherford a duna un enorme empuhe na e trabou di prediká ora el a urgi su oyentenan atento: “Wak pa boso ta Testigu fiel i berdadero pa Señor. Sigui den e lucha te ora tur rastro di Babilonia ser eliminá. Proklamá e mensahe tur kaminda. Mundu tin ku sa ku Yehova ta Dios i ku Hesukristu ta Rei di reinan i Señor di señornan. Esaki ta e dia di mas importante. Tende! E Rei ta reina! Boso ta su agentenan di publisidat. P’esei, anunsiá, anunsiá, anunsiá e Rei i su reino.” I tur adoradó di Yehova—tantu esnan ku tabata presente na e kongreso ei komo otronan rònt mundu—a sigui e konseho ei ku goso.

⁷ Na 1931, na un kongreso na Columbus, Ohio, e Studiantenan di Beibel a keda masha kontentu di por a aseptá e nòmber Testigunan di Yehova. Despues na 1935, na Washington, D.C., Ruman Rutherford a splika ken ta esnan ku ta forma e “multitut grandi” ku segun e buki di Revelashon ta “pará dilanti di e trono i dilanti di e Lamchi.” (Rev. 7:9-17) Na 1942, durante Segundo Guera Mundial, Nathan H. Knorr a duna un diskurso emoshonante titulá “Pas—Lo E Ta Duradero?” Durante e diskurso akí, el a splika loke e “bestia salbahe koló kòrá bibu” den Revelashon kapítulo 17 ta representá. Ademas, el a indiká ku despues di e guera lo tabatin hopi di hasi den e trabou di prediká.

8, 9. Dikon sierto kongresonan tabata masha emoshonante?

⁸ Na 1946, na e Asamblea Teokrátiko “Nashonnan Gososo” na Cleveland, Ohio, Ruman Knorr a duna un diskurso masha interesante ku e tema: “E Problemanan di Rekonstrukshon i Ekspanshon.” Un ruman ku tabata presente e dia ei a skirbi  kon entusiasmá e oyentenan a reakshoná. El a bisa: ‘E anochi ei, mi tabatin e privilegio di sinta riba plataforma patras di Ruman Knorr. Segun ku e tabata papia di e trabou di prediká ku mester a ser hasí i di e plannan pa ekspandé Bètel i e fábrika na Brooklyn, e presentenan tabata bati man bes tras bes. Aunke for di plataforma bo no por a mira e kara di e personanan, bo por a sinti e goso sí ku tabata reina.’ Na 1950, na un kongreso internashonal ku a tuma lugá na New York City, e presentenan a keda masha kontentu pa risibí e Tradukshon di Mundu Nobo di e Skritura Griego Kristian. Esaki tabata e promé parti di un Beibel na idioma moderno ku a pone e nòmber di Dios kaminda e mester ta den su Palabra.—Yer. 16:21, NW.

⁹ E kongresonan ku a tuma lugá den paisnan kaminda anteriormente e trabou di prediká tabata prohibí òf ku e pueblo di Yehova tabata ser persiguí tambe tabata masha emoshonante. Tuma por ehèmpel e kongreso ku a tuma lugá na 1955 na Nuremberg, Alemania. Na e kongreso ei tabatin 107.000 Testigu di Yehova presente. Remarkabel ta ku na e mesun sitio ei, Adolf Hitler i su kompinchinan tabata reuní anteriormente. Anto Hitler a hura ku lo el a kaba ku Testigunan di Yehova na Alemania. P’esei, hopi di e presentenan no por a kontené nan lágrimanan di goso! Na 1989, 166.518 delegado a bini Polonia pa asistí na tres kongreso “Debocion Piadoso.” Hopi di nan a bini for di loke e tempu ei tabata Union Soviétiko i Chekoslovakia i for di otro paisnan den Ost Europa. Pa algun di nan, tabata e promé bes ku nan a asistí na un reunion ku a konsistí di mas ku 15 òf 20 sirbidó di Dios. Anto bo por imaginá bo e goso ku tabatin na 1993 na e Kongreso Internashonal “Siñansa Divino” ku a tuma lugá na Kiev, Ukrania? Na e kongreso ei, 7.402 hende a batisá. Podisé esei ta e kantidat mas grandi di Testigunan di Yehova ku a yega di batisá riba ún dia.—Isa. 60:22; Ageo 2:7.

10. Kua kongreso tin un nifikashon spesial pa bo, i dikon?

¹⁰ Kisas tin kongresonan di distrito òf internashonal ku tabata masha spesial pa bo. Bo ta kòrda kua ta e promé kongreso ku bo a asistí na dje òf podisé esun na kua bo a batisá? Esakinan tabata okashonnan importante den bo karera spiritual, i nunka bo mester lubidá nan. Nan ta rekuerdonan masha bunita!—Sal. 42:4.

11. Na kua fiestanan e israelitanan mester a asistí tur aña?

¹¹ Yehova tabata ke pa e israelitanan reuní na Herúsalèm pa selebrá tres fiesta: Fiesta di Pan sin Zürdeg, Fiesta di Simannan (ku despues a haña e nòmber Pentekòste) i Fiesta di Kabaña. Relashoná ku e fiestanan akí Dios a bisa: “Tres biaha pa aña tur bo hende hòmbernan mester presentá dilanti di Señor Dios.” (Deu. 16:16; Éks. 23:14-17) Hopi hòmber a komprondé ku e fiestanan akí tabata un parti importante di adorashon na Yehova, p’esei nan  tabata bai ku henter nan famia.—1 Sam. 1:1-7; Luk. 2:41, 42.

12, 13. Kiko hopi israelita mester a hasi pa asistí na e fiestanan anual?

¹² Pensa riba loke e biahe ei lo a enserá pa un famia israelita. Hose ku Maria, por ehèmpel, mester a biaha mas o ménos 100 kilometer di Názarèt bai Herúsalèm. Kuantu tempu lo a dura bo pa hasi un biahe asina, kanando ku mucha chikitu? E relato di Hesus su biahe pa Herúsalèm tempu ku e tabata mucha ta indiká ku na algun okashon famia- i konosínan tabata hasi e biahenan ei na grupo. Esei lo a enserá basta trabou: Nan mester a biaha i prepará kuminda huntu i perkurá pa tur hende haña un lugá di drumi. Sinembargo, no tabata peligroso pa hasi un biahe asina, pasobra Hesus, siendo un mucha di 12 aña, tabatin sierto grado di libertat. E biahenan akí lo tabata un eksperensia inolvidabel, spesialmente pa e hóbennan.—Luk. 2:44-46.

¹³ Tempu ku e israelitanan tabata plamá rònt mundu, nan tabata bini for di vários pais pa asistí na e fiestanan na Herúsalèm. Na Pentekòste di aña 33 di nos era, por ehèmpel, hudiu- i prosélitonan ku a balorá e fiesta akí a bini for di Italia, Libia, Kreta, Asia Menor i Mesopotamia.—Echo. 2:5-11; 20:16.

14. Kon e fiestanan anual a benefisiá e israelitanan?

¹⁴ Pa un israelita fiel, e kos di mas importante i emoshonante di e biahenan akí tabata ku e por a adorá Yehova huntu ku míles di otro adoradó ku tambe ta stima Dios. Ki efekto e fiestanan akí tabatin riba e presentenan? Nos por haña un kontesta pa e pregunta akí den e instrukshonnan ku Yehova a duna su pueblo relashoná ku e Fiesta di Kabaña. El a bisa nan: “Regosihá na bo fiesta, abo, bo yu hòmber, bo yu muhé, bo sirbidónan hòmber i muhé i e levita, e stranhero, e huérfano i e biuda, kendenan ta biba den bo statnan. Selebrá pa shete dia un fiesta na SEÑOR bo Dios, na e lugá ku SEÑOR skohe, pasobra SEÑOR bo Dios lo bendishoná bo den henter bo kosecha i den tur e trabou di bo mannan, asina ku lo bo ta berdaderamente yen di goso.”—Deu. 16:14, 15; lesa Mateo 5:3.

15, 16. (a) Ki sakrifisio abo tabatin ku hasi pa asistí na kongreso? (b) Dikon e esfuersonan ei ta bale la pena?

¹⁵ E fiestanan ku Yehova a manda e israelitanan selebrá ta un ekselente ehèmpel pa nos awe. Aunke hopi kos a kambia atraves di siglonan, e rasgonan importante di e kongresonan a keda meskos. Den tempu bíbliko, esnan ku kier a asistí na un kongreso mester a hasi sakrifisio. Esei ta konta pa hopi di nos awe tambe. Pero e benefisionan ta bal e esfuerso. Meskos ku den pasado, e eventonan akí ta rasgonan masha importante di nos adorashon na Yehova. Na kongreso, nos ta haña informashon i komprondementu ku ta yuda nos keda ku un bon relashon ku Dios. Kongreso ta motivá nos pa apliká loke nos ta siña, ta yuda nos evitá problema i ta enkurashá nos pa keda enfoká riba meta- i kosnan ku ta animá nos.—Sal. 122:1-4.

¹⁶ Tur kongreso ta duna goso. Un informe di un kongreso ku a tuma lugá na 1946 ta bisa: ‘Tabata masha emoshonante pa mira míles i míles di hende huntu. Mas emoshonante ainda tabata pa tende kon e orkesta grandi ta uni ku e bosnan gososo di e multitut ku tabata kanta kantika di alabansa na Yehova.’ E informe a agregá ku hopi delegado a ofresé nan mes boluntariamente pa yuda den e diferente departamentonan. Nan tabatin e goso di por a sirbi nan kompañeronan Testigu. Abo tambe a yega  di eksperensiá e goso ei na kongresonan di distrito òf internashonal?—Sal. 110:3; Isa. 42:10-12.

17. Ki kambionan a bini resientemente den e manera di organisá kongreso?

¹⁷ Atraves di añanan, a bini algun kambio den e manera ku kongresonan ta ser organisá. Por ehèmpel, algun ruman ta kòrda ku un tempu kongresonan tabata dura ocho dia! Tabatin seshon di mainta, atardi i anochi. Sirbishi di vèlt tambe tabata un parti regular di e programa. Tabatin biaha ku e programa tabata kuminsá nueb’or di mainta i kaba te nueb’or di anochi. Boluntarionan tabata traha duru pa oranan largu pa prepará desayuno, almuerso i sena pa esnan ku a bini kongreso. Awor e programanan di kongreso ta hopi mas kòrtiku. I e echo ku famianan mes ta perkurá pa nan kuminda di antemano ta pone ku nan tin tempu pa presta bon atenshon na e alimento spiritual ku ta ser presentá na kongreso.

18, 19. Ki rasgonan di kongreso bo ta gusta mas, i dikon?

¹⁸ Tin sierto rasgonan di kongreso ku semper nos ta antisipá. Por ehèmpel, mediante diskursonan i tambe publikashonnan nobo ku ta ser presentá nos ta haña “kuminda na e debido tempu” ku ta duna nos un mihó komprondementu di profesia i siñansa di Beibel. (Mat. 24:45) Nos por usa hopi di e publikashonnan nobo akí pa yuda hende sinsero komprondé bèrdatnan di Beibel. Dramanan basá riba Beibel ta animá tantu hende grandi komo hóben pa analisá nan motibunan pa sirbi Yehova i pa resistí e preshon ku e mundu malbado akí ta pone riba nos. E diskurso di boutismo tambe ta duna nos tur e oportunidat di evaluá nos prioridatnan i eksperensiá e goso di mira otro hende simbolisá nan dedikashon na Yehova.

¹⁹ Sí, pa míles di aña kaba kongreso ta un parti di adorashon puru. Nan ta yuda nos sirbi Yehova ku goso i na e manera korekto den e tempu difísil akí. Nan ta motivá nos pa hasi mas den sirbishi di Yehova i ta duna nos oportunidat pa sera amistatnan nobo i balorá nos hermandat mundial. Ademas, kongreso ta un medio importante ku Yehova ta usa pa bendishoná i kuida su pueblo. P’esei, nos kada un mester regla nos asuntunan di tal manera ku nos por asistí na tur kongreso i no pèrdè ningun seshon.—Pro. 10:22.