DIKON BEIBEL TA DISTINTO? Leyenda i mito ta kuenta masha fasinante, pero nan no ta menshoná nòmber, fecha ni lugá spesífiko. Na kontraste ku nan, Beibel sí ta kontené hopi detaye históriko ku ta konvensé su lektornan ku su kontenido “den su totalidat ta bèrdat.”—Salmo 119:160.

UN EHÈMPEL: Beibel ta bisa ku “Nabukodonosor, rei di Babilonia, . . . a hiba Joakin [rei di Huda] den eksilio na Babilonia.” Despues, “Evil-merodak, rei di Babilonia, den e aña ku el a bira rei, a libra Joakin, rei di Huda, for di prizòn.” Ademas, Beibel ta bisa ku tur e dianan di Joakin su bida, e tabata haña un porshon pa kada dia for di rei.—2 Reinan 24:11, 15; 25:27-30.

LOKE ARKEÓLOGONAN A DESKUBRÍ: Entre e ruinanan di Babilonia di antigwedat, arkeólogonan a deskubrí dokumentonan di e tempu di e reinado di Nabukodonosor II. E dokumentonan akí a kontené lista di nòmber di trahadó- i prizoneronan na Babilonia i e provishonnan ku nan tabata risibí. “Yaukin [esta, Joakin],” kende tabata e “rei di e tera di Yahud [Huda],” i e hendenan di su kas tambe a ser menshoná. Awor kiko di Evil-merodak, e susesor di Nabukodonosor? Den e bisindario di e stat Susa, arkeólogonan a haña un vas ku e inskripshon: “Palasio di Amil-Marduk [Evil-merodak], rei di Babilonia, yu di Nabukodonosor, rei di Babilonia.”

KIKO ABO TA PENSA? Tin un otro buki sagrado ku ta kontené asina tantu detaye spesífiko i eksakto di historia? Òf Beibel ta e úniko?

[Komentario na página 5]

“Kompará ku otro dokumentonan di antigwedat, Beibel su informashon enkuanto tempu i sitio ku susesonan a tuma lugá ta mas eksakto i konfiabel.”—A SCIENTIFIC INVESTIGATION OF THE OLD TESTAMENT, DI ROBERT D. WILSON

[Plachi na página 5]

Dokumento di Babilonia ku ta menshoná Rei Joakin di Huda

[Rekonosementu pa Potrèt na página 5]

© bpk, Berlin/Vorderasiatisches Museum, SMB/Olaf M. Tessmer/Art Resource, NY