Hasi Sakrifisio di Henter Alma pa Yehova
“Kiko ku boso ta hasi, traha riba dje ku henter boso alma komo si fuera pa Yehova.”—KOL. 3:23.
1-3. (a) Hesus su morto na e staka di tormento ta nifiká ku Yehova no ta ferwagt ningun sakrifisio di nos? Splika. (b) Ki pregunta ta lanta enkuanto hasimentu di sakrifisio awe?
DEN promé siglo di nos era, Yehova a laga su pueblo komprondé bon kla ku e sakrifisio di reskate di Hesus a pone fin na e Lei di Moises. (Kol. 2:13, 14) Sakrifisio di animal i e otro sakrifisionan ku e hudiunan a hasi pa sientos di aña no tabata nesesario mas; nan no tabatin ningun balor mas. E Lei a kumpli ku su papel komo ‘tutor ku a guia e hudiunan na Kristu.’—Gal. 3:24.
2 Pero esaki no ta nifiká sí ku kristiannan no mester hasi sakrifisio mas. Al kontrario, apòstel Pedro a indiká ku nos mester “ofresé sakrifisio spiritual ku ta agradá Dios pa medio di Hesukristu.” (1 Ped. 2:5) Es mas, apòstel Pablo a mustra ku ora kristiannan ta hiba un bida dediká na Dios, henter nan bida por ser konsiderá komo “un sakrifisio” na Dios.—Rom. 12:1.
3 Pues, nos por bisa ku un kristian ta hasi sakrifisio na Yehova ora e ta duna Yehova sierto kosnan òf ta stòp di hasi sierto kosnan pa por sirbié mihó. Awor, en bista di loke Yehova a rekerí di e israelitanan, kon nos por ta sigur ku tur e sakrifisionan ku nos ta hasi awendia ta aseptabel pa Yehova?
DEN NOS BIDA DI TUR DIA
4. Kiko nos mester kòrda relashoná ku nos aktividatnan di tur dia?
4 Kisas ta difísil pa mira e konekshon entre hasimentu di sakrifisio na Yehova i nos aktividatnan di tur dia. Ta parse ku kosnan manera trabou, hùiswèrk, keasernan di kas, hasimentu di kompra no tin nada di haber ku nos adorashon. Sinembargo, si bo a dediká bo bida na Yehova òf bo tin pensá di hasi esei pronto, e ora ei e aktitut ku bo tin pa ku e aktividatnan akí ta importante. Kòrda ku ta 24 ora pa dia nos ta kristian. Pues, nos tin ku apliká prinsipio bíbliko den tur situashon di bida. Ta p’esei Pablo a urgi nos: “Kiko ku boso ta hasi, traha riba dje ku henter boso alma komo si fuera pa Yehova, i no pa hende.”—Lesa Kolosensenan 3:18-24.
5, 6. Kiko por yuda nos determiná kon pa komportá nos mes i kon pa bisti?
5 Ta bèrdat ku nos aktividatnan di tur dia no ta parti di nos sirbishi na Dios. Pero e echo ku Pablo ta urgi nos pa hasi tur kos di “henter [nos] alma komo si fuera pa Yehova” ta motivá nos pa pensa riba e manera ku nos ta komportá nos mes tur ora. Pero, kon nos por apliká e konseho akí di Pablo? Puntra bo mes: ‘Ta tur ora mi kondukta i manera di bisti ta pas pa un kristian?’ Òf sa sosodé ku bo tin bèrgwensa di identifiká bo mes komo un Testigu di Yehova durante bo aktividatnan diario pasobra bo kondukta òf manera di bisti no ta apropiá? No laga esei ta e kaso nunka! Komo e pueblo di Yehova, hamas nos mester hasi algu ku lo por pone otro hende pensa malu di e nòmber di Yehova.—Isa. 43:10; 2 Kor. 6:3, 4, 9.
6 Laga nos analisá awor ki efekto e deseo pa hasi tur kos di “henter [nos] alma komo si fuera pa Yehova” tin riba vários área di nos bida. Segun ku nos ta hasi esei, tene na mente ku tur e sakrifisionan ku e israelitanan a ofresé Dios mester tabata lo mihó.—Éks. 23:19.
EFEKTO RIBA NOS BIDA
7. Kiko dedikashon kristian ta enserá?
7 Ora bo a dediká bo mes na Yehova, bo a tuma e desishon ei sin pone ningun kondishon, no ta bèrdat? De echo, bo a primintí ku den tur aspekto di bo bida lo bo pone Yehova na promé lugá. (Lesa Hebreonan 10:7.) Esei tabata un bon desishon. I sin duda bo a ripará ku ora bo buska pa sa kiko ta Yehova su boluntat den un asuntu i hasi esfuerso pa aktua na armonia ku esaki, semper lo bo tin bon resultado. (Isa. 48:17, 18) Pues, nos ta un pueblo santu i felis pasobra nos ta desplegá e kualidatnan di Yehova, Esun ku ta instruí nos.—Lev. 11:44; 1 Tim. 1:11.
8. Dikon nos no mester lubidá ku e ofrendanan di e israelitanan tabata santu pa Yehova?
8 Pa Yehova, e ofrendanan ku e israelitanan tabata presentá na dje tabata santu. (Lev. 6:25; 7:1) E palabra hebreo tradusí komo “santidat” ta transmití e idea di algu ku ta separá, eksklusivo òf santifiká pa Dios. Pues, pa nos sakrifisionan por ta aseptabel pa Yehova, nos mester keda separá i liber di influensia mundano. Nos no por ta stima e kosnan ku Yehova ta odia. (Lesa 1 Huan 2:15-17.) Esaki ta enserá anto ku nos mester evitá di hasi kosnan òf anda ku personanan ku por hasi nos impuru den bista di Dios. (Isa. 2:4; Rev. 18:4) E ta enserá tambe ku nos no mester wak nada ku ta impuru òf inmoral ni sigui pensa riba e kosnan akí.—Kol. 3:5, 6.
9. Dikon e manera ku nos ta trata otro hende ta importante?
9 Pablo a urgi su kompañeronan kristian: “No lubidá di hasi bon i di kompartí loke boso tin ku otro hende, pasobra e tipo di sakrifisionan ei ta agradá Dios.” (Heb. 13:16) Pues, ora nos ta hasi loke ta bon i ta yuda hende, Yehova lo mira nos echonan komo sakrifisio aseptabel na dje. E interes i kariño ku nos ta mustra na otro hende ta un karakterístika ku ta identifiká kristiannan berdadero.—Huan 13:34, 35; Kol. 1:10.
DEN NOS ADORASHON
10, 11. Kon Yehova ta mira nos sirbishi i nos adorashon, i esaki mester motivá nos pa hasi kiko?
10 Un di e maneranan di mas remarkabel ku nos ta hasi bon na hende ta di “proklamá nos speransa” na nan. Abo ta probechá di tur oportunidat pa duna testimonio? Pablo a yama e trabou importante akí “un sakrifisio di alabansa, esta, e fruta di nos lepnan, ku ta deklará [Dios] su nòmber públikamente.” (Heb. 10:23; 13:15; Hos. 14:2) P’esei ta bon pa nos para ketu un ratu i pensa riba e kantidat di tempu ku nos ta dediká na predikashon di e bon notisia i tambe kon nos por mehorá nos manera di prediká. Hopi di e partinan den e Reunion di Sirbishi ta un bon yudansa den esaki. Nos tin ku kòrda ku nos sirbishi di vèlt i dunamentu di testimonio informal ta “un sakrifisio di alabansa,” esta, parti di nos adorashon; pues, ku poko palabra, nos tin ku duna lo mihó ku nos por. Klaru ku no ta tur hende tin e mesun sirkunstansianan; pero hopi biaha, e kantidat di tempu ku nos ta dediká na e trabou di prediká ta reflehá kuantu apresio nos tin pa kosnan spiritual.
11 Di akuerdo ku e boluntat di Yehova, kristiannan ta apartá tempu regularmente pa ador’é, sea komo kongregashon òf den privá. Ta bèrdat ku nos no tin ku warda sabat mas ni bai Herúsalèm pa asistí na sierto fiestanan. No opstante, e prinsipionan tras di e leinan ku a stipulá esakinan ta konta pa nos tambe. Por ehèmpel, meskos ku den pasado, Dios ke pa su sirbidónan stòp ku obranan inútil i dediká tempu na studia su Palabra, hasi orashon i asistí na reunionnan kristian. I kabesnan di famia tin e responsabilidat di tene un anochi di Adorashon Komo Famia ku esnan ku ta biba bou di nan dak. (1 Tes. 5:17; Heb. 10:24, 25) Pues, ta bon pa nos tur puntra nos mes: ‘Lo mi por mehorá e kalidat di mi adorashon?’
12. (a) Ku kiko Beibel ta kompará e ofrendanan di sensia ku nan tabata ofresé na Yehova den pasado? (b) Den ki sentido nos orashonnan por ta manera sensia?
12 Rei David a kanta na Yehova: “Laga mi orashon wòrdu poní bo dilanti manera sensia.” (Sal. 141:2) Pensa un ratu riba bo orashonnan, riba nan kalidat i e frekuensia ku bo ta hasi nan. E buki di Revelashon ta kompará “orashon di e santunan” ku sensia. Dikon? Pasobra esakinan ta agradabel i den un sentido nan ta subi bai serka Yehova manera un holó dushi i plasentero. (Rev. 5:8) Den antiguo Israel, nan mester a prepará e sensia ku nan tabata ofresé regularmente riba e altar di Yehova ku sumo atenshon i segun un fórmula spesial. Ta solamente ora nan a presentá e ofrendanan di sensia akí segun e instrukshonnan ku Yehova a establesé, e tabata aseptá nan. (Éks. 30:34-37; Lev. 10:1, 2) Di mesun manera, si nos orashonnan ta sinsero i konforme Yehova su rekisitonan, nos por tin sigur ku nan ta aseptabel p’e.
DUNA I RISIBÍ
13, 14. (a) Kon Epafrodito i e kongregashon di Filipo a yuda Pablo, i kon Pablo a reakshoná? (b) Kon nos por sigui e ehèmpel di Epafrodito i di e filipensenan?
13 Sea ku nos ta duna hopi òf tiki sèn, nos kontribushonnan pa sostené e obra mundial di prediká tambe ta un tipo di sakrifisio. (Mar. 12:41-44) Den promé siglo, e kongregashon di Filipo a manda Epafrodito Roma pa yuda Pablo. Evidentemente, Epafrodito a hiba plaka ku e kongregashon a manda komo regalo pa Pablo. Esaki no tabata e promé biaha ku e filipensenan a mustra generosidat na Pablo. Nan a manda sèn pa Pablo, ya e no tabatin nodi di preokupá tokante plaka; asina e por a dediká mas tempu na su sirbishi. Kiko Pablo a pensa di e regalo? Wèl, el a bisa ku e regalo tabata “un holó dushi, un sakrifisio aseptabel, ku ta agradá Dios.” (Lesa Filipensenan 4:15-19.) Pablo sigur a apresiá e bunita gesto ei, i Yehova tambe.
14 Awe ta meskos: Yehova ta keda masha kontentu ku nos kontribushonnan pa e obra mundial. Es mas, el a primintí ku si nos sigui pone interesnan di Reino na promé lugá den nos bida, lo e sòru pa nos tin tur loke nos mester, tantu den sentido spiritual komo material.—Mat. 6:33; Luk. 6:38.
DEMOSTRÁ BO APRESIO
15. Menshoná algun motibu pakiko bo ta gradisidu na Yehova.
15 Si nos mester kuminsá menshoná tur e motibunan ku nos tin pa ta gradisidu na Yehova, tempu lo kaba laga nos. Pa kuminsá, nos ta masha gradisidu ku el a duna nos bida, un regalo presioso. I nos mester gradisié tur dia pa esei, no ta bèrdat? Banda di esei, e ta duna nos tur loke nos tin mester pa keda na bida: kuminda, paña, un lugá di biba i e airu ku nos ta respirá. Nos ta gradisidu tambe pa e konosementu eksakto ku ta duna nos fe i un bunita speransa pa futuro. Pues, pa e solo echo ku Yehova ta nos Kreador i pa tur e kosnan ku el a hasi pa nos, ta na su lugá anto pa nos ador’é i ofres’é sakrifisio di alabansa.—Lesa Revelashon 4:11.
16. Kon nos por demostrá nos apresio pa e sakrifisio di reskate di Hesus?
16 Manera nos a siña den e artíkulo anterior, Yehova Dios a duna humanidat un regalo masha balioso: e sakrifisio di reskate di Hesukristu. Esaki ta un manera sobresaliente ku Dios a demostrá su amor pa nos. (1 Huan 4:10) Pues, kon nos por demostrá nos gratitut? Pablo a bisa: “E amor di Kristu ta obligá nos pa hasi esaki, ya ku ta na e konklushon akí nos a yega: ún hende a muri pa tur, . . . i el a muri pa tur, pa esnan ku ta biba no biba mas pa nan mes, ma pa esun ku a muri pa nan i a ser lantá for di morto.” (2 Kor. 5:14, 15) Bon mirá, loke Pablo tabata ke men ta ku si nos realmente ta apresiá Dios su bondat inmeresí, nos lo usa nos bida pa mustra onor na Dios i na Su Yu. Nos ta demostrá nos amor i apresio pa Dios i pa Kristu mediante nos obedensia i nos deseo pa prediká i hasi disipel.—1 Tim. 2:3, 4; 1 Huan 5:3.
17, 18. Kua ta algun manera ku algun ruman ta oumentá nan sakrifisio di alabansa na Yehova? Duna un ehèmpel.
17 Abo lo por ofresé un mihó sakrifisio di alabansa na Yehova? Despues ku algun ruman a reflekshoná riba tur e bon kosnan ku Yehova a hasi pa nan, nan a disidí di organisá nan asuntunan di tal manera ku nan por hasi mas den e organisashon di Yehova i den e trabou di prediká. Algun di nan awor por traha komo pionero ousiliar ún òf mas luna pa aña, i otronan a asta kuminsá traha pionero regular. Tin otronan ta yuda ku proyektonan di konstrukshon. Akaso esakinan no ta maneranan ekselente pa mustra nos apresio? Si nos ta hasi e sakrifisionan akí ku e motivashon korekto—esta pa demostrá nos apresio i gratitut na Yehova—e obranan di sirbishi sagrado akí lo ta aseptabel pa Dios.
18 Hopi kristian ta sinti ku nan debe Yehova, i esei ta motivá nan pa demostrá nan gratitut na dje. Morena ta ún di nan. Morena a lanta den un famia katóliko, pero e tabatin hopi pregunta tokante Dios i e propósito di bida. El a buska kontesta pa su preguntanan tantu den religion katóliko komo den filosofia asiátiko. Pero niun di esakinan no a yud’é. Ta ora el a kuminsá studia Beibel ku Testigunan di Yehova, el a ser sasiá den sentido spiritual. Morena tabata masha gradisidu na Yehova pa loke el a siña den Beibel; esei a duna su bida propósito. Pa demostrá su gratitut, Morena a disidí di usa tur su energia den Yehova su sirbishi. Manera el a batisá, el a kuminsá traha pionero ousiliar riba un base regular. I asina ku su sirkunstansianan a permití, el a bira pionero regular. Esei tabata 30 aña pasá; ainda Morena ta traha den sirbishi di tempu kompleto.
19. Kon lo bo por hasi mas sakrifisio pa Yehova?
19 Ta klaru ku tin hopi sirbidó fiel di Yehova ku no por traha pionero, pasobra nan sirkunstansianan no ta permití esei. Pero sea ku nos ta pionero òf nò, nos tur por ofresé Yehova sakrifisio aseptabel. Kon asina? Nos tin ku sòru pa nos kondukta semper ta na armonia ku Yehova su prinsipionan. Nos tin ku kòrda ku tur ora bai nos ta representá Yehova. Pa loke ta nos fe, nos mester tin pleno konfiansa ku Dios lo kumpli ku tur su propósitonan. I pa loke ta nos obranan, nos ta yuda plama e bon notisia. P’esei, pa demostrá ku realmente nos ta apresiá tur loke Yehova a hasi pa nos, laga nos sigui hasi sakrifisio di henter nos alma pa Yehova.
[Preguntanan di Estudio]
[Komentario na página 27]
Yehova su bondat ta motivá bo pa mehorá bo kalidat di sakrifisio di alabansa?
[Plachi na página 25]
Bo ta probechá di tur oportunidat pa duna testimonio?
