Hesus Tabatin un Beibel?

NÒ, Hesus no tabatin un Beibel. Dikon no? Pasobra e Beibel kompletu manera nos tiné awe no tabata eksistí den Hesus su tempu. Sin embargo, snoanan tabatin kolekshon di ròlnan ku a kontené e skrituranan ku a bin forma parti di e Beibel ku nos konosé awe. Hesus a lesa for di e ròlnan di Isaias den e snoa na Názarèt. (Lukas 4:16, 17, BPK) Apòstel Pablo a tende “lesamentu di e Lei i e Profetanan” den Antiokia na Pisidia. (Echonan 13:14, 15) I disipel Santiago a bisa ku e skrituranan di Moisés ‘a wòrdu lesá den snoa riba tur dia di sabat.’—Echonan 15:21.

Pero tabatin hende den promé siglo ku tabatin nan mes ròlnan di e Santu Skritura? Ta bisto ku e eunuko etiopio di e korte di Reina Kandase tabatin ròlnan, pasobra e tabata ‘sintá den su garoshi ta lesa profeta Isaias,’ ora disipel Felipe a top’é riba kaminda pa Gaza. (Echonan 8:26-30) Apòstel Pablo a pidi Timoteo pa trese e ròlnan, “spesialmente e pèrkamèntnan.” (2 Timoteo 4:13) Ounke Pablo no a bisa spesífikamente kua ròlnan e mester a trese, ta posibel ku esakinan tabata partinan di e Skritura Hebreo.

Segun Alan Millard, profèser di idiomanan semítiko, probablemente ta algun hudiu, esta ‘hòmbernan privilegiá den Palestina, tur esnan ku tabata afirmá di ta eduká, i algun di e fariseonan i maestronan manera Nikodemo,’ so tabatin ròlnan di e Skritura. Un di e motibunan tabata e kosto. Millard ta kalkulá ku “un kopia di Isaias tabata kosta entre seis pa dies denario,” i a bisa ku un Beibel hebreo kompletu “lo a yena 15 pa 20 ròl,” i lo por a kosta mas o menos e salario di mitar aña di trabou.

Beibel no ta bisa si Hesus òf su disipelnan tabatin kopia di ròlnan di Beibel. Pero no tin duda ku Hesus tabata konosé e Skritura bon, ya ku e por a referí na e Skritura òf sita tekstonan bíbliko for di kabes. (Mateo 4:4, 7, 10; 19:4, 5) Awendia Beibel ta na alkanse di un i tur i e no ta karu. Esei no mester motivá nos pa familiarisá nos mes bon ku e Beibel?