Un Afrikano Humilde Ku A Stima e Palabra di Dios

BISHITANTENAN na Afrika ta keda hopi bes sorprendí ora nan ripará kon fásil ta pa kuminsá un kòmbersashon riba temanan bíbliko ku e hendenan lokal. Preguntanan manera: “Kiko e Reino di Dios ta?” òf “Tin un solushon duradero pa problemanan manera skarsedat di kuminda, malesa, guera i krímen?,” fásilmente ta atraé hende pa skucha. Hopi hende gustosamente ta permití un deskonosí mustra nan e kontestanan for di Beibel. Hopi biaha esaki ta hiba na un estudio regular di Beibel. I segun ku e studiantenan ta hasi progreso spiritual, nan ta bira kristiannan batisá.

Na Echonan 8:26-40, Beibel ta menshoná un di e promé afrikanonan ku a reakshoná den e manera ei. E tabata un hòmber di Etiopia ku a bai Yerusalèm pa adorá e Dios berdadero, Yehova.

Manera e plachi abou ta mustra, e etiopio tabata bayendo kas bèk den su garoshi, i tabata lesa for di un ròl habrí. Un persona deskonosí a aserk’é i puntr’é: “Bo ta komprondé loke bo ta lesa?” Humildemente, e etiopio a atmití ku e mester di yudansa i a supliká e persona deskonosí, e evangelisadó kristian Felipe, pa subi bin sinta den e garoshi. Kaba el a pidi Felipe splik’é e nifikashon di e parti di Skritura ku el a kaba di lesa. Felipe a splik’é ku esei tabata un profesia ku a apliká na e morto resien di e Mesias, Hesukristu. Tambe Felipe a “predik’é Hesus” dor di kont’é otro asuntunan relashoná ku e bon notisia tokante Hesus, inkluyendo sin duda e resurekshon di Hesus.

Despues di a tende e bèrdatnan maravioso aki, e etiopio kier a bira un disipel di Hesus i a puntra: “Kiko ta stroba pa mi wòrdu batisá?” Despues di su boutismo, e afrikano humilde aki a sigui su kaminda pa kas kontentu di dje, i Beibel no ta papia mas di dje.

Awe, Testigunan di Yehova ta yudando miónes di hende rònt mundu siña e mesun bon notisia. Aktualmente nan ta kondusí rònt di seis mion estudio di Beibel ku hende.