Hende Su Esfuerso pa Agradá Dios

“NUNKA a yega di eksistí un sosiedat humano den kua Dios no a hunga niun papel; por lo general e ta esun ku ta krea i dirigí kosnan. Esei ta konta asta pa e sosiedatnan ku ta skohe konsientemente pa no kere den Dios.” Asina John Bowker a skirbi den su buki God—A Brief History (Un Historia Kòrtiku di Dios). Di un manera òf otro, e esfuerso pa haña Dios i pa gana su aprobashon ta un karakterístika masha komun den komportashon humano. Rònt mundu, hopi hende tin deseo sinsero pa agradá Dios. Solamente, e manera ku nan ta purba hasi esaki ta varia di kreensia pa kreensia.

Algun hende ta pensa ku e úniko kos ku bo tin ku hasi pa gana e aprobashon di Dios ta di biba bon. Otronan ta haña ku pa logra esei nan tin ku hasi obranan di karidat pa hende pober. Ademas, pa miónes di hende seremonianan i ritonan religioso ta masha importante.

Di otro banda, tin hende ta kere ku nan no por hala serka Dios—ku e ta muchu leu òf muchu okupá ku otro asuntunan pa presta atenshon na hende ordinario. Supuestamente e filósofo Epikurio di antiguo Gresia a bisa ku ‘e diosnan ta muchu leu; nan no por hasi ni bon ni malu pa bo.’ Pero ta nèt e hendenan ku ta pensa asina tin inklinashon religioso. Algun di nan ta asta ofresé sakrifisio i ta efektuá ritonan ku e speransa di kalma nan antepasadonan defuntu.

Kiko abo ta pensa? Dios realmente ta tuma nota di nos esfuersonan pa haña su aprobashon? Nos por tin efekto riba Dios su sintimentunan i agrad’é?

 [Rekonosementu pa Pòtret na página 2]

KAFT: Kortesia di ROE/Anglo-Australian Observatory, potrèt saká dor di David Malin