Mi mayornan a haña e bèrdat despues di 1920. Esei tabata promé ku nan a kasa. M’a nase na Inglatera na kuminsamentu di 1939. Fo’i mucha mi tabata bai reunion ku mi mayornan i tabata gusta Skol di Ministerio Teokrátiko. Te dato dia djawe, mi ta kòrda kon mi mester a para riba un kaha pa yega na e stènt pa mi duna mi promé parti. Mi tabatin seis aña so, i tur nèrvioso mi tabata wak esnan sintá den ouditorio.

Pa sirbishi, mi tata a taip un presentashon fásil pa mi riba un karchi. Mi tabatin ocho aña e promé biaha ku mi so a yama na un kas. Esta kontentu m’a bira ora e persona a lesa mi karchi i mesora a aseptá e buki “Sea Dios veraz.” M’a kore bai konta mi tata! Sirbishi i reunion tabata hasi mi sinti kontentu, nan a duna mi gana di sirbi Yehova fultaim.

Mi tata a sera un abonamènt di E Toren di Vigilansia pa mi. Asina un edishon nobo a yega den pòst mi tabata kore les’é. For di e momento ei padilanti, m’a kuminsá stima e bèrdatnan di Beibel mas i mas. Anto mi konfiansa den Yehova a krese i ku tempu m’a dediká mi bida na dje.

Na 1950, nos famia a bai New York pa asistí n’e asamblea Oumento di Teokrasia. Riba djaweps 3 di ougùstùs e tema di dia tabata “Dia di Misionero.” Ruman Carey Barber, kende despues a bira miembro di Kuerpo Gobernante, a duna e diskurso di boutismo e dia ei. Ora el a hasi e kandidatonan e dos preguntanan na final di su diskurso, m’a lanta para i bisa: “Sí!” Aunke mi tabatin 11 aña, m’a komprondé  ku m’a dal un paso masha importante. Mi tabatin miedu di drenta awa pasobra mi no a siña landa ainda. Mi tio a bai ku mi i a sigurá mi ku tur kos lo bai bon. Anto e tabatin rason, e kosnan a kana asina lihé ku mi pia ni sikiera a mishi ku bòm dje zuèmbat. M’a pasa di un ruman pa otro; un a batisá mi i un otro a hisa mi saka mi afó. Desde e dia importante ei, Yehova semper a hasi mi bereanan stret.

Mi meta tabata pa kaba skol i bira pionero, pero mi menernan di skol a preshoná mi pa mi bai universidat. Na universidat, m’a ripará masha lihé ku mi no por a keda fuerte den e bèrdat si na mes momento mi mester a hasi mi bèst ku mi estudio. Pues, m’a disidí di stòp ku mi estudio. M’a hinka e asuntu den orashon, i m’a skirbi un karta splikando ku lo mi stòp na fin di e promé aña ei. M’a konfia den Yehova i mesora a kuminsá traha pionero.

Na yüli 1957, m’a kuminsá traha pionero na e stat di Wellingborough. M’a pidi e rumannan na Bètel di Lònden pa un ruman pionero ku eksperensia ku mi por traha huntu kuné. Nan a rekomendá mi Ruman Bert Vaisey. El a bira mi mèntòr i su zelo a yuda mi krea un bon programa di prediká. Den kongregashon tabatin: ami, Ruman Vaisey i seis ruman muhé di edat. Preparashon pa tur reunion i partisipashon den nan a yuda mi haña mas konfiansa den Yehova. Anto dunamentu di komentario a duna mi hopi oportunidat pa papia tokante mi fe.

M’a bai prizòn pa un tempu kòrtiku debí ku m’a nenga di bai guera. Poko tempu despues m’a topa Barbara, un pionero spesial. Nos a kasa na 1959 i tabata dispuesto pa sirbi den kualke asignashon. Nos promé asignashon tabata na Lancashire na nortwèst di Inglatera. Djei, na yanüari 1961, m’a haña invitashon pa Skol di Ministerio di Reino ku lo a dura un luna na Bètel di Lònden. Pa mi gran sorpresa, na final di e kurso, nan a nombrá mi superintendente di sirkuito. M’a pasa dos siman na e stat di Birmingham ta haña entrenamentu serka un superintendente di sirkuito ku eksperensia, i Barbara tabatin mag di kompañá mi. Djei, nos a bai nos asignashon ku tabata den e provinsianan di Lancashire i Cheshire.

Na ougùstùs 1962, miéntras nos tabata ku fakansi, nos a haña un karta di sukursal. Den dje tabatin formulario pa Skol di Galaad! Nos a hasi orashon na Yehova, yena e formularionan i a manda nan mesora sukursal. Sinku luna despues, nos tabata rumbo pa Brooklyn, New York, pa e di 38 klas di Galaad, un kurso di dies luna.

 Na Galaad, nos no a siña tokante e Palabra di Dios i e organisashon so, pero tambe tokante nos hermandat. Nos no tabatin ni 25 aña ainda, i nos a siña hopi for di e otro rumannan den nos klas. Pa mi asignashon di trabou na Galaad, mi tabatin e privilegio di traha tur dia huntu ku Ruman Fred Rusk, un di nos instruktornan. Algu masha importante ku el a siña mi ta pa semper hasi sigur ku bo ta duna konseho basá riba Beibel. Na e skol, nos a haña diskurso di rumannan eksperensiá manera Nathan Knorr, Frederick Franz i Karl Klein. Nos a siña hopi for di e humildat di Ruman A. H. Macmillan. Den su diskurso, el a splika nos kon Yehova a guia su pueblo durante e tempunan difísil ku e organisashon a pasa aden entre 1914 pa komienso di 1919.

Kasi na final di e skol, Ruman Knorr a bisa ami ku Barbara ku nan lo manda nos Burundi na Afrika. Mesora nos a bai n’e biblioteka di Bètel pa buska den Anuario kuantu publikadó Burundi tabatin na e momento ei. Pa nos sorpresa, nos no a haña niun informashon di e pais. Pues, nos lo a bai un teritorio ku nunka a ser prediká i na un kontinente ku nos no tabata sa mashá di dje. Nos a bira masha nèrvioso mes, pero despues ku nos a hasi orashon nos a kalma.

Tur kos na nos asignashon tabata kompletamente nobo pa nos: e klima, e kultura i e idioma. Nos mester a siña franses. Huntu ku tur esei, nos mester a buska un lugá di biba. Dos dia despues ku nos a yega, Harry Arnott, un di e rumannan ku tabata den klas ku nos, a pasa bishitá nos na kaminda bèk pa su asignashon na Zambia. El a yuda nos haña un apartamento ku a bira nos promé kas di misionero. Pero, no a tarda mashá ku nos a haña nos ku problema ku outoridatnan, kende no tabata sa nada tokante Testigunan di Yehova. Nèt ora nos a kuminsá disfrutá di nos asignashon, nos a bin komprondé ku sin pèrmit di trabou nos no por keda den e pais. Ku doló na nos kurason, nos mester a sali for di Burundi i bai Uganda.

 Nos tabatin un tiki miedu pa bai Uganda sin visa, pero nos a konfia den Yehova. Un ruman kanades, ku tabata sirbi na Uganda, a splika nos situashon na e personal di imigrashon. Nos a haña un par di luna pa regla nos papelnan pa keda den e pais. N’e manera ku e kosnan a kana tabata bisto ku Yehova tabata yuda nos.

E situashon na Uganda tabata hopi diferente, e trabou di prediká ya tabata tumando lugá aunke tabatin solamente 28 Testigu di Yehova den henter e pais. Den teritorio, nos tabata haña hopi hende ku tabata papia ingles. Pero, nos a bin realisá masha lihé ku nos mester a siña un di e idiomanan lokal si nos kier a yuda hende interesá progresá den e bèrdat. Nos a kuminsá prediká den e área Kampala, einan nan tabata papia luganda. Pues, nos a kuminsá siña e idioma ei. A tuma nos un par di aña pa nos por a papia e idioma bon. Pero, nos por a prediká na hopi mas hende. Nos a kuminsá komprondé mihó e nesesidatnan spiritual di nos studiantenan. I nan a habri nan kurason i a bisa nos kon nan tabata sinti tokante loke nan tabata siñando.

Nos tabatin masha goso pa siña hende e bèrdat. Anto nos a haña mas goso ainda ora nan a pidi nos pa sirbi komo superintendente biahero den henter e pais. Bou di guia di e sukursal di Kenia nos a biaha den henter e pais pa wak unda tabatin mester di pionero spesial. Na vários okashon, hende ku nunka a topa Testigunan di Yehova a demostrá nos masha hospitalidat. Nan a laga nos sinti nos na kas i a asta kushiná pa nos.

Despues, mi mester a hasi un otro tipo di biahe. For di Kampala m’a biaha dos dia ku trein bai e haf di Mombasa na Kenia, i djei m’a subi barku pa bai Seychelles, un grupo di isla ku ta keda den Oséano Indio. Mas despues di 1965 pa 1972, Barbara a kompañá mi na e bishitanan regular na Seychelles. Durante e tempu ei, tabatin dos publikadó, pero despues tabatin un grupo ku al final a bira un kongregashon. Den mi otro biahenan m’a bishitá rumannan na Eritrea, Etiopia i Sudan.

Na Uganda, e situashon polítiko a kambia despues ku un grupo militar a baha e gobièrnu. E añanan ku a sigui tabata masha teribel mes, i m’a mira e sabiduria di obedesé e instrukshon di Beibel pa “duna Sésar loke ta di Sésar.” (Mar. 12:17) Dado momento tur estranhero mester a bai registrá n’e warda di polis mas serka di nan kas. Nos a hasi esei mesora. Un par di dia despues, ami ku un misionero tabata koriendo outo na Kampala i polis a para nos. Nos kurason tabata bati te den nos garganta! Nan a akusá nos di ta spion i a bai ku nos n’e warda prinsipal. Einan nos a splika nan ku nos ta misioneronan pasífiko i ku nos a registrá kaba. Pero nan no a hasi kaso. Nan a arestá nos i a hiba nos e warda di polis ku tabata mas serka di e kas di misionero. Un di e polisnan einan a rekonosé nos. E tabata sa ku nos a registrá, i el a manda e otro polis pa laga nos liber. Esta un alivio esei tabata!

 Durante e temporada ei, e militarnan tabata blòkia kaminda. E situashonnan ei tabata duna nos tenshon foral ora e sòldánan tabata burachi. Pero tur biaha nos tabata hasi orashon, i ora nan tabata laga nos pasa nos tabata sinti alivio. Lamentablemente, na 1973 tur misionero estranhero mester a sali for di Uganda.

Nos a bolbe haña un otro asignashon, e biaha akí na Côte d’Ivoire, Wèst Afrika. Esei tabata un otro kambio pa nos: kultura nobo, papia franses henter dia atrobe anto siña biba ku misioneronan di diferente pais bou di e mesun dak. Pero, atrobe ami ku Barbara por a mira kon Yehova tabata dirigí asuntu ora hende humilde tabata aseptá e bon notisia mesora. Nos por a mira ku debí ku nos a konfia den Yehova, e tabata hasi nos bereanan stret.

Diripiente, nos a haña un mal notisia: Barbara tabatin kanser. Nos a bai Europa vários biaha pa Barbara haña tratamentu. Pero, na 1983 nos a realisá ku nos no por a keda den nos asignashon na Afrika. Esei a kibra nos mashá!

Miéntras nos tabata sirbi na Bètel di Lònden, Barbara su salú a sigui bai atras te ku el a fayesé. M’a haña hopi apoyo i sosten serka e famia di Bètel. Un pareha en partikular a yuda mi adaptá i sigui konfia den Yehova. Despues di tempu m’a konosé Ann, un komiuter na Bètel ku ántes tabata pionero spesial. Nos a kasa na 1989 i for di e tempu ei nos ta na Bètel.

Di 1995 pa 2018, mi tabatin e privilegio di bishitá kasi 60 pais komo representante di sede mundial. Den kada pais m’a mira kon Yehova a bendishoná su sirbidónan bou di vários sirkunstansia.

Na 2017 un di nos biahenan a hiba mi bèk na Afrika. Mi tabata kontentu di por a hiba Ann pa promé biaha na Burundi. Tabata interesante pa mira kuantu hende a drenta e bèrdat. Den e kaya unda mi tabata prediká na 1964, awor tin un bunita Bètel i tin mas ku 15.500 publikadó.

M’a bira masha kontentu ora m’a mira Côte d’Ivoire riba e lista di pais ku lo m’a bishitá na 2018. Ora m’a yega Abidjan, e kapital, m’a sinti manera ta kas m’a yega. Unabes nos a yega Bètel, m’a mira riba e lista di number di telefòn un nòmber ku m’a rekonosé: Sossou. E ruman tabata den e kamber banda di nos. Tempu mi tabata na Abidjan tabatin un ruman Sossou ku tabata superintendente di stat. M’a kere ku tabata é pero mi tabata robes, e Sossou akí tabata su yu.

Yehova a kumpli ku su palabra. Di tur e situashonnan difísil ku m’a pasa aden, m’a siña ku ora nos konfia den Yehova di bèrdat e ta hasi nos bereanan stret. Awor mas ku nunka mi ke sigui kana pa semper riba e berea ku ta hiba na bida eterno den e mundu nobo.—Pro. 4:18.