1. Dikon e Testigunan di Yehova ta un pueblo felis? (Wak e promé plachi.)

TESTIGUNAN DI YEHOVA sin duda ta un pueblo felis. Ki ora ku nan ta huntu, sea ta na reunion di kongregashon, na asamblea òf na un enkuentro sosial, nan ta kòmbersá ku smak i ta hari ku otro. Kon bini nan ta asina felis? E motibu prinsipal ta ku nan konosé Yehova, “e Dios felis,” i nan ta sirbié i ta trata di imit’é. (1 Tim. 1:11; Sal. 16:11) Yehova ta e Fuente di felisidat, i p’esei e ke pa nos ta felis, i e ta duna nos hopi motibu pa alegrá.—Deu. 12:7; Ekl. 3:12, 13.

2, 3. (a) Kiko ta nifiká sinti bo felis? (b) Ki sirkunstansianan por hòrta nos di felisidat?

² Kiko di abo? Bo ta felis? Kiko bo por hasi pa bo ta mas felis? Wèl, sinti bo felis ta nifiká sinti bo bon, hopi kontentu i satisfecho ku loke bo tin den bida. Beibel ta mustra ku si nos ke ta realmente felis nos mester tin un bon relashon ku Yehova. Pero kisas no ta fásil pa nos ta felis den e mundu djawe. Dikon?

³ Tin vários sirkunstansia ku por hòrta nos di felisidat, manera ora un ser kerí muri òf ser ekspulsá, òf si nos pèrdè  trabou òf haña nos ku divorsio. Tambe por ta difísil pa nos ta felis si na kas no tin pas debí ku kada bes tin pleitamentu, si koleganan di trabou òf kompañeronan di skol ta hasi bofon di nos òf si nos ta ser persiguí òf enkarselá pasobra nos ta sirbi Yehova. Ademas, por sosodé ku nos salú ta bai atras, nos ta haña un malesa króniko òf ta sufri di depreshon. Sinembargo, kòrda ku Hesukristu “e felis i úniko Señor Poderoso” tabata gusta konsolá hende i hasi nan felis. (1 Tim. 6:15; Mat. 11:28-30) Den e Sermon Riba Seru, Hesus a duna konseho práktiko ku por kontribuí na nos felisidat aunke ku tin situashonnan doloroso den e mundu di Satanas.

4, 5. Kiko nos mester hasi pa nos haña felisidat duradero?

⁴ E promé kos ku Hesus a menshoná ta hopi importante. El a bisa: “Felis ta esnan ku ta konsiente di nan nesesidat spiritual, ya ku e Reino di shelu ta di nan.” (Mat. 5:3, nota.) Kon nos ta demostrá ku nos ta konsiente ku nos tin e nesesidat di konosé Dios i sigui su guia? Esei ta ora nos ta studia Beibel, obedesé Dios i pone nos sirbishi na dje na promé lugá den nos bida. Si nos hasi e kosnan ei, nos lo ta mas felis i nos fe ku e promesanan di Dios lo kumpli ta bira mas fuerte. Ademas, “e speransa felis” ku nos ta haña den e Palabra di Dios lo animá nos.—Tito 2:13.

⁵ Un amistat será i fuerte ku Yehova ta nesesario pa nos por haña felisidat duradero. Apòstel Pablo a skirbi: “Semper alegrá den Señor [Yehova]. Mi ta bolbe bisa: Alegrá!” (Flp. 4:4) Pa nos por tin e amistat balioso ei, nos mester tin sabiduria di Dios. E Palabra di Dios ta bisa: “Bendishoná ta e hende ku haña sabiduria, e hende ku haña komprondementu. E ta un palu di bida pa esnan ku ta gar’é tene, i felis ta tur esnan ku tene duru na dje.”—Pro. 3:13, 18.

6. Nos felisidat duradero ta dependé di kiko?

⁶ Awor bon, pa nos logra felisidat duradero, ta masha importante pa nos no lesa Beibel so, sino tambe sigui pone na práktika loke nos ta siña. Hesus a enfatisá e importansia di esaki ora el a bisa: “Ya ku boso sa e kosnan akí, boso lo ta felis si boso hasi nan.” (Huan 13:17; lesa Santiago 1:25.) Esei ta e klave pa satisfasé bo nesesidat spiritual i logra felisidat duradero. Pero kon nos por ta felis ora tin asina tantu kos ku por hòrta nos di felisidat? Laga nos analisá loke Hesus a sigui bisa den e Sermon Riba Seru.

7. Kon hende ku ta tristu por ta felis?

⁷ “Felis ta esnan ku ta tristu, ya ku nan lo haña konsuelo.” (Mat. 5:4) Kisas nos ta puntra nos mes: ‘Kon hende ku ta tristu por ta felis?’ Bon mirá, Hesus no tabata referí na hende ku ta tristu. Asta mal hende ta tristu debí na e problemanan ku ta reina den e ‘tempunan krítiko akí, difísil pa trata kuné.’ (2 Tim. 3:1) Pero nan ta pensa riba nan mes so i no riba Yehova, pues nan no ta purba di forma un amistat kuné, i p’esei nan no por ta felis. Hesus lo mester tabatin na mente hende ku ta konsiente di nan nesesidat spiritual i ku p’esei ta tristu ora nan mira kuantu hende ta rechasá Dios òf no ta biba manera Dios ke. Ademas, nan ta rekonosé ku nan mes ta pekadó i ku ta pa motibu di piká hopi kos teribel  ta pasa den mundu. Yehova ta tuma nota di e personanan sinsero ei, ta konsolá nan mediante Beibel i ta yuda nan logra felisidat i gana bida.—Lesa Ezekiel 5:11; 9:4.

8. Splika kon un genio suave ta kontribuí na felisidat.

⁸ “Felis ta esnan ku tin un genio suave, ya ku nan lo haña e tera.” (Mat. 5:5) Kon un genio suave ta kontribuí na felisidat? Tin hende ku ántes tabata ònbeskòp, problemátiko i agresivo, pero despues ku nan a haña konosementu eksakto di e bèrdat, nan a kambia i a bisti “e personalidat nobo.” Awor nan ta demostrá “tierno kompashon, bondat, humildat, suavedat i pasenshi.” (Kol. 3:9-12) Komo resultado, nan tin pas, nan tin bon relashon ku otro hende i nan ta felis. Es mas, e Palabra di Dios ta primintí ku e hendenan ei lo “heredá e tera.”—Sal. 37:8-10, 29.

9. (a) Den ki sentido hende di genio suave ‘lo haña, òf heredá, e tera’? (b) Dikon “esnan ku tin hamber i set pa hustisia” por ta felis?

⁹ Den ki sentido hende di genio suave ‘lo haña, òf heredá, e tera’? E disipelnan di Hesus ungí ku spiritu santu lo heredá e tera ora ku nan ta goberná komo rei i saserdote. (Rev. 20:6) I e miónes di hendenan ku no tin e speransa di bai shelu lo heredá e tera den e sentido ku nan lo tin mag di biba aki riba tera pa semper den perfekshon, pas i felisidat. Ta di e dos gruponan ei Hesus a bisa tambe: “Felis ta esnan ku tin hamber i set pa hustisia.” (Mat. 5:6) Nan deseo pa hustisia lo ser satisfasé por kompleto den e mundu nobo. (2 Ped. 3:13) Ora ku finalmente Dios eliminá tur maldat, hende hustu lo ta felis i hamas nan lo ta tristu atrobe pa motibu di maldat i inhustisia.—Sal. 37:17.

10. Kiko ser miserikòrdioso ta nifiká?

¹⁰ “Felis ta esnan miserikòrdioso, ya ku nan lo haña miserikòrdia.” (Mat. 5:7) Un hende miserikòrdioso ta un hende kaluroso, kariñoso i kompasivo, esta, ku ta sinti duele di hende ku ta sufri. Sinembargo, miserikòrdia ta enserá mas ku djis un sintimentu. Beibel ta siña ku ser miserikòrdioso ta inkluí e idea di hasi algu pa yuda otro hende.

11. Kiko nos por siña for di e ilustrashon di e bon samaritano?

¹¹ Lesa Lukas 10:30-37. Hesus su ilustrashon di e bon samaritano ta un bunita ehèmpel di kiko ta nifiká mustra miserikòrdia. Ora e samaritano a mira un hòmber ku nan a ataká, kompashon i miserikòrdia a motiv’é pa hasi algu pa duna e víktima alivio di su sufrimentu. Despues di konta e ilustrashon, Hesus a bisa: “Bai, i abo hasi meskos.” Pues, nos por puntra nos mes: ‘Ami ta hasi meskos ku e bon samaritano? Mi tambe ta demostrá kompashon? Ora mi mira otro hende ta sufri, mi ta mustra miserikòrdia na nan? Lo mi por hasi algu pa yuda nan? Por ehèmpel, mi ta ofresé yudansa práktiko na rumannan di edat, na biudanan i na hóbennan ku no tin mayornan den e bèrdat? Lo mi por tuma e inisiativa pa “papia palabranan di konsuelo ku esnan ku ta deprimí”?’—1 Tes. 5:14; Sant. 1:27.

12. Dikon nos ta sinti nos felis ora nos ta mustra miserikòrdia?

¹² Pero, dikon nos ta felis ora nos ta miserikòrdioso? Wèl, ora nos ta yuda otro hende, nos ta mira ku “tin mas felisidat den duna ku den risibí.” Ademas, nos sa ku asina nos ta agradá Yehova. (Echo. 20:35; lesa Hebreonan 13:16.) Rei David a bisa lo siguiente tokante  hende ku ta mustra miserikòrdia: “SEÑOR lo proteh’é i ten’é na bida, i e lo wòrdu yamá bendishoná riba tera.” (Sal. 41:1, 2) Si nos mustra miserikòrdia i kompashon na otro hende, Yehova tambe lo ta miserikòrdioso ku nos, i nos lo por ta felis pa eternidat.—Sant. 2:13.

13, 14. Dikon ta importante pa nos ta hende di “kurason puru”?

¹³ Hesus a bisa: “Felis ta esnan di kurason puru, ya ku nan lo mira Dios.” (Mat. 5:8) Pa nos kurason ta puru, nos pensamentu- i deseonan tambe mester ta puru, òf limpi. Esei ta masha importante, foral si nos ke pa Yehova aseptá nos adorashon.—Lesa 2 Korintionan 4:2; 1 Tim. 1:5.

¹⁴ Hende di kurason puru ta felis pasobra nan tin un bon relashon ku Yehova, kende a bisa: “Felis ta esnan ku a laba nan paña largu.” (Rev. 22:14) Den ki sentido nan ta “laba nan paña”? Pa kristiannan ungí, esei ta nifiká ku Yehova ta mira nan komo hende limpi i lo duna nan bida inmortal i felisidat pa semper den shelu. Pa e multitut grandi ku tin e speransa di biba riba tera, esei ta nifiká ku nan por ta amigu di Dios pasobra e ta konsiderá nan hustu. Beibel ta bisa ku “nan a laba nan pañanan largu i a hasi nan blanku den sanger di e Lamchi.”—Rev. 7:9, 13, 14.

15, 16. Kon hende di kurason puru por “mira Dios”?

¹⁵ Yehova a bisa: “Ningun hende no por mira mi i keda na bida!” (Éks. 33:20) Dikon anto Hesus a bisa ku esnan di kurason puru “lo mira Dios”? E palabra griego “mira” por nifiká imaginá, komprondé òf konosé. Hende ku ta mira Dios ku ‘wowo di nan kurason’ ta hende ku a siña konosé Dios bon i ku ta komprondé su kualidatnan. (Efe. 1:18) Hesus a imitá Dios su personalidat perfektamente. P’esei e por a bisa: “Esun ku a mira mi, a mira e Tata tambe.”—Huan 14:7-9.

¹⁶ Fuera di siña konosé e kualidatnan di Dios, nos por “mira Dios” ora ku nos eksperensiá kon e ta yuda nos den nos bida. (Yòb 42:5) Ademas, nos por mira Dios ora ku nos enfoká ‘e wowonan di nos kurason’ riba e bendishonnan maravioso ku e tin prepará pa hende ku ta hasi esfuerso pa keda puru i sirbié fielmente. Naturalmente, e ungínan resusitá lo mira Yehova literalmente ora ku nan haña nan rekompensa den shelu.—1 Huan 3:2.

17. Dikon hende ku ta hasi pas ta felis?

¹⁷ Hesus a sigui, bisando: “Felis ta esnan ku ta hasi pas.” (Mat. 5:9, nota.) Ora nos ta tuma inisiativa pa hasi pas, nos tin bon motibu pa ta felis. Disipel Santiago a skirbi: “Hende ku ta hasi pas lo sembra kaminda tin pas i lo kosechá e fruta di hustisia.” (Sant. 3:18) Si nos tin un konflikto ku un persona den kongregashon òf den nos famia, nos por roga Yehova pa yuda nos hasi pas. E ora ei, Yehova lo duna nos su spiritu santu, i esei lo yuda nos demostrá kualidatnan kristian i nos lo ta mas felis. Hesus a enfatisá e importansia di ta esun promé pa hasi pas ora el a bisa: “Si bo trese bo ofrenda na altar, i einan bo kòrda ku bo ruman tin algu kontra bo, laga bo ofrenda einan, dilanti di altar, i bai. Hasi pas ku bo ruman promé, i despues, ora bo bini bèk, duna bo ofrenda.”—Mat. 5:23, 24.

18, 19. Dikon kristiannan tin goso aunke nan ta ser persiguí?

¹⁸ “Felis boso ta ora hende ta insultá boso i ta persiguí boso i ta saka tur sorto di mentira malisioso kontra boso pa mi motibu.” Kiko Hesus tabata ke men? E mes a kontestá: “Sea kontentu i bula di alegria, ya ku boso rekompensa den shelu ta grandi, pasobra ta asina nan a persiguí e profetanan promé ku boso.” (Mat. 5:11, 12) Ora ku nan a duna e apòstelnan un halá di sota i a taha nan di prediká, “e apòstelnan a sali bai masha kontentu for di dilanti di e Sanedrin.” Klaru ku nan no a gusta e doló di sota ku nan a haña, pero nan tabata kontentu sí, “pasobra Dios a konsiderá nan digno di ser desonrá pa kousa di Hesus su nòmber.”—Echo. 5:41.

¹⁹ Den nos tempu, e pueblo di Yehova tambe ta perseverá ku goso ora nan ta sufri pa kousa di Hesus su nòmber òf ora nan ta enfrentá pruebanan difísil. (Lesa Santiago 1:2-4.) Meskos ku e apòstelnan, nos tampoko no gusta sufri. Pero si nos keda fiel durante prueba, Yehova lo yuda nos perseverá ku kurashi. Por ehèmpel, na ougùstùs 1944, outoridatnan a manda Henryk Dornik i su ruman hòmber na un kampo di konsentrashon. Pero nan persiguidónan a bisa: “Ta imposibel pa konvensé nan pa nan hasi algu. Nan ta disfrutá di nan martirio.” Ma Ruman Dornik a splika: “Ami no tabata kier ta un mártir, pero ora mi kòrda ku mi sufrimentu, tur e maltrato ku mi tabata soportá ku kurashi i dignidat, ta pasobra mi ke tabata leal na Yehova, mi tabata haña gran goso.” El a agregá: “Orashon ferviente ta loke a sostené mi, pasobra esei a laga mi sinti mas serka di Yehova. I é tabata e yudansa ku mi tabatin mester!”

20. Dikon nos ta kontentu pa sirbi “e Dios felis”?

²⁰ Ora nos tin e aprobashon di “e Dios felis,” nos por ta felis aunke nos ta ser persiguí òf nos famia ta oponé nos òf nos ta bira malu òf ta bira bieu. (1 Tim. 1:11) Tambe nos ta sinti nos felis pasobra nos Dios, “kende no por gaña,” lo kumpli ku tur su promesanan maravioso. (Tito 1:2) Ora Yehova hasi esei, e bendishonnan lo ta asina ekstraordinario ku nos lo ni kòrda mas riba e problemanan ku nos tin awe. De echo, nos no por ni imaginá tur e kosnan ku Yehova lo duna nos den Paradeis. Esta felis nos lo ta! Sin duda, nos lo disfrutá sinfin di “pas abundante.”—Sal. 37:11.