1. E reskate ta hasi posibel ku nos por haña ki bendishonnan?

E SAKRIFISIO di reskate di Hesukristu ta trese hopi bendishon. E reskate ta duna tur e yunan di Adam ku ta stima hustisia e oportunidat di forma parti di e famia di Dios. E reskate ta duna nos e oportunidat tambe pa biba felis pa semper. Pero Kristu su sakrifisio di reskate ta hasi mas ku trese un futuro maravioso pa hende obediente. E echo ku Hesus tabata dispuesto pa muri i defendé e hustisia di Yehova ta resolvé kuestionnan di importansia universal.—Heb. 1:8, 9.

2. (a) Ki kuestionnan di importansia universal nos ta haña den Hesus su orashon? (Wak e promé plachi.) (b) Kiko nos lo trata den e artíkulo akí?

² Mas o ménos dos aña promé ku Hesus a muri i perkurá e sakrifisio di reskate, el a siña su disipelnan pa pidi: “Nos Tata ku ta den shelu, bo nòmber sea santifiká. Laga bo Reino  bini. Laga bo boluntat sosodé, meskos ku den shelu, tambe riba tera.” (Mat. 6:9, 10) Pa nos haña mas apresio pa e reskate, ban wak ki relashon e tin ku e santifikashon di e nòmber di Dios, e gobernashon di e Reino di Dios i e kumplimentu di Dios su propósito.

3. Kiko e nòmber di Yehova ta representá, i kon Satanas a mancha e nòmber sagrado ei?

³ E promé kos ku Hesus a pidi p’e den e Orashon di Nos Tata tabata pa Dios su nòmber ser santifiká. Yehova su nòmber ta representá tur Su ekselensia, mahestat i santidat. Den un otro orashon, Hesus a yama Yehova “Tata Santu.” (Huan 17:11) Ya ku Yehova ta santu, tur su prinsipio- i leinan tambe ta santu. Apesar di esaki, den e Hòfi di Edén, ku astusia Satanas a kuestioná Dios su derecho di establesé norma pa hende. Satanas a gaña tokante Yehova i asina el a mancha Dios su nòmber.—Gén. 3:1-5.

4. Kon Hesus a yuda santifiká e nòmber di Dios?

⁴ Di otro banda, Hesus sí a stima e nòmber di Yehova. (Huan 17:25, 26) De echo, el a yuda santifiká e nòmber divino akí. (Lesa Salmo 40:8-10.) Debí ku el a mantené su integridat perfektamente tempu e tabata riba tera, el a duna prueba ku ta hustu i rasonabel pa Yehova establesé norma pa su kriaturanan inteligente. Hesus a keda kompletamente leal na su Tata den shelu asta ora Satanas a pone Hesus muri un morto agonisante. Asina el a demostrá ku un hende perfekto por keda kompletamente obediente na e normanan hustu di Dios.

5. Kon nos por yuda santifiká e nòmber di Dios?

⁵ Kon nos por mustra ku nos ta stima e nòmber di Yehova? Mediante nos kondukta. Yehova ke pa nos ta santu. (Lesa 1 Pedro 1:15, 16.) Esaki ta nifiká ku ta é so nos ta adorá i ku nos ta obedes’é ku henter nos kurason. Asta ora nos ta ser persiguí, nos ta hasi nos bèst pa biba di akuerdo ku su prinsipio- i leinan hustu. Ora nos hasi bon obra, nos ta laga nos lus bria, i asina nos ta trese gloria pa Yehova su nòmber. (Mat. 5:14-16) Komo un pueblo santu, na e manera ku nos ta hiba nos bida nos ta duna prueba ku Yehova su leinan ta bon i ku Satanas su akusashonnan ta falsu. Ora nos faya, nos ta arepentí di kurason i ta stòp di hasi e kosnan ku ta desonrá Dios.—Sal. 79:9.

6. Kon bini Yehova por konsiderá nos hustu, maske nos ta imperfekto?

⁶ A base di e sakrifisio di Kristu, Yehova ta pordoná piká di hende ku ta pone fe den e reskate. E ta aseptá hende ku a dediká nan bida na dje komo su sirbidónan. Yehova ta deklará kristiannan ungí hustu komo su yunan, i e ‘otro karnénan’ e ta deklará hustu komo su amigunan. (Huan 10:16; Rom. 5:1, 2; Sant. 2:21-25) Pues for di aworakí e reskate ta permití nos tin un posishon hustu dilanti di nos Tata i yuda santifiká su nòmber.

7. Ki bendishonnan bou di gobernashon di e Reino e reskate ta hasi posibel?

⁷ E siguiente petishon den Hesus su orashon tabata: “Laga bo Reino bini.” Ki konekshon tin entre e reskate i e Reino di Dios? E reskate ta hasi posibel ku  144.000 hende skohí por sirbi komo rei i saserdote ku Kristu den shelu. (Rev. 5:9, 10; 14:1) Durante un periodo di mil aña, Hesus i su ko-gobernantenan, kendenan ta forma e Reino di Dios, lo repartí e benefisionan di e reskate na hende obediente. E tera lo bira un paradeis i tur hende fiel lo bira perfekto. Komo resultado, e parti selestial i terenal di e famia di Dios lo ta kompletamente uní. (Rev. 5:13; 20:6) Hesus lo machiká kabes di e kolebra i eliminá tur rastro di e rebelion di Satanas for di universo.—Gén. 3:15.

8. (a) Kon Hesus a yuda su disipelnan mira e importansia di e Reino di Dios? (b) Awe, kon nos ta mustra ku nos ta apoyá e Reino?

⁸ Tempu Hesus tabata riba tera, el a yuda su disipelnan mira e importansia di e Reino di Dios. Asina ku el a kaba di batisá, el a kuminsá proklamá “e bon notisia di e Reino di Dios” unda ku el a bai. (Luk. 4:43) Den su último palabranan na su disipelnan promé ku el a bai shelu bèk, el a instruí nan pa ta su testigunan “te na e parti mas leu di tera.” (Echo. 1:6-8) Mediante e trabou di prediká e Reino, hende rònt mundu ta haña e chèns di siña tokante e reskate i bira súpdito di e Reino di Dios. Awe, nos ta mustra ku nos ta apoyá e Reino ora nos ta yuda e rumannan di Kristu riba tera den e trabou di prediká e bon notisia di e Reino rònt mundu.—Mat. 24:14; 25:40.

9. Dikon nos por tin sigur ku Yehova lo kumpli ku su propósito pa humanidat?

⁹ Kiko Hesus tabata ke men ora el a bisa: “Laga bo boluntat sosodé”? Yehova ta e Kreador. Ora e bisa ku algu lo sosodé, esaki lo tuma lugá sin faya. (Isa. 55:11) Lo e no permití e rebelion di Satanas stroba Su propósito pa humanidat. For di prinsipio tabata Yehova su boluntat pa tera ta yená ku yunan perfekto di Adam ku Eva. (Gén. 1:28) Si Adam ku Eva a muri sin haña yu, Dios su propósito pa yena tera ku nan yunan lo no a kumpli. Pues, despues ku Adam ku Eva a peka, Yehova a laga nan haña yu. Mediante e reskate, Dios ta duna tur hende ku pone fe den dje e chèns di bira perfekto i biba pa semper. Yehova ta stima hende i ta su boluntat pa hende obediente biba manera semper e tabata ke.

10. Kon e reskate ta benefisiá hende ku a muri?

¹⁰ Awor, kiko di e míles di miónes di hendenan ku a muri sin haña e oportunidat di konosé Yehova i sirbié? E reskate ta hasi posibel pa e mortonan haña resurekshon. Nos Tata den shelu, motivá pa su amor, lo lanta nan i duna nan e oportunidat di siña di su propósito i haña bida eterno. (Echo. 24:15) Yehova ke pa hende biba i no muri. Komo e Fuente di bida, e ta bira e Tata di tur hende ku e resusitá. (Sal. 36:9) Pues ta na su lugá anto ku Hesus a siña nos pa bisa den orashon: “Nos Tata ku ta den shelu.” (Mat. 6:9) Yehova a duna Hesus un ròl importante den resurekshon di e mortonan. (Huan 6:40, 44) Den Paradeis, Hesus lo kumpli ku su ròl di “e resurekshon i e bida.”—Huan 11:25.

11. Kiko ta Dios su boluntat pa e “multitut grandi”?

¹¹ Yehova su generosidat no ta limitá na un grupito di hende privilegiá so, pasobra Hesus a bisa: “Esun ku ta hasi e boluntat di Dios ta mi ruman hòmber, mi ruman muhé i mi mama.” (Mar.  3:35) Ta Dios su boluntat pa un “multitut grandi” i inkontabel di tur nashon, tribu i idioma bira su sirbidónan. Hende ku pone fe den e reskate di Kristu i hasi e boluntat di Dios por ta entre esnan ku ta grita: “Nos debe nos salbashon na Dios, kende ta sintá riba e trono, i na e Lamchi!”—Rev. 7:9, 10.

12. Den Hesus su orashon, kiko el a bisa di Yehova su propósito pa humanidat obediente?

¹² Nos a siña hopi di Yehova su propósito pa humanidat obediente den e petishonnan ku Hesus a hasi den e Orashon di Nos Tata. Na armonia ku e orashon akí, nos ke hasi nos bèst pa santifiká, òf trata komo santu, e nòmber di Yehova. (Isa. 8:13) Hesus su nòmber mes ta nifiká “Yehova ta Salbashon,” i nos salbashon mediante e reskate ta trese onor i gloria pa e nòmber di Yehova. E Reino di Dios ta e medio via kua humanidat obediente lo haña e benefisionan di e reskate. Sí, e orashon modelo ta garantisá nos ku nada no por stroba e boluntat di Dios kumpli.—Sal. 135:6; Isa. 46:9, 10.

13. Kiko nos ta mustra mediante nos boutismo?

¹³ Un manera importante ku nos ta mustra gratitut pa e reskate ta ora nos dediká nos bida na Yehova a base di nos fe den e reskate i batisá. Nos boutismo ta mustra ku “nos ta pertenesé na Yehova.” (Rom. 14:8) E ta representá nos petishon na Dios pa un konsenshi limpi. (1 Ped. 3:21) Yehova ta kontestá nos hasiendo nos limpi mediante e sanger di e sakrifisio di Kristu. Nos tin pleno konfiansa ku lo e duna nos tur loke el a primintí.—Rom. 8:32.

14. Dikon Dios a manda nos stima nos próhimo?

 ¹⁴ Den ki otro manera nos por mustra nos gratitut pa e reskate? Komo ku tur loke Yehova hasi ta motivá pa su amor, e ke pa su sirbidónan tambe desplegá amor komo nan kualidat prinsipal. (1 Huan 4:8-11) Ora nos mustra amor pa próhimo, nos ta demostrá ku nos ke ta “yu di [nos] Tata ku ta den shelu.” (Mat. 5:43-48) E mandamentu pa stima nos próhimo ta e di dos mandamentu, despues di esun pa stima Yehova. (Mat. 22:37-40) Un manera importante ku nos ta demostrá amor pa próhimo ta ora nos ta obedesé e mandamentu pa prediká e bon notisia di e Reino di Dios. Ora nos ta mustra amor pa próhimo, nos ta reflehá e gloria di Dios. De echo, amor pa Dios “ta keda demostrá na un manera perfekto den nos” ora nos obedesé e mandamentu pa stima otro hende, spesialmente nos rumannan.—1 Huan 4:12, 20.

15. (a) Ki bendishonnan nos ta risibí aworakí for di Yehova? (b) Ki bendishonnan nos lo haña den futuro?

¹⁵ Ora nos pone fe den e reskate, nos ta haña pordon pa tur nos pikánan. E Palabra di Dios ta sigurá nos ku Yehova lo “pordoná [nos] pikánan.” (Lesa Echonan 3:19-21.) Manera nos a mira mas promé, a base di e reskate, Yehova ta adoptá su sirbidónan ungí ku spiritu komo su yunan. (Rom. 8:15-17) Pa loke ta nos ku ta parti di e ‘otro karnénan,’ ta komo si fuera Yehova a yena un formulario di adopshon ku nos nòmber ariba. Despues ku nos bira perfekto i pasa e prueba final, Yehova lo ta kontentu pa firma e formulario, na moda di papia, i adoptá nos komo su yunan terenal stimá. (Rom. 8:20, 21; Rev. 20:7-9) E amor ku Yehova tin pa su yunan presioso ta eterno. E benefisionan di e reskate lo dura pa semper. (Heb. 9:12) Hamas e regalo akí lo pèrdè su balor. Niun hende ni poder por kit’é for di nos.

16. Kon e reskate ta duna nos berdadero libertat?

¹⁶ No tin nada ku e Diabel por hasi pa stroba hende ku arepentí di kurason pa un dia bira parti di Yehova su famia. Hesus a bini na tera i muri “ún biaha i pa semper.” Pues e reskate a ser pagá na un manera permanente. (Heb. 9:24-26) E ta kita kompletamente e kondenashon ku nos a heredá for di Adam. Danki na e sakrifisio di Kristu, nos ta liber di sklabitut na e mundu akí ku ta bou di e kontrol di Satanas, i nos no ta biba mas ku miedu di morto.—Heb. 2:14, 15.

17. Kiko Yehova su amor ta nifiká pa bo?

¹⁷ E promesanan di Dios ta kompletamente konfiabel. Meskos ku su leinan di kreashon nunka no ta faya, asina tambe Yehova nunka lo faya ku nos. E no ta kambia. (Mal. 3:6) Yehova ta duna nos muchu mas ku e regalo di bida. E ta duna nos su amor. Beibel ta bisa: “Nos a siña konosé e amor ku Dios tin pa nos i ta kere den esaki. Dios ta amor.” (1 Huan 4:16) Dios lo transformá henter e tera den un paradeis plasentero, i tur hende riba tera lo imitá e amor di Dios. Laga nos uni ku Dios su fiel kriaturanan den shelu i bisa: “Alabansa, gloria, sabiduria, gradisimentu, onor, poder i forsa ta pertenesé na nos Dios pa tur eternidat. Amèn.”—Rev. 7:12.