Dia 24 di februari 2022, zonido fuerte a lanta mi for di soño. Na prome instante, m’a pensa cu ta lamper, pasobra awa tabata yobe. Pero despues m’a ripara cu mi tabata tende zonido di bom.

E ora ey, mi tabata sa cu mi mester a bandona mi cas. Mi tabata biba den centro di Mariupol. Su siguiente dia, mi a bay keda na cas di mi wela Iryna. E ta biba un tiki pafo di stad. Poco despues, mi mama tambe a bin cerca nos. Pues, tabata ami, mi mama, mi wela y mi primo. Tabata mas safe na cas di mi wela. Toch, nos mester a keda drumi den bodega.

Un biaha, un bom a cay den cura di mi wela. Nos tabata scondi den bodega. E explosion a zona masha duro mes. Mi tabata haci hopi oracion na Jehova. Despues di un siman, nos a bin realisa cu no tabata safe mas pa keda na cas di mi wela. Pues, nos a dicidi di bay bek na centro di stad pa busca un manera pa evacua. Mi a roga Jehova pa nada no pasa nos y pa e yuda nos haya un manera pa evacua e stad.

Mainta, dia 4 di maart, niun trein no tabata sali di Mariupol pasobra e stad tabata rondona di soldaat. Pesey, nos a dicidi di tuma refugio den teater di e stad. Nos a keda dies dia eynan, y tabatin centenares di otro hende eynan. Tabatin asina tanto hende cu nos mester a drumi riba vloer. E situacion higienico na e teater tabata masha malo mes. Tabata masha dificil pa haya cuminda of awa cayente; nos tabata para den rey pa hopi ora.

Un dia, un bom a explota cerca di e teater. E explosion tabata asina duro cu el a kibra hopi di e bentananan di e teater. Esey a pone cu aire friu a drenta paden; tabata haci hopi friu mes.

Loke a yuda mi hopi durante e tempo dificil ey tabata e relato tocante Job. Ora mi tabata mira hende drenta panico despues di zonido di explosion, mi tabata lesa e relato tocante Job den mi Bijbel. E relato tabata yuda mi sinti mas trankil. Tabata comosifuera Job tabata hunto cu mi den e teater, y mi tabata bis’e: “Awor si mi ta compronde kico bo a pasa aden.” Mi tabata pensa: Job a perde tur cos. El a perde su famia, su pertenencianan, y el a bira malo. Mi tambe a perde cos material. Pero ainda mi tabatin mi famia, y nos tabata na bida y bon di salud. Pues, m’a realisa cu mi situacion no tabata mes malo cu e situacion di Job. Esey a yuda mi sinti mihor.

Riba 14 di maart, nos a tende cu un grupo a logra evacua e stad. Pues, nos a dicidi di bay tambe. Nos a logra haya transporte hunto cu algun otro persona cu tabata na e teater.

Un total di 20 vehiculo a sali for di e stad. Nos tabata 14 persona den un van chikito. Nos tabata sinta basta preta. Durante henter nos biahe, bom tabata explota tur rond di nos. Mi tabata haci oracion sin stop. Ora nos a logra sali for di Mariupol, e conductor di nos van a stop e van, sali pafo y cuminsa yora. E tabata asina emociona, pasobra el a logra evita tur e minanan riba caminda. Despues, nos a tende cu dos dia despues cu nos a evacua e stad, e teater a ser bombardia. Por lo menos, 300 hende a muri.

Despues di 13 ora, nos a yega e stad Zaporizhia. Su manece, nos a subi un trein cu a hiba nos Lviv. Riba e trein, tabatin 16 hende den un seccion di e trein caminda normalmente 4 hende ta sinta. Tabata haci hopi calor. Durante casi henter e biahe, mi a para den un gang di e trein. Ta eynan so mi por a haya aire fresco. Dia 16 di maart, nos a yega Lviv. Eynan, nos rumannan a duna nos un caluroso bonbini. Nos a keda den un Salon di Reino pa cuater dia. E rumannan a cuida nos a asina bon cu mi a cuminsa yora. Esaki tabata un regalo di Jehova.

Dia 19 di maart, nos a dicidi di bandona Ucrania. Nos a bay Polonia. Eynan tambe, nos rumannan a bin duna nos un bonbini. Nan a duna nos tur loke nos tabatin mester. Nos por a sinti nan amor pa nos.

Mi tin solamente 19 aña di edad. Pero ya caba mi a siña un les importante for di tur loke nos a pasa aden: Ta hopi importante pa nos fortalece nos fe ora cos ta bay bon. Fe ta yuda bo sobrevivi. Si mi no tabata haci estudio personal prome cu e guera, cos lo tabata hopi mas duro pa mi.

Jehova ta un Tata amoroso. Den tur loke nos a pasa aden, mi a sinti comosifuera e tabatin mi man drechi teni. E tabata guia mi den tur cos. Mi no por caba di gradici Jehova pa tur loke el a haci pa mi.—Isaias 41:10.