Aña 2023 a marca 75 aña desde cu testigonan di Jehova a cuminsa cu traduccion na Papiamento. Papiamento ta un idioma Creol cu ta deriva principalmente for di e idiomanan Hulandes, Portugues y Spaño. Actualmente, mas o menos 350.000 hende cu ta biba na e islanan conoci como ABC, esta, Aruba, Boneiro y Curaçao (Corsou) ta papia Papiamento.

E trabou di predica na e islanan ey a cuminsa na final di e añanan 1920. Pa tempo cu e misioneronan di Scol di Galaad a yega Corsou na aña 1946, ya tabatin diferente congregacion riba e isla. Sinembargo, no tabatin publicacion ainda na Papiamento. E rumannan tabata tene reunion di congregacion na Ingles y Papiamento, y nan tabata uza e publicacionnan na Hulandes, Ingles y Spaño. Aunke e rumannan tabata sa cu tabatin mester di publicacion biblico na Papiamento, tabatin diferente reto pa logra esey. Por ehempel, no tabatin diccionario na Papiamento y no tabatin regla estableci tocante con pa skirbi Papiamento. Ruman Bill Yeatts tabata un di e prome misioneronan cu a ser asigna na e islanan, y el a yuda cu e trabou di traduccion. Manera a ser menciona den Anuario de los testigos de Jehová 2002, ruman Yeatts a bisa: “Pa por a traduci nos publicacionnan, nos mester a bisa y skirbi cos cu nunca prome a ser bisa of skirbi na Papiamento. Tabata dificil pa bin cu regla di gramatica y expresion nobo.” A pesar di e dificultadnan ey, e rumannan a sigui cu e trabou di traduccion.

E prome publicacion cu a ser traduci na Papiamento tabata e foyeto E Alegria di Toer Hende, cu a ser completa na aña 1948. Cu tempo, mas publicacion a ser traduci, entre otro, e revistanan Toren di Vigilancia y Spierta! Na e momentonan aki, Traduccion di Mundo Nobo na Papiamento ta birando disponibel gradualmente. E prome buki di Bijbel di Scritura Hebreo cu a ser traduci tabata Ruth. Ruth a bira disponibel dia 1 di october 2021.

E esfuersonan cu a ser haci den e trabou di traduccion a duna bon resultado, ya cu e cantidad di publicador riba e islanan ta sigui aumenta. Na aña 1956, ora cu e prome congregacion na Papiamento a ser forma, tabatin 16 publicador. Awe, tin mas cu 1.600 publicador den 25 congregacion na Papiamento. Durante aña 2023, mas cu 1.200 estudio di Bijbel a ser dirigi.

Nos ta sigur cu Jehova lo sigui bendiciona e esfuersonan di tur e rumannan di habla Papiamento, mientras cu nan ta sigui laga nan luz briya y asina duna gloria na Jehova.—Mateo 5:16.