‘Sea fuerte y tene hopi curashi; Jehova bo Dios ta cu bo.’​—JOS. 1:7-9.

1, 2. (a) Kico ta necesario tin biaha pa haci loke ta corecto? (b) Kico nos lo analisa den e articulo aki?

UN PERSONA cu curashi no ta timido ni cobarde; e no ta un persona cu miedo. Por lo general, ora nos pensa riba un hende asina, nos ta imagina un hende fuerte y balente. Pero, tin biaha, demostra curashi ta encera djis sigui haci loke ta corecto den bida.

² Bijbel ta papia di diferente hende cu a demostra curashi. Algun a demostra curashi den situacionnan masha dificil y otronan den situacionnan cu tur sirbidor di Jehova sa haya nan aden. Kico nos por siña for di nan ehempel? Con nos tambe por demostra curashi?

TESTIGONAN CU CURASHI DEN UN MUNDO MALBADO

3. Kico Enok a profetisa tocante e malbadonan?

³ Enok, “e di shete den e liña di descendencia di Adam”, tabatin mester di curashi pa duna testimonio tocante Jehova na hende malbado cu a biba prome cu e Diluvio. Si, cu curashi el a proclama e siguiente mensahe profetico: “Wak! Jehova a bini cu su multitud di angel santo, pa ehecuta huicio contra tur, y pa declara tur e malbadonan culpabel pa motibo di tur nan echonan malbado cu nan a comete y pa motibo di tur e cosnan ofensivo cu pecadornan malbado a papia contra dje.” (Judas 14, 15) E echo cu Enok a uza e expresion “Jehova a bini” ta mustra cu e tabata sigur cu e profecia aki lo a cumpli. Y en berdad, e malbadonan a muri den e Diluvio cu a asota henter mundo.

4. A pesar di ki situacion Noe ‘a cana cu Dios’?

⁴ E Diluvio a sosode na aña 2370 prome cu nos  era, un 650 y pico aña despues cu Enok a muri. Prome cu esey, Noe a nace, forma un famia y e cu su yiunan a construi e arca. Angelnan malbado a tuma curpa di hende, tene relacion cu hende muher bunita y engendra yiunan gigante, of Nefilim. Tera a yena cu violencia pasobra mayoria di hende tabata malbado. (Gen. 6:1-5, 9, 11) A pesar di esey, ‘Noe a cana cu e Dios berdadero’ y a duna testimonio cu curashi como “un predicador di husticia.” (Lesa 2 Pedro 2:4 y 5.) Nos tambe mester di curashi den e ultimo dianan aki.

NAN TABATIN FE Y CURASHI

5. Con Moises a demostra fe y curashi?

⁵ Moises tabata un bon ehempel den demostra fe y curashi. (Heb. 11:24-27) Desde aña 1513 te 1473 prome cu nos era, Dios a uza Moises: E mester a saca e Israelitanan for di Egipto y guia nan den desierto. Y maske Moises a sinti cu e no tabata capaz pa cumpli cu e asignacion ey, el a acept’e. (Exo. 6:12) Bes tras bes, e cu su ruman homber Aaron a presenta dilanti di Farao di Egipto, kende tabata un tirano. Cu curashi nan a anuncia e Dies Plaga cu Jehova a uza pa humilia e diosnan Egipcio y libra Su pueblo. (Exo., cap. 7-12) Moises por a demostra fe y curashi pasobra Dios a sosten’e completamente, mescos cu e ta sostene nos tambe.​—Deu. 33:27.

6. Kico lo por yuda nos duna testimonio cu curashi si autoridadnan interoga nos?

⁶ Nos tambe mester tin curashi mescos cu Moises, pasobra Hesus a bisa: “Nan lo hiba boso asta dilanti di gobernador y rey pa mi motibo; e ora ey boso lo por duna nan y e nacionnan testimonio di mi. Sinembargo, ora nan entrega boso, no bira ansha tocante con pa papia of kico pa bisa, pasobra e momento ey boso lo haya sa kico pa bisa, pasobra no ta boso ta papia, ma ta e spirito di boso Tata ta papia pa medio di boso.” (Mat. 10:18-20) Pues, si autoridadnan interoga nos, Jehova su spirito lo duna nos fe y curashi pa defende nos creencianan na un manera respetuoso.​—Lesa Lucas 12:11 y 12.

7. Con bin Josue tabatin curashi, y dicon e tabata exitoso?

⁷ Josue, sucesor di Moises, tabatin curashi y un fe fuerte pasobra el a studia Dios su Ley regularmente. Na aña 1473 prome cu nos era, ora Israel tabata cla pa drenta e Tera Priminti, Dios a bisa Josue: “Sea fuerte y tene hopi curashi.” Anto Dios a bisa Josue cu ta solamente si e cumpli cu e Ley, lo el a tuma decisionnan sabi y logra exito. Caba Dios a bis’e: “No tembla ni desmaya, pasobra [Jehova] bo Dios ta cu bo unda cu bo bay.” (Jos. 1:7-9) E palabranan ey lo mester a fortalece Josue! Anto sin duda Dios tabata cu ne, pasobra na aña 1467 prome cu nos era​—seis aña so despues cu nan a drenta e Tera Priminti​—nan a conkista e tera aki.

 HENDE MUHERNAN CU A PARA FIRME

8. Dicon Rahab ta un bon ehempel di fe y curashi?

⁸ A traves di siglonan, hopi hende muher cu curashi a para firme como adorado di Jehova. Por ehempel, e prostituta Rahab di Jerico a confia den Dios. Cu curashi el a sconde e dos spionnan cu Josue a manda y a despista e compinchinan di e rey di Jerico. Rahab y su famia a scapa ora e Israelitanan a conkista Jerico. Rahab a laga su bida di prostituta, a cuminsa adora Jehova fielmente y asta a bira antepasado di e Mesias. (Jos. 2:1-6; 6:22, 23; Mat. 1:1, 5) Asina el a ser bendiciona ricamente pa su fe y curashi.

9. Con Debora, Barak y Jael a demostra curashi?

⁹ Despues cu Josue a muri alrededor di aña 1450 prome cu nos era, Dios a apunta hende como hues den Israel. Ora e Rey Cananeo Jabin tabatin 20 aña ta oprimi e Israelitanan, Dios a laga profetisa Debora encurasha Hues Barak pa tuma accion. Barak a reuni 10.000 homber riba Sero Tabor y tabata cla pa enfrenta Sisara, hefe militar di Jabin, kende a drenta Vaye di Kison cu su ehercito y 900 garoshi di guera. Ora e Israelitanan tabata bahando pa drenta e vaye, Dios a causa un inundacion repentino cu a pone cu e campo di bataya a bira lodo, y e garoshinan Cananeo a keda pega. E hombernan di Barak a triunfa y “henter e ehercito di Sisara a muri pa medio di filo di spada.” Sisara mes a huy y a sconde den tent di Jael. Despues, mientras e tabata na soño, Jael a mat’e. Si, “e honor” pa e victoria aki a bay pa e muher Jael, precies manera Debora a profetisa. Debi cu Debora, Barak y Jael a demostra curashi, Israel “tabatin sosiego pa cuarenta aña.” (Hues. 4:1-9, 14-22; 5:20, 21, 31) A traves di historia tabatin hopi homber y muher devoto mas cu a demostra fe y curashi.

NOS PALABRANAN POR ENCURASHA OTRO HENDE

10. Dicon nos por bisa cu nos palabranan por encurasha otro hende?

¹⁰ Loke nos ta bisa por duna otro adorado di Jehova curashi. Den siglo 11 prome cu nos era, Rey David a bisa su yiu Salomon: “Sea fuerte, tene curashi y actua; no tene miedo ni desmaya, pasobra SEÑOR Dios, mi Dios, ta cu bo. E lo no faya bo, ni bandona bo te ora tur e trabou pa e sirbishi di e cas di SEÑOR keda cla.” (1 Cro. 28:20) Y en berdad, Salomon a demostra curashi y a construi un magnifico tempel pa Jehova den Jerusalem.

11. Ki efecto e palabranan di un mucha muher Israelita cu a demostra curashi tabatin riba un homber Sirio?

¹¹ Den siglo 10 prome cu nos era, e palabranan di un mucha muher Israelita, cu  a demostra curashi, a resulta di ta un bendicion pa un leproso. Ora cu e Sirionan a coge e mucha aki preso, y el a bira cria na cas di e capitan di ehercito Sirio, Naaman, kende tabatin lepra. Como cu e mucha muher aki tabata sa di e milagernan cu Dios a haci pa medio di profeta Eliseo, el a bisa e esposa di Naaman cu si su esposo bay Israel, e profeta di Dios lo por a cur’e. Ora Naaman a haci loke e mucha a bisa, el a cura milagrosamente y a bira un adorado di Jehova. (2 Rey. 5:1-3, 10-17) Si bo ta un hoben cu ta stima Dios mescos cu e mucha muher aki, Dios por duna bo curashi pa duna testimonio na maestro, compañero di scol y otro hende.

12. Ki efecto e palabranan di Rey Ezekias tabatin riba su pueblo?

¹² Asta ora un hende ta den peliger, palabranan bon scogi por dun’e curashi. Ora e Asirionan a marcha pa bay ataca Jerusalem den siglo 8 prome cu nos era, Rey Ezekias a bisa su pueblo: “Sea fuerte y tene curashi; no tene miedo ni desmaya pa motibo di rey di Asiria, ni pa motibo di henter e multitud cu ta hunto cu ne; pasobra Esun cu ta cu nos ta mas grandi cu esun cu ta cu ne. E tin solamente un brasa di carni cu ne, ma nos tin SEÑOR nos Dios hunto cu nos, pa yuda nos y pa bringa nos batayanan.” Con e pueblo a reacciona? Nan a haya mas curashi. Bijbel ta bisa cu nan “a confia den e palabranan di Ezekias.” (2 Cro. 32:7, 8) Palabranan di animacion, manera esnan di Ezekias, por duna nos y otro rumannan mas curashi pa enfrenta persecucion.

13. Con Abdias, e mayordomo di Rey Acab, a demostra curashi, y ki ehempel e ta pa nos?

¹³ Un otro manera pa demostra curashi ta di keda keto. Den siglo 10 prome cu nos era, Abdias, e mayordomo di Rey Acab, a demostra curashi pasobra el a sconde 100 profeta di Jehova, “cincuenta-cincuenta den un cueba”, pa e reina malbado Jezabel no laga mata nan. (1 Rey. 18:4) Awe tambe tin hopi sirbidor di Jehova cu ta demostra curashi mescos cu Abdias, kende a teme Jehova. Nan ta proteha nan rumannan y no ta revela informacion tocante nan na opositornan.

ESTER​—UN REINA CU CURASHI

14, 15. Con Reina Ester a demostra fe y curashi, y kico tabata e resultado?

¹⁴ Den siglo 5 prome cu nos era, Reina Ester a demostra gran fe y curashi ora cu e malbado Haman a plania pa extermina tur Hudiu den e imperio di Persia. Ora cu e Hudiunan a tende di e plan malbado aki, nan a lamenta, yuna y a haci oracion di henter nan curason. (Ester 4:1-3) Reina Ester tabata sumamente afligi. Su primo Mardokeo a mand’e un copia di e ley cu a autorisa e masacre y a bis’e bay cerca e rey y rog’e pa e mustra fabor na e Hudiunan. Pero Ester tabatin un otro problema: Ken cu a presenta dilanti di rey sin invitacion lo a ser mata.​—Ester 4:4-11.

¹⁵ No obstante, Mardokeo a bisa Ester: ‘Si bo keda keto, liberacion lo bini pa e Hudiunan for di un otro caminda. Ken sa cu no ta pa un tempo manera esaki bo a bira reina?’ Ester a urgi Mardokeo pa reuni e Hudiunan cu tin na Susa pa nan yuna p’e. Ademas, Ester a bisa: ‘Ami tambe lo yuna. Y despues lo mi bay cerca rey, locual no ta conforme e ley; y si mi perece, mi perece.’ (Ester 4:12-17) Ester realmente a demostra curashi, y e buki biblico cu ta carga su nomber ta confirma cu Dios a libra Su pueblo. Den nos tempo, cristiannan ungi y nan compañeronan den fe ta demostra un curashi similar ora nan ta bou di prueba, y Esun cu ta “scucha oracion” semper ta cla pa yuda nan.​—Lesa Salmo 65:2; 118:6.

 “TENE CURASHI”

16. Kico hobennan por siña for di Hesus?

¹⁶ Tempo cu Hesus tabatin 12 aña di edad, nan a hay’e den tempel, “sinta meymey di e maestronan, ta scucha nan y haci nan pregunta.” Anto “tur esnan cu tabata scuch’e tabata keda asombra di e contestanan cu e tabata duna y di cuanto cos e tabata compronde.” (Luc. 2:41-50) Aunke Hesus tabata jong, e fe y curashi cu e tabatin a motiv’e pa haci e maestronan di mas edad pregunta. Ta bon pa hobennan den e congregacion cristian imita Hesus y probecha di tur oportunidad pa duna splicacion ‘na ken cu kier sa motibo di e speransa cu nan tin.’​—1 Ped. 3:15.

17. Dicon Hesus a urgi su discipelnan pa “tene curashi”, y dicon nos tambe mester di curashi?

¹⁷ Hesus a urgi su discipelnan pa tene curashi. El a bisa nan: “Wak! Lo yega e ora, de echo, e ora a yega caba, cu cada un di boso lo core bay su cas y laga mi mi so; anto toch mi no ta mi so, pasobra e Tata ta cu mi. Mi a bisa boso e cosnan aki pa asina boso por tin paz pa medio di mi. Den mundo boso ta pasa tribulacion, ma tene curashi! Mi a vence mundo.” (Juan 16:32, 33) Mundo ta odia nos mescos cu el a odia e prome discipelnan di Hesus. No obstante, nos ta keda separa di mundo. Anto si nos reflexiona riba e curashi cu e Yiu di Dios a demostra, nos tambe lo tin curashi pa keda sin mancha di e mundo aki. Hesus a vence mundo, pues nos tambe por.​—Juan 17:16; Sant. 1:27.

18, 19. Con apostel Pablo a duna prueba cu e tabatin fe y curashi?

¹⁸ Apostel Pablo a soporta hopi persecucion. Na un ocasion, si no tabata pa e soldanan Romano, e Hudiunan den Jerusalem lo a mat’e. E anochi ey, “Señor a presenta na Pablo y a bis’e: ‘Tene curashi! Pasobra mescos cu bo a duna un testimonio cabal tocante mi na Jerusalem, asina tambe lo bo tin cu duna testimonio na Roma.’ ” (Echo. 23:11) Pablo a haci precies loke Hesus a bis’e.

¹⁹ Ademas, Pablo no tabatin miedo di reprende e “superapostelnan”, kendenan tabata trata di corumpi e congregacion na Corinto. (2 Cor. 11:5; 12:11) Contrario na nan, Pablo si por a duna prueba cu e tabata un berdadero apostel: Nan a ser’e den prizon, golpi’e, el a haci biahenan peligroso, hopi biaha e tabata den peliger, el a pasa hamber, sed y anochinan sin drumi, y e tabata preocupa tambe pa su rumannan. (Lesa 2 Corintionan 11:23-28.) Pablo su excelente ehempel di fe y curashi a duna prueba cu Dios a fortalec’e.

20, 21. (a) Relata un experencia cu ta mustra cu nos mester di curashi. (b) Den ki situacionnan nos mester demostra curashi, y di kico nos por ta sigur?

²⁰ No ta tur cristian lo haya nan cu persecucion severo. Sinembargo, nos tur mester di curashi pa trata cu situacionnan dificil den bida. Por ehempel, na Brazil tabatin un hoben cu tabata pertenece na un gang. Ora el a cuminsa studia Bijbel, e kier a haci cambio den su bida. Awor, normalmente nan tabata mata tur persona cu bandona e gang. E hoben a haci oracion y a uza textonan di Bijbel pa splica e lider dicon e no por a keda den e gang mas. Anto nan a lag’e bay sin hacie daño, y el a bira un publicador di Reino.

²¹ Si, nos mester di curashi pa predica e bon noticia. Hobennan cristian mester di curashi pa mantene nan integridad na scol. Esnan cu ta traha mester di curashi pa pidi liber pa asisti na tur e dianan di congreso. Y tin hopi motibo mas pakico nos mester di curashi. Pero sea cual sea e situacion cu nos ta aden, Jehova lo scucha nos ‘oracionnan haci cu fe.’ (Sant. 5:15) Y sin duda lo e duna nos su spirito santo pa asina nos por ta ‘fuerte y yen di curashi.’

[Preguntanan di Estudio]

[Plachi na pagina 19]

Enok a predica cu curashi den un mundo malbado

[Plachi na pagina 20]

Jael tabata un muher cu curashi