1. Dicon ora nos ta imita Hesus nos ta hala mas cerca di Jehova?

NORMALMENTE, ora nos ta admira un persona su personalidad y manera di actua, nos ta purba di imit’e. Di tur e hendenan cu a yega di biba riba e mundo aki, Hesucristo ta e mihor ehempel pa nos imita. Dicon? Pasobra e mes a yega di bisa: “Esun cu a mira mi, a mira e Tata tambe.” (Juan 14:9) Hesus a refleha e personalidad di su Tata perfectamente. Pesey, ora nos ta siña tocante Hesus, ta comosifuera nos ta siña tocante Jehova. Y segun cu nos ta imita Hesus, nos ta hala mas cerca Jehova, e Persona di mas importante di universo. Pues, ta bale la pena pa haci esfuerso pa imita e cualidadnan y manera di actua di su Yiu.

2, 3. (a) Dicon Jehova a duna nos un descripcion detaya di e bida di Hesus, y kico Jehova ta verwacht di nos? (b) Kico nos lo analisa den e articulo aki y esun siguiente?

² Pero con nos por sa ki sorto di persona Hesus ta? Wel, den e Scritura Griego Cristian Jehova a duna nos un descripcion detaya di e bida di Hesus. Dicon? Pasobra e kier pa nos conoce su Yiu pa asina nos por imit’e. (Lesa 1 Pedro 2:21.) Bijbel ta bisa cu  ora nos ta imita e ehempel di Hesus, ta comosifuera nos ta sigui “su pasonan.” Y esey ta loke Jehova kier pa nos haci, esta, imita Hesus den tur loke el a haci. Pero Hesus a laga un ehempel perfecto pa nos, y nos ta leu di ta perfecto. Pero Jehova no ta verwacht cu nos lo sigui e pasonan di Hesus perfectamente; loke e ta desea ta pa nos imita su Yiu lo mihor cu nos por.

³ Pues, laga nos analisa algun di e bunita cualidadnan di Hesus. Den e articulo aki, nos lo trata su humildad y ternura. Den e siguiente articulo, nos lo analisa su curashi y bon huicio. Nos lo contesta tres pregunta relaciona cu cada cualidad: Kico e ta encera? Con Hesus a demostr’e? Con nos por imit’e?

4. Con lo bo defini humildad?

⁴ Kico humildad ta encera? Den e mundo orguyoso aki, tin hende ta pensa cu humildad ta un señal di debilidad of di falta di confianza. Pero esey ta berdad? No. Pa un hende por ta humilde, e mester tin curashi y fortaleza. Humildad ta lo contrario di orguyo y arogancia, y e tin di haber cu e manera cu nos ta mira nos mes. Un diccionario di Bijbel ta bisa: “Humildad ta ora nos ta reconoce con insignificante nos realmente ta na comparacion cu Dios.” Si di berdad nos ta humilde, nos lo no pensa cu nos ta mas cu otro hende. (Rom. 12:3; Flp. 2:3) No ta facil pa hende imperfecto cultiva humildad. Pero nos por cultiv’e si nos medita riba nos posicion insignificante compara cu Jehova y si nos sigui den e pasonan di Hesus.

5, 6. (a) Ken ta Miguel e arcangel? (b) Con Miguel a demostra un actitud humilde?

⁵ Con Hesus a demostra humildad? E Yiu di Dios semper tabata humilde, tanto como un angel poderoso den cielo y como un homber perfecto riba Tera. Laga nos wak algun ehempel.

⁶ Su actitud. Den e buki biblico di Judas, nos ta haya un ehempel di humildad cu Hesus a demostra durante un suceso cu a tuma luga prome cu el a bin na Tera. (Lesa Judas 9.) Miguel—kende ta Hesus den su posicion di arcangel, of hefe di e angelnan—“tabatin un desacuerdo cu Diabel” y a “discuti” cu e malbado ey “tocante e curpa di Moises.” Bijbel ta bisa cu despues cu Moises a muri, Jehova a dera su curpa na un luga cu niun hende no por a haya. (Deu. 34:5, 6) Dicon Jehova a haci esey? Kisas Diabel tabata kier pa e Israelitanan adora e curpa di Moises. Sea cual sea e plan malicioso cu Diabel tabatin, Miguel a par’e cu curashi. Segun un enciclopedia, e palabranan Griego traduci como “tabatin un desacuerdo” y “[a] discuti” ta ser uza tambe pa describi “un disputa legal” y kisas ta indica cu “Miguel ‘a cuestiona Diabel su derecho’ di bay cu e curpa di Moises.” Sinembargo, Miguel, e hefe di e angelnan, tabata sa cu e no tabatin e autoridad di condena Diabel, ni maske si esaki a provoc’e. Pues, el a laga e caso den man di e Hues Supremo, Jehova. Esta un actitud humilde Hesus a demostra!

7. Con Hesus su manera di papia y di actua a demostra cu e ta humilde?

⁷ Durante Hesus su sirbishi riba Tera, el a demostra na su manera di papia y di actua cu e tabata un persona humilde. Su manera di papia. Hesus nunca a hala atencion na su mes. Na luga di esey, semper el a dirigi tur gloria na su Tata. (Mar. 10:17, 18; Juan 7:16) Nunca e no a papia cu su discipelnan na un manera cu a laga nan sinti cu nan ta bobo of inferior. Al contrario, el a papia cu nan cu respet y dignidad, a elogia  nan pa nan bon cualidadnan y a expresa confianza den nan. (Luc. 22:31, 32; Juan 1:47) Su manera di actua. Hesus a scoge pa hiba un bida simpel, sin hopi cos material. (Mat. 8:20) E tabata dispuesto pa haci tareanan humilde cu otronan no kier a haci. (Juan 13:3-15) Ademas, el a demostra humildad extraordinario mediante su obediencia. (Lesa Filipensenan 2:5-8.) Distinto for di personanan arogante cu no ta gusta obedece otro hende, Hesus a cumpli humildemente cu tur loke Jehova a mand’e haci, si, el “a bira obediente te na morto.” Ta bisto anto cu Hesus, e Yiu di hende, tabatin “un curason humilde.”—Mat. 11:29.

8, 9. Con nos por demostra humildad?

⁸ Con nos por imita Hesus su humildad? Nos actitud. Ora nos ta humilde, nos lo evita di haci cosnan cu nos no ta autorisa pa haci, y nos lo reconoce cu nos no tin derecho di husga otro hende. Nos lo no critica hende ni cuestiona nan motibonan. (Luc. 6:37; Sant. 4:12) Humildad ta yuda nos pa nos no ta “demasiado husto.” Esaki kiermen cu nos lo no menosprecia e rumannan cu tin menos habilidad of privilegio cu nos. (Ecl. 7:16) Ancianonan humilde no ta kere cu nan ta mihor cu nan rumannan. Al contrario, un wardador lo “considera ... otro hende superior” y lo comporta su mes como “esun di mas chikito.”—Flp. 2:3; Luc. 9:48.

⁹ Tuma por ehempel Walter Thorn, kende na aña 1894 a cuminsa sirbi como peregrino (loke nos ta yama awe superintendente di circuito). Despues di hopi aña den e trabou ey, nan a cambia su asignacion. E mester a bay atende e crio di galiña na e Hacienda di Reino den e estado di New York. Tin biaha Ruman Thorn tabata sinti cu eigenlijk e merece un trabou mas importante cu esey. Kico e tabata haci e ora ey? El a conta: “Ki ora cu mi cuminsa kere cu mi ta masha cos, mi ta bay den un huki cu mi mes, na moda di papia, y mi ta bisa mi mes: Abo pida stof. Ken bo ta kere cu bo ta?” (Lesa Isaias 40:12-15.) Esey ta un actitud humilde.

10. Con nos manera di papia y di actua por demostra cu nos ta humilde?

¹⁰ Nos manera di papia. Loke nos ta papia cu otro hende ta indica si nos ta humilde of no. (Luc. 6:45) Den nos combersacionnan, nos lo no hala atencion na nos propio logro- y privilegionan. (Prov. 27:2) Na luga di esey, nos lo concentra riba e cosnan bon cu nos rumannan ta haci y elogia nan pa nan bon cualidadnan, habilidadnan y logronan. (Prov. 15:23) Nos manera di actua. Cristiannan humilde no ta trata di bira famoso ni importante den e mundo aki. Nan ta prefera di hiba un bida simpel, y kisas hasta ta haci trabou cu mundo ta considera di categoria inferior, pasobra esey ta permiti nan sirbi Jehova mas tanto posibel. (1 Tim. 6:6, 8) Mas cu tur cos, nos ta demostra humildad ora nos ta obedecido. Un persona mester ta humilde pa e por acepta y sigui e guia cu ta bin for di e organisacion di Jehova y pa “obedece esnan cu ta dirigi” e congregacionnan local.—Heb. 13:17.

11. Splica kico ternura y compasion ta encera.

¹¹ Kico ternura ta encera? E palabra “tierno”, cu ta bin di “ternura”, ta describi emocionnan suave y cariñoso. Ternura ta un faceta di amor y ta similar na otro emocionnan suave manera compasion y misericordia. Bijbel ta papia di “tierno compasion”, “tierno misericordia”  y “tierno cariño.” (Luc. 1:78; 2 Cor. 1:3; Flp. 1:8) Segun un diccionario biblico, compasion ta encera mas cu djis sinti duele di hende den necesidad. Ora cu di berdad nos tin tierno sintimento, nos lo ta asina interesa den otro hende cu nos ta preocupa pa nan y lo kier haci algo pa cambia nan bida pa mas mihor. Ternura y compasion ta motiva un persona pa haci algo pa alivia e sufrimento di otro hende.

12. (a) Kico ta mustra cu Hesus tabatin tierno compasion pa otro hende? (b) Kico Hesus su compasion a motiv’e pa haci?

¹² Con Hesus a demostra ternura y compasion? Su sintimentonan y manera di actua. Hesus a sinti tierno compasion pa hende. Ora el a mira Maria y e hendenan hunto cu ne ta yora pasobra Lazaro a muri, e tambe a cuminsa yora. (Lesa Juan 11:32-35.) Compasion a motiva Hesus pa lanta e yiu homber di e viuda di Nain for di morto. Y e mesun cualidad ey a conmov’e pa resucita su amigo Lazaro. (Luc. 7:11-15; Juan 11:38-44) Cu e acto di ternura ey, Hesus kisas a duna Lazaro e oportunidad di haya bida den cielo. Na un ocasion anterior, Hesus a “sinti compasion” pa un grupo grandi di hende cu a bin cerca dje. Su tierno compasion a motiv’e pa “siña nan hopi cos.” (Mar. 6:34; BS) E bida di tur esnan cu a haci caso di su siñansa a drecha considerablemente. No tin duda cu Hesus su compasion tabata mas cu djis un sintimento. E cualidad ey a motiv’e pa tuma e iniciativa pa yuda hende den necesidad.—Mat. 15:32-38; 20:29-34; Mar. 1:40-42.

13. Con Hesus a papia cu hende? (Wak e prome plachi.)

¹³ Su manera di papia. Hesus su ternura a motiv’e pa papia na un manera amabel cu hende, specialmente cu esnan pober y maltrata. Apostel Mateo a cita e siguiente palabranan di Isaias y a aplica nan na Hesus: “Lo e no trapa riba ningun caña kibra, y lo e no paga ningun mecha cu ta huma.” (Mat. 12:20; Isa. 42:3) Kico esaki ta nifica? Hesus no a papia malo cu hende ni maltrata nan. Mas bien, su palabranan a anima hende cu tabata manera caña kibra of mecha di un lampi cu tabata casi paga. El a predica un mensahe di speransa “pa cura hende di curason kibra.” (Isa. 61:1) El a invita hende cu tabata “traha duro y cu ta carga” pa bin cerca dje pa asina e por a “refresca” nan. (Mat. 11:28-30) Ademas, el a sigura su discipelnan cu Dios ta masha interesa den cada un di Su sirbidornan, incluso den “e chikitonan”, esta, esnan cu for di e punto di bista di mundo kisas no tabata parce importante.—Mat. 18:12-14; Luc. 12:6, 7.

14. Con nos por cultiva ternura y compasion pa otro hende?

¹⁴ Con nos por imita Hesus su ternura y compasion? Nos sintimentonan. Kisas di naturaleza nos no tin e sintimentonan ey, pero Bijbel ta urgi nos pa cultiva nan. “Tierno compasion” ta parti di e personalidad nobo cu Jehova ta verwacht pa tur cristian bisti. (Lesa Colosensenan 3:9, 10, 12.) Con bo por cultiva ternura y compasion pa otro hende? Bijbel ta bisa: “Habri boso curason hancho.” (2 Cor. 6:11-13) Tambe bo por scucha cu atencion ora un hende ta conta bo con e ta sintie y kico ta preocup’e. (Sant. 1:19) Purba di imagina bo e situacion y puntra bo mes: Si ami ta den su sapato, con lo mi sinti? Kico lo mi tin mester?—1 Ped. 3:8.

15. Kico nos por haci pa yuda rumannan cu kisas ta manera un caña kibra of mecha cu ta casi paga?

¹⁵ Nos manera di actua. Ternura y compasion  ta motiva nos pa haci algo pa yuda otro hende, specialmente esnan cu ta sufri y cu ta sinti nan mes manera un caña kibra of un mecha cu ta cerca di paga. Con nos por yuda nan? Romanonan 12:15 ta bisa: “Yora cu esnan cu ta yora.” Hopi biaha, hende desanima tin mester di consuelo. Nan mester di un amigo of amiga cu ta compronde nan y scucha nan. Un Testigo cu a haya gran consuelo cerca e rumannan despues cu su yiu muher a muri a bisa: “Mi tabata gusta ora e rumannan bin mi cas y simplemente yora hunto cu mi.” Un otro manera cu nos por mustra tierno cariño ta di haci cosnan practico pa yuda e rumannan. Bo conoce un viuda cu mester di yudansa pa drecha algun cos na su cas? Of tin un ruman di edad cu mester di transport pa bay reunion, pa sali den sirbishi of pa bay dokter? Hasta un acto chikito di bondad por nifica hopi pa un ruman cu ta den necesidad. (1 Juan 3:17, 18) Mas cu tur cos, nos por demostra compasion pa otro hende ora nos ta participa plenamente den e trabou di predica e bon noticia. Esey ta e mihor cos cu nos por haci pa hende di curason honrado.

16. Kico nos por bisa pa anima rumannan cu ta deprimi?

¹⁶ Nos manera di papia. Nos tierno cariño pa otro hende ta motiva nos pa “papia palabranan di consuelo cu esnan cu ta deprimi.” (1 Tes. 5:14) Con nos por anima esnan deprimi? Nos por laga nan sa cu nos ta realmente interesa den nan. Nos por elogia nan y yuda nan mira nan bon cualidadnan y habilidadnan. Tambe nos por corda nan con valioso nan ta den bista di Jehova ya cu ta e a yuda nan haya e berdad. (Juan 6:44) Ademas, nos por sigura nan cu Jehova ta profundamente interesa den su sirbidornan cu tin un “curason kibra” of un “spirito abati.” (Sal. 34:18) Nos palabranan di cariño por alivia e dolor di rumannan cu tin mester di consuelo.—Prov. 16:24.

17, 18. (a) Con Jehova kier pa ancianonan trata su carnenan? (b) Kico nos lo analisa den e siguiente articulo?

¹⁷ Ancianonan, Jehova ta verwacht cu boso ta trata su carnenan cu ternura y compasion. (Echo. 20:28, 29) Corda cu el a duna boso e responsabilidad di alimenta, anima y refresca su carnenan. (Isa. 32:1, 2; 1 Ped. 5:2-4) Pues, un anciano cu tin tierno compasion lo no purba di domina e carnenan, es decir, e lo no traha regla pa nan ni pone presion riba nan pa haci mas di loke nan circunstancianan ta permiti. Mas bien, lo e percura pa e rumannan ta contento, teniendo e confianza cu nan amor pa Jehova lo motiva nan pa sirbie mas plenamente posibel.—Mat. 22:37.

¹⁸ Segun cu nos ta medita riba e humildad y ternura cu Hesus a demostra, nos lo sinti nos motiva pa sigui cana den su pasonan. Den e siguiente articulo, nos lo analisa dos aspecto mas di Hesus su bunita personalidad, esta, su curashi y bon huicio.