Pregunta di Lector

Ki responsabilidad e congregacion tin si un cristian cu ta stuur un auto haya su mes den un accidente cu ta resulta den morto di otro hende?

Mester investiga si e ruman tin culpa di sanger pasobra e congregacion tin cu evita di carga culpa di sanger como parti di e comunidad. (Deuteronomio 21:1-9; 22:8) Un chauffeur cu causa un accidente fatal por ser haya culpabel di sanger si el a comete un descuido of si deliberadamente el a viola un lei di siguridad of di trafico di Cesar. (Marco 12:14) Pero tin mas factor cu mester tene cuenta cu ne.

Un matado cu a hui bai na un di e stadnan di refugio di Israel mester a ser husga dilanti un tribunal. Si a sali na cla cu e no a mata intencionalmente, lo a permitie keda den e stad, proteha for di e vengado di sanger. (Numbernan 35:6-25) P’esei si un cristian causa morto di un hende den un accidente, e ancianonan mester investiga e asunto pa determina si tin un grado di culpa di sanger. No ta e punto di bista di gobierno ni un decision di corte ta determina ki accion e congregacion lo tuma.

Por ehempel, corte por declara e persona culpabel di un of otro violacion tecnico di regla di trafico, pero e ancianonan cu ta investiga e asunto kisas ta determina cu no tin culpa di sanger ya cu e chauffeur tabatin masha poco of ningun control riba e circunstancianan cu a resulta den e accidente fatal. Di otro banda, asta si corte para e caso, e ancianonan kisas ta conclui cu en realidad e persona ta culpabel di sanger.

E decision di e ancianonan cu ta investiga e caso mester ta basa riba e Scritura y echonan bon cla estableci; por ehempel, e chauffeur ta reconoce su falta y/of tin testimonio di dos of tres testigo confiabel. (Deuteronomio 17:6; Mateo 18:15, 16) Si a establece culpa di sanger, mester forma un comite hudicial. Si e comite ta determina cu e persona culpabel di sanger a arepenti, lo e ricibi reprendemento apropia for di e Scritura y lo perde privilegio den e congregacion. Lo e no sigui sirbi como anciano of sirbidor ministerial. Tambe lo impone otro restriccionnan. Ademas, e tin cu duna cuenta na Dios pa su descuido of negligencia cu a resulta den e accidente cu a causa morto.—Galationan 6:5, 7.

Por ehempel, si tabatin mal tempo na momento cu e accidente a tuma luga, e chauffeur mester a core cu mas cuidou. Si e tabatin soño, e mester a para y sosega te ora su soño a kita, of e mester a laga un otro hende stuur.

Supone cu e chauffeur tabata coriendo mucho duro. Si un cristian surpasa e velocidad maximo, e no ta dunando “Cesar loke ta di Cesar.” E ta mustra tambe un falta di respet pa e santidad di bida, pasobra e por causa un accidente cu consecuencia fatal. (Mateo 22:21) Y relaciona cu esaki tin un punto mas cu merece nos atencion. Ki sorto di ehempel un anciano ta pone pa e tou si e no ta tene cuenta cu reglanan di trafico di Cesar of ta desobedece nan deliberadamente?—1 Pedro 5:3.

Un cristian no mester exigi pa otronan yega na un cierto luga na un ora cu claramente nan lo no por alcansa sin surpasa e velocidad maximo. Di otro banda, den mayoria caso e punto ta pa sali mas tempran of plania cosnan di tal manera cu bo por core trankil. Si un cristian haci esei, lo e no sinti su mes tenta pa core mas duro cu ta permiti, pero mas bien lo e por cumpli cu e leinan di trafico di “e autoridadnan cu ta goberna.” (Romanonan 13:1, 5) Esaki lo yuda e chauffeur evita di comete accidentenan fatal cu e posibilidad di carga culpa di sanger. Esei lo permitie tambe pone un bon ehempel y mantene su consenshi limpi.—1 Pedro 3:16.