Hende Su Esfuerso pa Agrada Dios

“NUNCA a yega di existi un sosiedad humano den cua Dios no a hunga ningun papel; por lo general e ta esun cu ta crea y dirigi cosnan. Esei ta conta asta pa e sosiedadnan cu ta scohe concientemente pa no kere den Dios.” Asina John Bowker a skirbi den su buki God—A Brief History (Un Historia Cortico di Dios). Di un manera of otro, e esfuerso pa haya Dios y pa gana su aprobacion ta un caracteristica masha comun den comportacion humano. Rond mundo, hopi hende tin deseo sinsero pa agrada Dios. Solamente, e manera cu nan ta purba haci esaki ta varia di creencia pa creencia.

Algun hende ta pensa cu e unico cos cu bo tin cu haci pa gana e aprobacion di Dios ta di biba bon. Otronan ta haya cu pa logra esei nan tin cu haci obranan di caridad pa hende pober. Ademas, pa miyones di hende ceremonianan y ritonan religioso ta masha importante.

Di otro banda, tin hende ta kere cu nan no por hala serca Dios—cu e ta mucho leu of mucho ocupa cu otro asuntonan pa presta atencion na hende ordinario. Supuestamente e filosofo Epicuro di antiguo Grecia a bisa cu ‘e diosnan ta mucho leu; nan no por haci ni bon ni malo pa bo.’ Pero ta net e hendenan cu ta pensa asina tin inclinacion religioso. Algun di nan ta asta ofrece sacrificio y ta efectua ritonan cu e speransa di calma nan antepasadonan defunto.

Kico abo ta pensa? Dios realmente ta tuma nota di nos esfuersonan pa haya su aprobacion? Nos por tin efecto riba Dios su sintimentonan y agrad’e?

 [Reconocemento pa Potret na pagina 2]

COVER: Courtesy of ROE/Anglo-Australian Observatory, photograph by David Malin