Kico Ta Pasando cu Iglesianan?

“NA Gran Bretania ainda hende ta kere den Dios, pero nan no kier haci ningun compromiso cu Cristo”, segun Stephen Tirwomwe, pasto di Uganda. Un 20 aña pasa el a sobrevivi e actonan violento contra liderato di su iglesia na Uganda. Awe, e ta predica den club di hende homber na Leeds, Inglatera, dunando su speech di 10 minuut prome cu e hendenan cuminsa hunga bingo.

Na otro banda di Oceano Atlantico, e Mision Anglicano resien organisa riba continente Mericano tambe ta confrontando un crisis spiritual. Nan website oficial ta bisa: “Aworaki na Merca tin e poblacion di abla Ingles di mas grandi na mundo cu no ta afilia na ningun iglesia y cu no tin ningun interes den cosnan spiritual. Ta nos ta birando e campo pa misionero.” Frustra pa e echo cu nan esfuersonan pa realisa cambionan den nan iglesia a fracasa, e mision nobo a kibra cu tradicion y a join lidernan Asiatico y Africano pa extende nan “actividadnan misionero na Merca.”

Pero pakico misioneronan Africano, Asiatico y Latinoamericano ta ‘salbando alma’ den e paisnan supuestamente cristian di Europa y Norte America?

Ken Ta Salbando Ken?

Pa mas cu 400 aña, cuminsando un poco despues cu paisnan Europeo a colonisa luganan na Africa, Asia, Pacifico y Sur America, misioneronan Europeo deboto a yega e areanan aki na gran cantidad. Nan a bini pa trece nan religion pa e asina yama paganonan den e paisnan ei. Cu tempo, e colonianan Mericano, supuestamente funda riba principionan cristian, tambe a cuminsa establece nan mes misionnan evangelico rond mundo y despues a sigui haci hopi mas cu e misioneronan Europeo. Awor cosnan a bolter.

 “E centro [di cristianismo nominal] a cambia”, segun Andrew Walls, fundado y director di e Centro pa Investigacion di Cristianismo den e Mundo No Occidental. Na aña 1900, 80 porshento di hende cu a bisa cu nan ta cristian tawata sea Europeo of Norteamericano. Sinembargo, awe 60 porshento di tur hende cu ta bisa cu nan ta cristian ta biba na Africa, Asia y Latino America. Segun un informe di prensa resien, “iglesianan catolico na Europa ta depende di pastonan cu ta bini di Filipinas y India”, y “un di cada seis pasto cu ta sirbiendo aworaki den parokianan catolico riba continente Mericano, originalmente a bini di otro pais.” Evangelistanan Africano na Hulanda, kendenan ta bini principalmente di Ghana, ta mira nan mes como “un iglesia di misionero riba un continente caminda hende ta biba sin Dios.” Y awor ta evangelistanan di Brazil ta busca fielnan nobo den varios parti di Gran Bretania. Un escritor a remarca: “E trafico di misioneronan cristian a bira bek.”

Un Confrontacion Inevitabel

E continentenan Europeo y Norteamericano cu ta birando mas y mas mundano en berdad lo por haci bon uzo di misionero. Segun un revista noticiero, “na Escocia menos di 10 porshento di cristian ta bai misa fielmente.” Na Francia y Alemania e asistencia ta menos ainda. Un otro informe di prensa ta declara cu den un encuesta “rond di 40 porshento di Mericano y 20 porshento di Canades a bisa cu nan ta bai misa regularmente.” Na contraste, informenan ta mustra cu e asistencia na Filipinas ta casi 70 porshento, y e ta mescos den otro paisnan den desaroyo.

Loke ta asta mas notabel ainda ta cu baidonan di misa den Hemisferio Sur tin tendencia di pega mucho mas na tradicion cu esnan den Hemisferio Nort. Por ehempel, den un encuesta cu a ser haci entre catoliconan na Merca y Europa, consistentemente nan ta expresa un desconfiansa creciente pa autoridad di cleronan y ta boga pa un participacion mas amplio di laico y igualdad pa hende mohe. Di otro banda, catoliconan den e Hemisferio Sur si ta respalda den un forma casi total e posicion tradicional di iglesia encuanto e asuntonan aki. Segun cu e tendencia di apoyo pa iglesia ta sigui move bai pasuit, e base pa un futuro confrontacion ta poni caba. Philip Jenkins, un erudito di historia y religion, ta pronostica lo siguiente: “E chens ta grandi cu aki un of dos decada miembronan di denominacionnan cristian di e dos hemisferionan lo no reconoce otro como cristian den un forma completo of autentico.”

En bista di e tendencianan aki, segun Walls, un cuestion urgente ta, “con cristiannan Africano, Asiatico, Latinoamericano, Norteamericano y Europeo ta haci biba hunto den e mesun iglesia, expresando autenticamente e mesun fe.” Kico bo ta kere? Iglesianan por sobrevivi den un mundo dividi? Kico ta e base pa berdadero unidad cristian? E siguiente articulo lo duna e contestanan biblico, hunto cu evidencia cla cu un comunidad cristian uni ta floreciendo rond mundo caba.

[Plachi na pagina 4]

Loke un tempo tawata un misa awe ta un café

[Reconocemento]

AP Photo/Nancy Palmieri