Pakakaromog ed Espiritual Iran Kayamanan Diad Guinea

DIAD loob na saray siglo, saray eksplorador so angirisga’d bilay odino laman da diad panaanap da na saray kayamanan. Duaran klase na kayamanan so aromog na saray makpel a totoon akasabi ed Guinea, ed Sagur ya Aprika—materyal tan espiritual. Say bansan Guinea, a daakan ed diamante, balitok, puron metal, tan atagey-kalidad a bauxite (lapuan na aluminyum), so walaan na masulok a siameran milyon a populasyon.

Anggaman pigpigara iray relihyon na Kakristianoan ed sayan bansa, importante so panagdayew, tan dakel so mamapabli ed espiritual iran kayamanan. Anto irayan kayamanan? Saraya so matoor a lingkor nen Jehova, ya adeskribe diad Aggeo 2:7 a “saray mabli a bengatla na saray amin a nasyon.”

Espiritual Iran Kayamanan

Nakaukolan so impasyan sagpot pian nakotkot ed dalin iray niyamot a kayamanan. Mipadpara, importante met so masimoon a pansagpot diad Kristianon ministeryo pian naromog iray espiritual a kayamanan. Diad Guinea et ginmapo so kimey a panagpulong ed Panarian diad sulinek na bansa nen kasakbayan na dekada 1950, balet ag-itan akasabi ed kabisera, diad Conakry, anggad nen kasakbayan na dekada 1960. Natan et wala la so 900 a Tasi nen Jehova ed 21 a kongregasyon tan saray grupo ed interon bansa.

Sinmabi iray misionaryo nen 1987 tan nanlingkor ira a kaiba so saksakey a kongregasyon ed Conakry. Natan et wala lay masulok a 20 a misionaryo  diad kabisera tan diad sulinek na bansa. Sikaray maseseg a mamapabiskeg ed saray kongregasyon tan mibibiang diad ministeryo a kaiba iray agagi ed lokal.

Si Luc, a manaayam diad Conakry, so akaeksperiensya na liket sanen inyaralan to na Biblia si Albert, sakey a malangwer nin doktor. Si Albert so nananap na katuaan diad nanduruman relihyon, tan sikatoy angagamil na espiritismo. Sikatoy angisulong na singsing ya inter na sakey ya espiritista lapud sikatoy pinaseguroan a mangiter itan ed sikato na suwerte. Sanen adismayan maong ed panaanap to na tuan relihyon, imbantak nen Albert so singsing to tan nampikasi: “O Dios, no talagan wala ka, ipakabat mo’d siak so inkasika pian napanlingkoran ta ka. Ta no andi et manbilay ak lan bukor unong ed dili iran panlabayan ko.” Ag-abayag kayari na satan, binmisita si Albert ed abung nen atsi to tan nadngel toy pangiyaaral ed Biblia na sakey a Tasi nen Jehova ed kaanakan to. Ag-abayag et niyuksoy so pangiyaral nen Luc na Biblia ed si Albert.

Kada simba, si Luc so malikeliket a manaakar na masulok a 5 kilometro pian mangiyaral ed si Albert. Anggaman abeba labat so aral nen Luc, sikatoy nandinayewan a maong nen Albert, a nangraduar ed sakey ya unibersidad, lapu ed mabiskeg a pananisia to diad Kasulatan tan ed praktikal a panangiyaplika to ed pikakabat ed Biblia. Agaylay liket nen Albert sanen naamtaan to ya aliwan say Dios so sengegan na paniirap na katooan, noagta si Jehova et gagala ton panganggaen so amin a paniirap tan pagmaliwen a paraiso iyan dalin. (Salmo 37:9-11) Saray katuaan ed Biblia ontan met ed maabig a kondukta a naimatonan nen Albert ed limog na saray membro na kongregasyon so anenyeg ed puso to.

Balet, no panon a say agni atabas a diamante et kaukolan nin kurtian a maong na marunong a managkurti ta pian onkirlap, kinaukolan met nen Albert ya iwaklit iray minumundon ugali to ta pian nitunos toy bilay to ed matunong iran estandarte na Dios. Sikatoy agla ontutupleg ed saray espiritista, agla manbuabuanges, tan agla mansusugal. Mas nairapan si Albert a mangitunda ed panagsigarilyo. Diad kaunoran, sanen nampikasi a masimsimoon ed si Jehova parad tulong, atalonaan ton siansia itan. Anem bulan ed saginonor et inkasado to la so asawa to. Nanaral met na Biblia so asawa to. Natan et sikara lan dua so bautismadon lingkor nen Jehova.

 Si Martin so sananey nin espiritual a diamante. Sikatoy ginmapon nanaral na Biblia diad Guéckédou sanen mantaon na 15. Sikatoy sinebelan na saray Katolikon ateng to ya onatendi ed saray pantitipon na saray Tasi nen Jehova. Dineral da iray literatura ed Biblia nen Martin, pinepekpek da, tan pinataynan da ed abung. No panon a napoporma so sakey a diamante sano say karbon et niiyan ed mabiskeg a puersa, inmelet met so panangaro nen Martin ed katuaan na Biblia sanen sikatoy susumpaen. Asabi panaon et anguman so awawey na atateng to, kanian pinmawil la ed abung da. Anto so akapanguman ed awawey na atateng to? Naimano ra so baleg a pidumaan na kondukta nen Martin ed kondukta na saray agagi to, a sikaray rebelyoso tan alanor ed seksual ya imoralidad. Lapud kombinsido ya angunggona ed si Martin so balon pananisia to, inabrasa nen ama to ed abung da iray kakongregasyon to. Say ina nen Martin so aminpigan akisalamat ed saray agagi lapud amin a ginawa ra pian natulongan so anak to. Abautismoan si Martin sanen mantaon na 18, tan diad saginonor et nanaral ed Ministerial Training School tan manlilingkor natan bilang espisyal payunir a ministro.

Aangkaten Iran Espiritual a Kayamanan

Bangta iyeeksport so dakel ed saray natural a kayamanan na Guinea, arum ed espiritual iran kayamanan na satan so “aangkaten” ed arum a bansa. Dakdakel so emigranti a nanlalapud arum a bansa ed Aprika, a kaslakan et lapud ekonomya. Arum so linma ed Guinea pian natakasan so abayag la tan maruksa iran guerra.

Si Ernestine, a nanlapud Cameroon, so linma ed Guinea manga 12 a taon lay apalabas. Sikatoy inyaralan na saray Tasi nen Jehova tan pigay taon lan onaatendi ed saray pantitipon balet agni nampabautismo. Nen 2003, sanen abantayan to so panagbautismo diad sirkiton asamblea na saray Tasi nen Jehova, sikato so akalua. Lapud nakokonsiensia, oniay impikasi to ed si Jehova: “Natan et 51 años ko la, tan anggapo ni so maabig ya agawaan ko parad sika. Labay ta kan panlingkoran.” Kayari na satan, sikatoy kinmiwas a mitunosan ed mapaabeban pikakasi to. Impaliwawa to ed lakin piaamongan to a makapantultuloy iran manamong  daput no legal iran mankasal. Inmabobon imay laki, tan diad saginonor et sikatoy akalua ed liket diad mismon agew na bautismo to nen Nobyembre 2004.

Nen kasaksakbayan na dekada 1990, linma ed Guinea iray nilibo a tinmatakas ed guerra ed Liberia tan Sierra Leone, a kabiangan iray nilasus a Tasi nen Jehova. Sanen akasabi la ra ed refugee camp, saray agagi so angiyarunsa a tampol na regular iran pantitipon, angorganisa na kimey a panagpulong, tan angipaalagey na sakey a Kingdom Hall. Wala ra so nagmaliw a lingkor nen Jehova ed loob na saray kampo. Sakey ed sikara si Isaac. Kayari na bautismo to, sikatoy awalaan na pankanawnawan ompawil ed datin posisyon to diad sakey a baleg a kompanya ed Liberia. Ingen, mas pinili to so mansiansia diad kampo na Lainé bilang regular payunir. Oniay impaliwawa to: “Agko la kaukolan dia so manpatanir ed sakey ya amo pian onatendi ed saray pantitipon odino asamblea. Siak so bulos a manlilingkor ed si Jehova.” Nen Disyembre 2003, walay ginawan distriton kombension diad sayan niyarawin kampo parad 150 a Tasi a manaayam ed limog na 30,000 a tinmakas ed guerra. Makapaliket ta wala so 591 ya inmatendi, a kaiba so 9 a telek ya akibansag ed programa panamegley na sign language. Labindua so abautismoan. Inapresyan maong na saray agagi iray impansagpot pian nitarya so espiritual a dulang parad sikara.

Kinaukolan a Manggawa na Pananguman Iray “Mablin Bengatla”

Ompatnag ya anggapo iray babeng ya agnatalonaan na saramay manaanap na balitok tan saray diamante. Anggaman ontan, makapaliket so pakakanengneng ed saray balo ni a mansasagpot a manalona ed amin a babeng pian makapanlingkor ira ed si Jehova. Konsideraen pa so eksperiensya nen Zainab.

Sanen mantaon na 13, si Zainab so pinaskar ya aripenen bilang ugaw. Sikato so inala ed abung da ed sananey a bansa ed Sagur ya Aprika insan inawit da ed Guinea. Sanen mantaon la na 20, nadngelan to so mensahe na Biblia. Sikatoy magunaet ya angiyaplika ed naaaralan to.

Mairap parad si Zainab so onatendi ed Makristiano iran pandaragup pian mandayew. Balet, papablien a maong nen Zainab iray pantitipon tan agto labay a nasaew iratan. (Hebreos 10:24, 25) Saray libro to so iyamot to ed paway insan to la samaren sano onlan miaral. Aminpiga a sikatoy maruksan pinepekpek na saray mismon “amo” to lapud iyaatendi to ed sarayan espiritual a pandaragup.

Diad saginonor et anguman iray sirkumstansya nen Zainab, tan nibulos la ed inkaaripen. Tampol ya inatendian to so amin a pantitipon, a tinmulong iratan ed sikato pian maples ya onaligwas ed espiritual. Agto inawat so trabahon baleg so sueldo a mangamper ed sikato ed iyatendi ed saray pantitipon a pakagamoran to na Makristianon panangibangat. Sikatoy nampalista ed Teokratikon Eskuelaan Parad Ministeryo, nagmaliw ya agbautismadon manangipalapag na Panarian, tan diad saginonor et insimbolo toy dedikasyon to ed si Jehova panamegley na bautismo ed danum. Kayarin tuloy na bautismo to, sikatoy linmoob ed auxiliary payunir a ministeryo. Kayari na anem bulan, sikatoy nan-aplay a manlingkor bilang regular payunir a ministro.

Sanen akaatendi ed pigaran pantitipon so sakey ya interesadon too, oniay inkuan to: “Agko aliknan mairap so bilay ko sanen inmatendi ak.” Bangta dakel a totoo so interesado lambengat ed materyal iran kayamanan ed Guinea, saramay mangaaro ed si Jehova so magunaet a manaanap ed espiritual iran kayamanan. On, “saray mabli a bengatla na saray amin a nasyon” so onkakamang natan ed tuan panagdayew ed si Jehova!

[Kahon ed pahina 8]

GUINEA-2005

Pantok a bilang na saray Tasi: 883

Saray iyaaralan ed Biblia: 1,710

Saray inmatendi ed Memoryal: 3,255

[Saray mapa ed pahina 8]

(Parad aktual a format, nengnengen so publikasyon)

GUINEA

Conakry

SIERRA LEONE

LIBERIA

[Litrato ed pahina 9]

Si Albert tan si Luc

[Litrato ed pahina 9]

Kingdom Hall ed Conakry

[Litrato ed pahina 10]

Si Ernestine

[Litrato ed pahina 10]

Si Martin

[Litrato ed pahina 10]

Si Zainab

[Picture Credit Line ed pahina 8]

USAID