Kasin ‘Mayaman Ka Dia ed Dios’?

SAKEY ed saray makapatenyeg-kanonotan a parabolo nen Jesu-Kristo et samay nipaakar ed mayaman a makankayarian na dalin. Diad sagpot ton seguroen so maligen ya arapen to, implano na makankayarian na dalin so pampaalagey na babaleg iran kamalir. Ingen, diad ilustrasyon nen Jesus et satan a too so tinawag a “makulangkulang.” (Lucas 12:16-21) Inusar ni ingen na pigaran patalos na Biblia so salitan “kulang na kalakal.” Akin ya ontan lay kabelat na impanhusga ed sikato?

Mapatnag a sayan mayaman a too et ag-angikonsidera ed Dios sanen ginawa to iray plano to tan agto inter so galang ed Dios lapud inkamabuna na dalin to. (Mateo 5:45) Imbes, oniay impasirayew to: “Kamarerwa, dakel so saray kayamanan mo ya inyatol nipaakar ed dakel a taon; manpainawa ka, mangan ka, oninum ka, manliket ka.” On, inisip to a say bunga na saray sagpot to et onkanan singa “atagey tan mabiskeg a padir.”​—Uliran 18:11, Maung a Balita.

Bilang pasakbay sumpad ontan a mapaatagey ya espiritu, oniay insulat nen Santiago: “Balap natan, sikayo a mankuan, Saya ya agew odino nabuas onla kami ed ontan a baley, tan manayam kami diman a sakey taon, et mansaliw tan mantagilako kami et manubo kami. Anta agyo amta so onsabi nabuas, anto ta so bila’yo? Ta sakey kayo a sengaw ya ompatnag ed maganggano insan nabalang.”​—Santiago 4:13, 14.

Tua iratan a salita, lapud oniay imbaga ed samay mayaman a too ed parabolo nen Jesus: “Sika makulangkulang, natan a labi nakerew ed sika so kamarerwam; et saray bengatla ya intadiam, siopa naani makankayarian ed sikara?” Singa say sengaw a magangganon naandipat, say mayaman a too so ompatey sakbay ton nanengneng so kagawa na saray plano to. Kasin natetebek tayo so leksion? Oniay inkuan nen Jesus: “Ontan so mantipon na kayamanan nipaakar ed sikato, et aliwa a mayaman dia ed Dios.” Kasin ‘mayaman ka dia ed Dios’?